സോള്‍: ആകാശത്ത് വെച്ച് ദൃശ്യങ്ങള്‍ പകര്‍ത്താനുള്ള പൈലറ്റുമാരുടെ അമിത താല്പര്യം രണ്ട് അത്യാധുനിക യുദ്ധവിമാനങ്ങള്‍ കൂട്ടിയിടിക്കുന്നതിനും കോടിക്കണക്കിന് രൂപയുടെ നഷ്ടത്തിനും കാരണമായതായി റിപ്പോര്‍ട്ട്. 2021-ല്‍ നടന്ന ഈ അപകടത്തിന്റെ അന്വേഷണ വിവരങ്ങള്‍ സോള്‍ ഓഡിറ്റ് ആന്‍ഡ് ഇന്‍സ്‌പെക്ഷന്‍ ബോര്‍ഡാണ് ഇപ്പോള്‍ പുറത്തുവിട്ടത്. അറ്റാക്ക് മിഷന്റെ ഭാഗമായി പറന്ന രണ്ട് എഫ്-15കെ വിമാനങ്ങളാണ് അപകടത്തില്‍പ്പെട്ടത്. സര്‍വീസില്‍ നിന്ന് വിരമിക്കുന്നതിന് തൊട്ടുമുമ്പുള്ള തന്റെ അവസാന യാത്ര അവിസ്മരണീയമാക്കാന്‍ ഒരു പൈലറ്റ് മൊബൈല്‍ ഫോണില്‍ ചിത്രങ്ങള്‍ പകര്‍ത്താന്‍ ശ്രമിച്ചതാണ് വിനയായത്.
വിമാനം പറത്തുന്നതിനിടെ പൈലറ്റ് തന്റെ സ്വകാര്യ ഫോണെടുത്ത് ദൃശ്യങ്ങള്‍ പകര്‍ത്താന്‍ തുടങ്ങി.
ഇയാള്‍ ദൃശ്യങ്ങള്‍ പകര്‍ത്തുന്നത് കണ്ട മുന്നിലെ വിമാനത്തിലെ പൈലറ്റ്, തന്റെ സഹപ്രവര്‍ത്തകനോട് പിന്നിലെ വിമാനത്തിന്റെ വീഡിയോ എടുക്കാന്‍ ആവശ്യപ്പെട്ടു. ക്യാമറയില്‍ ദൃശ്യങ്ങള്‍ നന്നായി പതിയാനായി വിമാനം പെട്ടെന്ന് വെട്ടിച്ചു മാറ്റുന്നതിനിടയില്‍ രണ്ട് വിമാനങ്ങളും കൂട്ടിയിടിക്കുകയായിരുന്നു. പൈലറ്റുമാര്‍ അത്ഭുതകരമായി രക്ഷപ്പെട്ടെങ്കിലും വിമാനങ്ങള്‍ക്ക് കനത്ത കേടുപാടുകള്‍ സംഭവിച്ചു. അപകടത്തിന് കാരണക്കാരനായ പൈലറ്റ് നിലവില്‍ സൈന്യത്തില്‍ നിന്ന് വിരമിച്ച് സ്വകാര്യ വിമാനക്കമ്പനിയില്‍ ജോലി ചെയ്യുകയാണ്.
വിമാനം നന്നാക്കാന്‍ ചെലവായ തുകയുടെ ഒരു ഭാഗമായ 88 ദശലക്ഷം വോണ്‍ ഇയാള്‍ പിഴയായി നല്‍കണമെന്ന് ബോര്‍ഡ് വിധിച്ചു. പൈലറ്റുമാര്‍ ആകാശത്ത് വെച്ച് സ്വകാര്യ ഫോണുകള്‍ ഉപയോഗിക്കുന്നത് നിയന്ത്രിക്കുന്നതില്‍ വ്യോമസേനയ്‌ക്ക് വീഴ്ച പറ്റിയെന്നും അന്വേഷണ റിപ്പോര്‍ട്ട് ചൂണ്ടിക്കാട്ടുന്നു. അന്നത്തെ കാലത്ത് പൈലറ്റുമാര്‍ക്കിടയില്‍ ഇത്തരം ദൃശ്യങ്ങള്‍ പകര്‍ത്തുന്നത് ഒരു വിനോദമായി മാറിയിരുന്നുവെന്നും റിപ്പോര്‍ട്ടിലുണ്ട്. സുരക്ഷാ മാനദണ്ഡങ്ങള്‍ ലംഘിച്ച പൈലറ്റിന്റെ വാദങ്ങള്‍ തള്ളിക്കൊണ്ടാണ് ഈ കര്‍ശന നടപടി.
