അമിത ആത്മവിശ്വാസം വിനയായി: രാജവെമ്പാലയെ പിടികൂടുന്നതിനിടെ കടിയേറ്റ പാമ്പുപിടുത്തക്കാരന്‍ മരിച്ചു; വീഡിയോ വൈറല്‍

മുന്‍കരുതലുകളും കൃത്യമായ സുരക്ഷാ മാനദണ്ഡങ്ങളും പാലിക്കാത്തത് എങ്ങനെ നിമിഷങ്ങള്‍ക്കുള്ളില്‍ മരണത്തിലേക്ക് നയിക്കാം എന്നതിന്റെ ഞെട്ടിക്കുന്ന ദൃശ്യങ്ങളാണ് ഇപ്പോള്‍ സോഷ്യല്‍ മീഡിയയില്‍ പ്രചരിക്കുന്നത്. ജനവാസ മേഖലയില്‍ നിന്നും പാമ്പിനെ പിടികൂടാനെത്തിയ പാമ്പുപിടുത്തക്കാരനാണ്, സുരക്ഷാ രീതികള്‍ അവഗണിച്ചതിനെത്തുടര്‍ന്ന് ജീവന്‍ നഷ്ടമായത്. ഒരു കെട്ടിടത്തിനുള്ളില്‍ കയറിയ രാജവെമ്പാലയെ പിടികൂടാനാണ് പ്രാദേശിക പാമ്പുപിടുത്തക്കാരനായ ഇയാള്‍ എത്തിയത്. പാമ്പിനെ സുരക്ഷിതമായി പുറത്തെത്തിക്കുന്നത് കാണാന്‍ വലിയൊരു ജനക്കൂട്ടവും അവിടെ തടിച്ചുകൂടിയിരുന്നു.

ആദ്യഘട്ടത്തില്‍ പാമ്പിനെ വിദഗ്‌ദ്ധമായി പുറത്തെത്തിക്കാന്‍ ഇയാള്‍ക്ക് കഴിഞ്ഞു. എന്നാല്‍, പാമ്പിനെ ഉടന്‍ തന്നെ സുരക്ഷിതമായ ഒരു സഞ്ചിയിലോ പാത്രത്തിലോ മാറ്റുന്നതിന് പകരം അയാള്‍ അതിനെ നിലത്തിട്ടു. അവിടെ വെച്ച് പാമ്പിനെ പ്രകോപിപ്പിക്കുകയും തലയില്‍ തട്ടി കളിക്കാനും ഇയാള്‍ ശ്രമിച്ചു. ഇതിനിടെ പാമ്പ് ഇയാളുടെ കാലില്‍ കടിച്ചു. രാജവെമ്പാല കടിച്ചിട്ടും ഭയപ്പെടാതെ, ‘ഹാ, എങ്കില്‍ കടിച്ചോ’ എന്ന് ഇയാള്‍ പറയുന്നത് വീഡിയോയില്‍ കേള്‍ക്കാം.

ആദ്യത്തെ കടിയേറ്റതിന് ശേഷവും ഇയാള്‍ പിന്മാറാന്‍ തയ്യാറായില്ല. ജനക്കൂട്ടത്തിന് മുന്നില്‍ പാമ്പിനെ വെച്ച് അഭ്യാസപ്രകടനങ്ങള്‍ തുടരുകയായിരുന്നു. പാമ്പ് വീണ്ടും ഇയാളുടെ വിരലില്‍ കടിച്ചു. മുറിവ് ക്യാമറയ്‌ക്ക് മുന്നില്‍ കാണിച്ച ശേഷം, വിഷം കളയാന്‍ എന്ന രീതിയില്‍ വിരലിലെ രക്തം ഇയാള്‍ വായ കൊണ്ട് വലിച്ചെടുക്കാന്‍ ശ്രമിച്ചു. പാമ്പ് കടിയേറ്റാല്‍ ഒരിക്കലും ചെയ്യാന്‍ പാടില്ലാത്ത ഇത്തരം പ്രവൃത്തികള്‍ വിഷം ശരീരത്തില്‍ വേഗത്തില്‍ പടരാന്‍ കാരണമാകുമെന്ന് വിദഗ്‌ദ്ധര്‍ ചൂണ്ടിക്കാട്ടുന്നു.

The man who came to catch the snake paid a heavy price for playing with it, a painful de**ath in a live video within 3 minutes! pic.twitter.com/usGR3Xx3MI

— Ghar Ke Kalesh (@gharkekalesh) May 1, 2026

പിന്നീട് ഒരു ചെറിയ പാത്രത്തില്‍ പാമ്പിനെ അടയ്‌ക്കാന്‍ ശ്രമിച്ചെങ്കിലും അപ്പോഴേക്കും വിഷം ശരീരത്തില്‍ ആഴത്തില്‍ പടര്‍ന്നിരുന്നു. ഇയാളുടെ നില പെട്ടെന്ന് വഷളാകുകയും കുഴഞ്ഞുവീഴുകയും ചെയ്തു. അമിത ആത്മവിശ്വാസത്തോടെ പാമ്പിനെ കൈകാര്യം ചെയ്തത് ഒടുവില്‍ മരണത്തില്‍ കലാശിച്ചു. പാമ്പിനെ പിന്നീട് സുരക്ഷിതമായ സ്ഥലത്തേക്ക് മാറ്റി. വന്യജീവികളെ കൈകാര്യം ചെയ്യുമ്പോള്‍ കൃത്യമായ സുരക്ഷാ മാനദണ്ഡങ്ങള്‍ പാലിക്കേണ്ടതിന്റെയും, അവയെ നിസ്സാരമായി കാണുന്നതിലെ അപകടത്തിന്റെയും ഓര്‍മ്മപ്പെടുത്തലായി ഈ വീഡിയോ മാറിക്കഴിഞ്ഞു.