കൊല്ലം: കേരള രാഷ്‌ട്രീയത്തില്‍ ബിജെപിക്ക് കരുത്തുറ്റ ഒരടയാളപ്പെടുത്തലുമായി ബി.ബി. ഗോപകുമാര്‍. 2026-ലെ നിയമസഭാ തിരഞ്ഞെടുപ്പില്‍ കൊല്ലം ജില്ലയിലെ ചാത്തന്നൂര്‍ മണ്ഡലത്തില്‍ നിന്നും വിജയിച്ച അദ്ദേഹം, ഒ. രാജഗോപാലിന് ശേഷം നിയമസഭയിലെത്തുന്ന രണ്ടാമത്തെ ബിജെപി ജനപ്രതിനിധിയായി മാറി. ഇടതുപക്ഷത്തിന്റെ ഉരുക്കുകോട്ടയെന്ന് വിശേഷിപ്പിക്കപ്പെടുന്ന ചാത്തന്നൂരില്‍ അട്ടിമറി വിജയം നേടിയാണ് ഗോപകുമാര്‍ ഈ നേട്ടം കൈവരിച്ചത്.
4,000-ല്‍ അധികം വോട്ടുകള്‍ക്കാണ് ബി ബി ഗോപകുമാര്‍ ജയിച്ചത്. സിപിഐ സ്ഥാനാര്‍ത്ഥി അഡ്വ. ആര്‍. രാജേന്ദ്രന്‍ രണ്ടാം സ്ഥാനത്തും. കോണ്‍ഗ്രസിന്റെ സൂരജ് രവി മൂന്നാം സ്ഥാനത്തും ആണ് എത്തിയത്. കഴിഞ്ഞ പത്ത് വര്‍ഷമായി മണ്ഡലത്തില്‍ ബി.ബി. ഗോപകുമാര്‍ നടത്തിയ ചിട്ടയായ പ്രവര്‍ത്തനങ്ങളാണ് ഈ വിജയത്തിന്റെ അടിസ്ഥാനം. ഓരോ തിരഞ്ഞെടുപ്പിലും വോട്ട് വിഹിതം കൃത്യമായി വര്‍ദ്ധിപ്പിക്കാന്‍ അദ്ദേഹത്തിന് സാധിച്ചു.
2021-ലെ തിരഞ്ഞെടുപ്പില്‍ സിപിഐയുടെ ജി.എസ്. ജയലാലിനോട് പരാജയപ്പെട്ടെങ്കിലും കോണ്‍ഗ്രസിനെ മൂന്നാം സ്ഥാനത്തേക്ക് പിന്തള്ളി രണ്ടാം സ്ഥാനത്തെത്താന്‍ അദ്ദേഹത്തിന് കഴിഞ്ഞിരുന്നു. ബിജെപിയുടെ കൊല്ലം ജില്ലാ പ്രസിഡന്റ് എന്ന നിലയിലും മണ്ഡലത്തിലെ സജീവ സാന്നിധ്യമായും വോട്ടര്‍മാരുമായി വ്യക്തിപരമായ ബന്ധം സ്ഥാപിക്കാന്‍ ഗോപകുമാറിനായി. കൊല്ലം ജില്ലയില്‍ നിന്ന് ആദ്യമായി ബിജെപിക്ക് ഒരു നിയമസഭാ സീറ്റ് ലഭിച്ചു എന്നതും ഈ വിജയത്തെ ശ്രദ്ധേയമാക്കുന്നു.
നേമത്ത് ഒ. രാജഗോപാല്‍ സൃഷ്ടിച്ച ചരിത്ര വിജയത്തിന് ശേഷം കേരളത്തില്‍ ബിജെപിക്ക് ലഭിക്കുന്ന ഏറ്റവും വലിയ ആവേശമായാണ് ചാത്തന്നൂരിലെ ഈ മുന്നേറ്റം വിലയിരുത്തപ്പെടുന്നത്. ചാത്തന്നൂരിലെ വോട്ടര്‍മാര്‍ ഇത്തവണ രാഷ്‌ട്രീയ മാറ്റത്തിന് അനുകൂലമായി ചിന്തിച്ചുവെന്നത് വരാനിരിക്കുന്ന കേരള രാഷ്‌ട്രീയത്തിലെ പുതിയ സമവാക്യങ്ങളുടെ സൂചനയാകാം.