വിവാഹം കഴിഞ്ഞാലുടൻ നവദമ്പതികൾ ഏറ്റവും കൂടുതൽ ആഗ്രഹിക്കുന്നതും പ്ലാൻ ചെയ്യുന്നതുമായ ഒന്നാണ് ഹണിമൂൺ അഥവാ മധുവിധു യാത്രകൾ. എന്നാൽ ആധുനിക കാലത്ത് ഹണിമൂൺ എന്നത് കേവലം വിനോദയാത്രകൾക്കോ ആഡംബരങ്ങൾക്കോ അപ്പുറം, പങ്കാളികൾക്ക് പരസ്പരം ആത്മീയവും മാനസികവുമായ തലങ്ങളിൽ കൂടുതൽ ആഴത്തിൽ ബന്ധപ്പെടാൻ അവസരമൊരുക്കുന്ന ഒരു “ആത്മീയ യാത്ര” ആയി മാറിക്കൊണ്ടിരിക്കുകയാണ്. കേവലം മതപരമായ ചടങ്ങുകളിൽ പങ്കെടുക എന്നതല്ല ഇതിന്റെ അർത്ഥം, മറിച്ച് മനസ്സിനും ശരീരത്തിനും ഒരുപോലെ ശാന്തി നൽകുന്ന അന്തരീക്ഷത്തിൽ സമയം ചിലവഴിക്കുക എന്നതാണ് ഇതിന്റെ ലക്ഷ്യം.
തിരക്കേറിയ നഗരങ്ങളിൽ നിന്നും ഷോപ്പിംഗ് മാളുകളിൽ നിന്നും മാറി ശാന്തമായ മലയോരങ്ങളോ, പച്ചപ്പ് നിറഞ്ഞപ്രദേശങ്ങളോ, വലിയ തിരക്കില്ലാത്ത കടൽത്തീരങ്ങളോ ആണ് ഇത്തരം യാത്രകൾക്കായി തിരഞ്ഞെടുക്കാറുള്ളത്. പ്രകൃതിയുടെ നിശബ്ദതയിൽ ഒത്തുചേരുന്ന പങ്കാളികൾ യോഗ, ധ്യാനം എന്നിവയിലൂടെ തങ്ങളുടെ മാനസിക സമ്മർദ്ദങ്ങൾ അകറ്റുകയും പോസിറ്റീവ് ഊർജ്ജം പങ്കുവെക്കുകയും ചെയ്യുന്നു. ചില ദമ്പതികൾ ചരിത്രപരവും ആത്മീയവുമായ പ്രാധാന്യമുള്ള തീർത്ഥാടന കേന്ദ്രങ്ങൾ സന്ദർശിച്ച് ജീവിതത്തിന്റെ പുതിയൊരു അധ്യായത്തിന് തുടക്കം കുറിക്കാനും താല്പര്യപ്പെടുന്നു. വിവാഹജീവിതത്തിലെ പരുക്കൻ യാഥാർത്ഥ്യങ്ങളെയും വരാനിരിക്കുന്ന ഉത്തരവാദിത്തങ്ങളെയും കൂടുതൽ പക്വതയോടെയും പോസിറ്റീവ് ചിന്താഗതിയോടെയും നേരിടാൻ ആത്മീയമായ ഈ ഒത്തുചേരൽ നവദമ്പതികളെ പ്രാപ്തരാക്കുന്നു.
