അമൃതപുരി (കൊല്ലം): യുനെസ്‌കോയുടെ പ്രവര്‍ത്തനങ്ങളുടെയും നയപരമായ തീരുമാനങ്ങളുടെയും അവിഭാജ്യ ഘടകവും ഏറ്റവും വലിയ കരുത്തുമാണ് യുനെസ്‌കോ ചെയറുകളെന്ന് യുനെസ്‌കോ ന്യൂഡല്‍ഹി റീജിയണല്‍ ഓഫീസ് ഡയറക്ടര്‍ ടിം കര്‍ട്ടിസ് പ്രസ്താവിച്ചു. അമൃത വിശ്വവിദ്യാപീഠം അമൃതപുരി ക്യാമ്പസില്‍ നടന്ന ദക്ഷിണേഷ്യന്‍ രാജ്യങ്ങളിലെ യുനെസ്‌കോ ചെയറുകളുടെ രണ്ടുദിവസത്തെ റൗണ്ട് ടേബിള്‍ സമ്മേളനത്തില്‍ സംസാരിക്കുകയായിരുന്നു അദ്ദേഹം.
യുനെസ്‌കോ ഇന്ത്യയുടെ ആഭിമുഖ്യത്തില്‍ നടന്ന ഹൈബ്രിഡ് സമ്മേളനത്തില്‍ ഇന്ത്യ, നേപ്പാള്‍, ബംഗ്‌ളാദേശ്, ശ്രീലങ്ക തുടങ്ങിയ രാജ്യങ്ങളില്‍ നിന്നുള്ള യുനെസ്‌കോ പ്രതിനിധികളും വിദഗ്ധരും പങ്കെടുത്തു. വിദ്യാഭ്യാസം, സുസ്ഥിരത, ലിംഗസമത്വം, സാമൂഹിക വികസനം തുടങ്ങിയ മേഖലകളിലെ പരസ്പര സഹകരണം ശക്തമാക്കുകയായിരുന്നു ലക്ഷ്യം. അമൃത സര്‍വ്വകലാശാലയില്‍ പ്രവര്‍ത്തിക്കുന്ന മൂന്ന് യുനെസ്‌കോ ചെയറുകളാണ് സമ്മേളനത്തിന് ആതിഥേയത്വം വഹിച്ചത്.
സൂസന്‍ വൈസ് (ബംഗ്ലാദേശ്), ജാക്കോ ഡു ടോയ്റ്റ് (നേപ്പാള്‍) ഉള്‍പ്പെടെയുള്ള യുനെസ്‌കോയുടെ അന്താരാഷ്‌ട്ര പ്രതിനിധികള്‍ സമ്മേളനത്തിനെത്തിയിരുന്നു. അമൃതപുരിയിലെത്തിയ സംഘം സര്‍വ്വകലാശാലാ ചാന്‍സലര്‍ മാതാ അമൃതാനന്ദമയി ദേവിയുമായി കൂടിക്കാഴ്ച നടത്തുകയും ചെയ്തു. ഏഷ്യയില്‍ ഏറ്റവും കൂടുതല്‍ യുനെസ്‌കോ ചെയറുകള്‍ (ലിംഗസമത്വം, സുസ്ഥിര വികസനം, അസിസ്റ്റീവ് ടെക്‌നോളജി എന്നീ മേഖലകളില്‍) പ്രവര്‍ത്തിക്കുന്ന സര്‍വ്വകലാശാലയാണ് അമൃത.
