ജയ്പൂര്: വെസ്റ്റിന്ഡീസ് ഇതിഹാസം ക്രിസ് ഗെയിലിന്റെ വര്ഷങ്ങള് പഴക്കമുള്ള റെക്കോഡ് തിരുത്തിക്കുറിച്ച് രാജസ്ഥാന് റോയല്സിന്റെ കൗമാര വിസ്മയം വൈഭവ് സൂര്യവംശി. ഒരു ഐ.പി.എല് സീസണില് ഏറ്റവും കൂടുതല് സിക്സറുകള് പറത്തുന്ന ബാറ്ററെന്ന ചരിത്രനേട്ടമാണ് ഈ പതിനഞ്ചുകാരന് ഇനി തന്റെ പേരില് കുറിച്ചത്. സണ്റൈസേഴ്സ് ഹൈദരാബാദിനെതിരെ നടന്ന നിര്ണ്ണായകമായ എലിമിനേറ്റര് പോരാട്ടത്തിലാണ് വൈഭവ് ഈ അപൂര്വ്വ റെക്കോഡ് സ്വന്തമാക്കിയത്.
ഹൈദരാബാദുമായുള്ള മത്സരത്തിന് ഇറങ്ങുമ്പോള് 53 സിക്സറുകളായിരുന്നു വൈഭവിന്റെ അക്കൗണ്ടിലുണ്ടായിരുന്നത്. മത്സരത്തില് എതിര് ബൗളര്മാരെ നിലംതൊടാതെ പറത്തി 7 വമ്പന് സിക്സറുകള് കൂടി നേടിയതോടെ താരത്തിന്റെ ഈ സീസണിലെ ആകെ സിക്സറുകളുടെ എണ്ണം 60 ആയി ഉയര്ന്നു. ഐ.പി.എല് ചരിത്രത്തില് ഒരു സീസണില് 60 സിക്സറുകള് നേടുന്ന ആദ്യ താരം കൂടിയാണ് വൈഭവ്.
2012-ല് റോയല് ചലഞ്ചേഴ്സ് ബാംഗ്ലൂരിനായി കളിക്കുന്നതിനിടെ 59 സിക്സറുകള് അടിച്ചുകൂട്ടിയ ക്രിസ് ഗെയിലിന്റെ റെക്കോഡാണ് ഇതോടെ പഴങ്കഥയായത്. 2019 സീസണില് കൊല്ക്കത്ത നൈറ്റ് റൈഡേഴ്സിനായി 52 സിക്സറുകള് നേടിയ ആന്ദ്രേ റസ്സലാണ് ഈ പട്ടികയില് മൂന്നാം സ്ഥാനത്തുള്ളത്.
നേരത്തെ, ലഖ്നൗ സൂപ്പര് ജാന്റ്സിനെതിരെയുള്ള മത്സരത്തിനിടെ ഒരു ഐ.പി.എല് സീസണില് 50 സിക്സറുകള് തികയ്ക്കുന്ന ആദ്യ ഇന്ത്യന് താരമെന്ന റെക്കോഡും ഈ യുവ ഓപ്പണര് സ്വന്തമാക്കിയിരുന്നു. അതിനുപിന്നാലെയാണ് ഇപ്പോള് വിദേശ താരങ്ങളെപ്പോലും പിന്തള്ളി സിക്സറുകളുടെ എണ്ണത്തില് വൈഭവ് ഒന്നാമതെത്തിയിരിക്കുന്നത്.
