ആലപ്പുഴ: കസ്റ്റഡിയിലെടുത്ത വാഹനം വിട്ടുനല്കാന് ലക്ഷങ്ങള് കൈക്കൂലി വാങ്ങിയ ചേര്ത്തല ഡിവൈ.എസ്.പി ടി. അനില് കുമാറിനെ വിജിലന്സ് സംഘം കസ്റ്റഡിയിലെടുത്തു. ആലപ്പുഴ വിജിലന്സ് ഡിവൈ.എസ്.പി കെ.വി. ബെന്നിയുടെ നേതൃത്വത്തിലുള്ള ഉദ്യോഗസ്ഥരാണ് ചേര്ത്തല ആലുങ്കലുള്ള താമസസ്ഥലത്തുനിന്നും ഇദ്ദേഹത്തെ നാടകീയമായി പിടികൂടിയത്. വിജിലന്സ് സംഘത്തെ കണ്ടയുടന് മതില് ചാടി ഓടാന് ശ്രമിച്ച അനില് കുമാറിനെ ഉദ്യോഗസ്ഥര് പിന്തുടര്ന്ന് കീഴ്പ്പെടുത്തുകയായിരുന്നു.
പോലീസ് കസ്റ്റഡിയിലെടുത്ത ശുചിമുറി മാലിന്യ നിര്മ്മാര്ജ്ജന വാഹനം വിട്ടുനല്കുന്നതിനായി രണ്ട് ലക്ഷം രൂപയാണ് ഡിവൈ.എസ്.പി കൈക്കൂലിയായി ആവശ്യപ്പെട്ടത്. ഇത്രയും തുക നല്കാന് തയ്യാറാകാതിരുന്ന വാഹന ഉടമ വിവരം ഉടനടി വിജിലന്സിനെ അറിയിക്കുകയായിരുന്നു. പരാതി ലഭിച്ചതിനെത്തുടര്ന്ന് വിജിലന്സ് സംഘം ഡിവൈ.എസ്.പിയെ കര്ശന നിരീക്ഷണത്തിലാക്കി.
തുടര്ന്ന് വിജിലന്സിന്റെ നിര്ദ്ദേശപ്രകാരം വാഹന ഉടമ ആദ്യ ഗഡുവായ 50,000 രൂപ അനില് കുമാറിന് കൈമാറി. ഈ തുക കൈപ്പറ്റുന്നതിനിടെയാണ് ഒളിച്ചിരുന്ന വിജിലന്സ് സംഘം ഇയാളെ കൈയോടെ പിടികൂടിയത്. കൊല്ലം സ്വദേശിയായ ടി. അനില് കുമാര് കഴിഞ്ഞ തദ്ദേശ സ്വയംഭരണ തിരഞ്ഞെടുപ്പ് സമയത്താണ് ചേര്ത്തലയില് ഡിവൈ.എസ്.പിയായി ചുമതലയേല്ക്കുന്നത്. അറസ്റ്റിലായ ഇദ്ദേഹത്തിനെതിരെ കര്ശന നിയമനടപടികളുമായി മുന്നോട്ട് പോകാനാണ് വിജിലന്സ് തീരുമാനം.
