ന്യൂഡല്‍ഹി: ലോക്‌സഭാ തെരഞ്ഞെടുപ്പിലെ നാണംകെട്ട പരാജയം മറച്ചുവെക്കാനാണ് സി.പി.എം സംസ്ഥാന സെക്രട്ടറി എം.വി ഗോവിന്ദന്‍ ബി.ജെ.പി – യു.ഡി.എഫ് സഖ്യമാരോപിക്കുന്നതെന്ന് ബി.ജെ.പി ദേശീയ നിര്‍വാഹക സമിതി അംഗം പി.കെ കൃഷ്ണദാസ്. ഗോവിന്ദന്റെ പരാമര്‍ശം തികഞ്ഞ വങ്കത്തരമാണെന്നും പാര്‍ട്ടിയുടെ ദയനീയ തകര്‍ച്ചയുടെ ആഘാതത്തില്‍ നിന്നാണ് ഇത്തരം മണ്ടത്തരങ്ങള്‍ പറയുന്നതെന്നും അദ്ദേഹം ഡല്‍ഹിയില്‍ മാധ്യമങ്ങളോട് പ്രതികരിച്ചു.
തെരഞ്ഞെടുപ്പ് കണക്കുകള്‍ പരിശോധിച്ചാല്‍ കാര്യങ്ങള്‍ വ്യക്തമാകുമെന്ന് കൃഷ്ണദാസ് ചൂണ്ടിക്കാട്ടി. എല്‍.ഡി.എഫിന്റെ പരമ്പരാഗത വോട്ടുകളാണ് ഇത്തവണ വലിയ തോതില്‍ ചോര്‍ന്നത്. 2021-ലെ നിയമസഭാ തെരഞ്ഞെടുപ്പിനെ അപേക്ഷിച്ച് ഇടത് വോട്ടുകള്‍ കൂട്ടത്തോടെ യു.ഡി.എഫിലേക്ക് പോയ സാഹചര്യത്തില്‍, യഥാര്‍ത്ഥത്തില്‍ ഡീല്‍ ഉറപ്പിച്ചത് കോണ്‍ഗ്രസും സി.പി.എമ്മും തമ്മിലാണെന്ന് വേണം കരുതാന്‍. കെ. സുരേന്ദ്രന്‍ മത്സരിച്ച മഞ്ചേശ്വരത്ത് എല്‍.ഡി.എഫിന് ഇരുപതിനായിരത്തോളം വോട്ടുകളുടെ കുറവാണുണ്ടായത്. ഈ വോട്ടുകള്‍ മുസ്ലിം ലീഗിനാണ് ലഭിച്ചതെന്നും അദ്ദേഹം വ്യക്തമാക്കി.
തിരുവനന്തപുരം ജില്ലയിലെ കാട്ടാക്കട പോലുള്ള മണ്ഡലങ്ങളില്‍ ബി.ജെ.പിക്ക് അയ്യായിരത്തോളം വോട്ടുകള്‍ വര്‍ദ്ധിച്ചപ്പോള്‍ എല്‍.ഡി.എഫ് വോട്ടുകള്‍ കുത്തനെ ഇടിയുകയാണ് ചെയ്തത്. സ്വന്തം വീഴ്ചകള്‍ തിരുത്താന്‍ തയ്യാറാകാതെ മുന്നോട്ട് പോയാല്‍ ബംഗാളിലും ത്രിപുരയിലും സംഭവിച്ചതുപോലെ കമ്മ്യൂണിസ്റ്റ് പാര്‍ട്ടി കേരളത്തിലും ഇല്ലാതാകുമെന്ന് കൃഷ്ണദാസ് മുന്നറിയിപ്പ് നല്‍കി.
ഭരണത്തിലിരുന്നപ്പോള്‍ ജനങ്ങള്‍ക്ക് നല്‍കിയ ഉറപ്പുകള്‍ പാലിക്കുന്നതില്‍ എല്‍.ഡി.എഫ് സര്‍ക്കാര്‍ പൂര്‍ണ്ണമായി പരാജയപ്പെട്ടിരുന്നു. ഇപ്പോള്‍ അധികാരത്തിലെത്തിയ യു.ഡി.എഫ് സര്‍ക്കാരും അതേ പാത പിന്തുടര്‍ന്ന് വാഗ്ദാനങ്ങളില്‍ നിന്ന് പിന്നോട്ട് പോവുകയാണെന്ന് കൃഷ്ണദാസ് ആരോപിച്ചു. മുന്നണികള്‍ മാറിയെങ്കിലും ജനങ്ങളെ വഞ്ചിക്കുന്ന കാര്യത്തില്‍ ഇരു കൂട്ടരും ഒരേ നാണയത്തിന്റെ ഇരുവശങ്ങളാണെന്നും അദ്ദേഹം കൂട്ടിച്ചേര്‍ത്തു.
