ന്യൂഡല്ഹി: ജൂണ് 21-ന് നടക്കുന്ന നീറ്റ്-യുജി 2026 റീ-പരീക്ഷയ്ക്ക് മുന്നോടിയായി വിദ്യാര്ഥികള്ക്ക് മുന്നറിയിപ്പുമായി നാഷണല് ടെസ്റ്റിംഗ് ഏജന്സി (എന്ടിഎ). റീ-എക്സാമിന്റെ അഡ്മിറ്റ് കാര്ഡ് ഡൗണ്ലോഡ് ചെയ്യാന് ഇതുവരെ സാധിക്കാത്ത ഉദ്യോഗാര്ഥികള്ക്ക് എസ്എംഎസ്, ഇ-മെയില്, വാട്സ്ആപ്പ് സന്ദേശങ്ങള് അയച്ചുവരികയാണെന്നും, വ്യാജ ലിങ്കുകളിലും തട്ടിപ്പ് സന്ദേശങ്ങളിലും വീഴരുതെന്നും എന്ടിഎ വ്യക്തമാക്കി.
മെയ് 3-ന് നടന്ന നീറ്റ് പരീക്ഷ ചോദ്യപേപ്പര് ചോര്ച്ച ആരോപണത്തെ തുടര്ന്ന് റദ്ദാക്കിയിരുന്നു. ഇതിന്റെ പശ്ചാത്തലത്തിലാണ് ജൂണ് 21-ന് റീ-പരീക്ഷ നടത്തുന്നത്. ഔദ്യോഗിക വെബ്സൈറ്റില് നിന്ന് മാത്രമേ അഡ്മിറ്റ് കാര്ഡ് ഡൗണ്ലോഡ് ചെയ്യാവൂ എന്നും, പരീക്ഷാ പേപ്പര്, ഉത്തരസൂചിക, പണം ആവശ്യപ്പെടല്, അല്ലെങ്കില് ”ലീക്ക്” ചെയ്ത വിവരങ്ങള് വാഗ്ദാനം ചെയ്യുന്ന സന്ദേശങ്ങള് എന്ടിഎ ഒരിക്കലും അയയ്ക്കില്ലെന്നും ഏജന്സി വ്യക്തമാക്കി.
ഇതിനകം പുതിയ അഡ്മിറ്റ് കാര്ഡ് ഡൗണ്ലോഡ് ചെയ്തവര് വീണ്ടും അത് ചെയ്യേണ്ട ആവശ്യമില്ലെന്നും എന്ടിഎ അറിയിച്ചു. പരീക്ഷാകേന്ദ്രവും റോള് നമ്പറും മാറിയിരിക്കാനിടയുള്ളതിനാല് പഴയ അഡ്മിറ്റ് കാര്ഡുകള് അസാധുവാണെന്നും, ഔദ്യോഗിക അറിയിപ്പുകള് മാത്രമേ വിശ്വസിക്കാവൂ എന്നും എന്ടിഎ വിദ്യാര്ഥികളോട് നിര്ദേശിച്ചു.
