തിരുവനന്തപുരം: ക്രിക്കറ്റ് പരിശീലനത്തിനായി എത്തിയ പ്രായപൂര്ത്തിയാകാത്ത പെണ്കുട്ടിയെ ലൈംഗികമായി പീഡിപ്പിച്ച കേസില് ക്രിക്കറ്റ് കോച്ചിന് 47 വര്ഷം കഠിനതടവും 79,000 രൂപ പിഴയും വിധിച്ച് തിരുവനന്തപുരം അതിവേഗ പ്രത്യേക കോടതി. വള്ളക്കടവ് ശ്രീവരാഹം സ്വദേശി എം. മനു (40)വിനെയാണ് കോടതി ശിക്ഷിച്ചത്. ഇയാള്ക്കെതിരായ മൂന്നാമത്തെ കേസിലാണ് ഇപ്പോഴത്തെ ശിക്ഷ. ആദ്യ രണ്ട് കേസുകളിലും കോടതി നേരത്തെ കുറ്റക്കാരനാണെന്ന് കണ്ടെത്തി ശിക്ഷ വിധിച്ചിരുന്നു. രണ്ടാമത്തെ കേസില് 35 വര്ഷം കഠിനതടവാണ് ലഭിച്ചിരുന്നത്.
പ്രോസിക്യൂഷന്റെ വാദം അംഗീകരിച്ച കോടതി, ഓരോ കേസിലെയും ശിക്ഷ പ്രത്യേകം അനുഭവിച്ചശേഷം മാത്രമേ അടുത്ത കേസിലെ ശിക്ഷ ആരംഭിക്കാവൂവെന്ന് ഉത്തരവിട്ടു. അതിനാല് നിലവിലെ ശിക്ഷ ആദ്യ രണ്ട് കേസുകളിലെ ശിക്ഷ പൂര്ത്തിയായ ശേഷമാണ് പ്രാബല്യത്തില് വരിക.
ഇതിനിടെ സമാന സ്വഭാവമുള്ള നാലാമത്തെ കേസിലും പ്രതി കുറ്റക്കാരനാണെന്ന് കോടതി കണ്ടെത്തിയിട്ടുണ്ട്. ആ കേസിലെ ശിക്ഷ തിങ്കളാഴ്ച പ്രഖ്യാപിക്കും. തിരുവനന്തപുരം നഗരത്തിലെ പ്രമുഖ ക്രിക്കറ്റ് പരിശീലന കേന്ദ്രത്തെ കേന്ദ്രീകരിച്ചാണ് കേസിനാസ്പദമായ സംഭവങ്ങള് നടന്നത്. 2018 മുതല് പരിശീലനത്തിനെത്തിയ പെണ്കുട്ടിയെ ജിമ്മിലേക്കും ബാത്ത്റൂമിലേക്കും കൊണ്ടുപോയി പലതവണ ലൈംഗികമായി പീഡിപ്പിച്ചെന്നാണ് കേസ്.
അന്വേഷണത്തില്, ഇരയുടെ സ്വകാര്യ ചിത്രങ്ങളും ദൃശ്യങ്ങളും പകര്ത്തിയതായും മറ്റൊരു ഇരയെ ഭീഷണിപ്പെടുത്തി ഈ കേസിലെ ഇരയുടെ ദൃശ്യങ്ങള് റെക്കോര്ഡ് ചെയ്യിപ്പിച്ചതായും കണ്ടെത്തിയതായി പ്രോസിക്യൂഷന് കോടതിയെ അറിയിച്ചു. സംഭവം പുറത്തുപറഞ്ഞാല് ക്രിക്കറ്റ് ജീവിതം തകര്ക്കുമെന്ന് പ്രതി ഭീഷണിപ്പെടുത്തിയതിനെ തുടര്ന്നാണ് ഇര വര്ഷങ്ങളോളം പരാതി നല്കാതിരുന്നതെന്ന് അന്വേഷണത്തില് വ്യക്തമായി.
പരിശീലനത്തില് വേണ്ടത്ര അവസരങ്ങള് നല്കാതിരുന്നതോടെ 2019-ല് കുട്ടി മറ്റൊരു അക്കാദമിയിലേക്ക് മാറി. സമാന രീതിയില് പരിശീലനത്തിനെത്തിയ മറ്റ് അഞ്ച് പെണ്കുട്ടികളും പീഡനത്തിനിരയായതായി അന്വേഷണത്തില് കണ്ടെത്തി. ഭയം മൂലം ഇവരും വര്ഷങ്ങളോളം പരാതി നല്കിയിരുന്നില്ല.
2024-ല് തിരുവനന്തപുരത്ത് നടന്ന പെണ്കുട്ടികളുടെ ക്രിക്കറ്റ് ടൂര്ണമെന്റിനിടെ പ്രതിയെ വീണ്ടും കണ്ടതോടെ ഒരു ഇര ഭയന്ന് പ്രതികരിച്ചതാണ് കേസിന് വഴിത്തിരിവായത്. തുടര്ന്ന് പരാതി നല്കിയതോടെ മറ്റ് ഇരകള്ക്കും മുന്നോട്ടുവരാന് ധൈര്യം ലഭിച്ചു. ഇതിനെ തുടര്ന്ന് പ്രതിക്കെതിരെ ആകെ ആറ് കേസുകള് രജിസ്റ്റര് ചെയ്തു. ഇതില് മൂന്ന് കേസുകളില് ഇതിനകം ശിക്ഷ വിധിച്ചുകഴിഞ്ഞു. നാലാമത്തെ കേസിലെ ശിക്ഷാ വിധി തിങ്കളാഴ്ച പ്രഖ്യാപിക്കും. കേസില് സ്പെഷ്യല് പബ്ലിക് പ്രോസിക്യൂട്ടര് ആര്.എസ്. വിജയ് മോഹനാണ് പ്രോസിക്യൂഷന് വേണ്ടി ഹാജരായത്.
