ലണ്ടന്: വെസ്റ്റ് ഇന്ഡീസ് ക്രിക്കറ്റിലെ ഇതിഹാസ താരം ക്രിസ് ഗെയില് ആഗോള ക്രിക്കറ്റിങ് ബ്രാന്ഡായ ബ്ലൂ ടൈഗേഴ്സ് യുകെയുടെ സഹ ഉടമയായി ഔദ്യോഗികമായി ചുമതലയേറ്റു. ബ്ലൂ ടൈഗേഴ്സിന്റെ വളര്ച്ചയില് നിര്ണായക വഴിത്തിരിവായാണ് ഈ കൂട്ടുകെട്ടിനെ വിലയിരുത്തുന്നത്. ലോകോത്തര ക്രിക്കറ്റ് ബ്രാന്ഡായി ബ്ലൂ ടൈഗേഴ്സിനെ വളര്ത്തുന്നതിനും യുവ പ്രതിഭകള്ക്ക് കൂടുതല് അവസരങ്ങള് സൃഷ്ടിക്കുന്നതിനുമുള്ള ശ്രമങ്ങള്ക്ക് ഗെയ്ലിന്റെ സാന്നിധ്യം വലിയ കരുത്താകുമെന്നാണ് വിലയിരുത്തല്.
കേരള ക്രിക്കറ്റ് ലീഗിന്റെ ഈ സീസണ് മുതല് കൊച്ചി ബ്ലൂ ടൈഗേഴ്സിന്റെ പ്രവര്ത്തനങ്ങളിലും ടീമിന്റെ വളര്ച്ചയിലും ക്രിസ് ഗെയ്ല് സജീവമായി പങ്കാളിയാകും. കേരളത്തിലെ യുവ ക്രിക്കറ്റ് താരങ്ങളെ കണ്ടെത്തുന്നതിനും മികച്ച പരിശീലനത്തിലൂടെ അവരുടെ കഴിവുകള് മികവുറ്റതാക്കുന്നതിനും അദ്ദേഹം നിര്ണായക പങ്ക് വഹിക്കുമെന്നാണ് മാനേജ്മെന്റ് വ്യക്തമാക്കിയത്.
ബ്ലൂ ടൈഗേഴ്സ് മാനേജിങ് ഡയറക്ടര് സുഭാഷ് ജോര്ജ് മാനുവല്, ക്രിസ് ഗെയ്ലിന്റെ അനുഭവസമ്പത്തും ആഗോള സ്വീകാര്യതയും ബ്രാന്ഡിന്റെ വളര്ച്ചയ്ക്ക് വലിയ മുതല്ക്കൂട്ടാകുമെന്ന് പറഞ്ഞു. കേരളത്തിലെ പ്രതിഭകള്ക്ക് രാജ്യാന്തര തലത്തിലേക്ക് എത്താനുള്ള പുതിയ അവസരങ്ങള് ഈ പങ്കാളിത്തത്തിലൂടെ തുറക്കുമെന്നും അദ്ദേഹം കൂട്ടിച്ചേര്ത്തു.
സഹ ഉടമ ശിവപ്രസാദ് എം, ബ്ലൂ ടൈഗേഴ്സ് ബ്രാന്ഡിന്റെ ചരിത്രത്തിലെ സുപ്രധാന നാഴികക്കല്ലാണ് ക്രിസ് ഗെയ്ലിന്റെ വരവെന്നും, അദ്ദേഹത്തിന്റെ സാന്നിധ്യം ബ്രാന്ഡിന്റെ ആഗോള സ്വാധീനവും വളര്ച്ചയും കൂടുതല് ശക്തിപ്പെടുത്തുമെന്നും പ്രതികരിച്ചു.
