ലണ്ടന്: മുട്ടിനേറ്റ പരിക്കിനെ തുടര്ന്ന് വിംബിള്ഡണ് ഡബിള്സ് ടൂര്ണമെന്റില് നിന്ന് ടെന്നിസ് ഇതിഹാസം സെറീന വില്യംസ് പിന്മാറി. ഇന്സ്റ്റഗ്രാമിലൂടെ തന്നെയാണ് 23 ഗ്രാന്ഡ് സ്ലാം കിരീടങ്ങള് നേടിയ സെറീന തന്റെ പിന്മാറ്റം പ്രഖ്യാപിച്ചത്.
സഹോദരി വീനസ് വില്യംസിനൊപ്പം കൊളംബിയയുടെ കാമില ഒസോറിയോയും അര്ജന്റീനയുടെ സൊലാന സിയറയും അടങ്ങിയ സഖ്യത്തെ നേരിടാനായിരുന്നു സെറീനയുടെ പദ്ധതി. എന്നാല് ആദ്യ റൗണ്ട് സിംഗിള്സ് മത്സരത്തില് മായ ജോയിന്റിനോട് തോറ്റ മത്സരത്തിനിടെയാണ് സെറീനയ്ക്ക് മുട്ടിന് പരിക്കേറ്റത്.
‘ഡബിള്സില് നിന്ന് പിന്മാറേണ്ടി വന്നത് ഹൃദയഭേദകമാണ്. വീണ്ടും മത്സരരംഗത്തേക്ക് മടങ്ങിയെത്താന് കഴിഞ്ഞതും വീനസിനൊപ്പം ഒരിക്കല് കൂടി കളിക്കാനുള്ള അവസരവും എനിക്ക് വളരെ വിലപ്പെട്ടതായിരുന്നു. കളിക്കാന് തയ്യാറാകാന് കഴിയുന്നതെല്ലാം ഞാന് ചെയ്തു. പക്ഷേ നിര്ഭാഗ്യവശാല് എന്റെ മുട്ട ഇപ്പോഴും മത്സരത്തിന് തയ്യാറായിട്ടില്ല,’ സെറീന കുറിച്ചു.
വിംബിള്ഡണ് സംഘാടകരോടും ആരാധകരോടും നന്ദി അറിയിച്ച സെറീന, വീണ്ടും കോര്ട്ടിലേക്ക് മടങ്ങിവരുമെന്ന സൂചനയും നല്കി. സിംഗിള്സ് മത്സരത്തിന് ശേഷം മുട്ടില് നിന്ന് ദ്രാവകം പുറത്തെടുത്തതിന്റെ ചിത്രവും സെറീന പങ്കുവെച്ചു. ‘ഇനി മുട്ടില് ഇത്രയും ദ്രാവകം വീണ്ടും അടിഞ്ഞുകൂടില്ലെന്നതാണ് നല്ല വാര്ത്ത. പക്ഷേ ഡബിള്സിനായി ശരീരം തയ്യാറാക്കാന് എനിക്ക് കഴിഞ്ഞില്ല എന്നതാണ് മോശം വാര്ത്ത,’ അവര് പറഞ്ഞു.
സെറീന-വീനസ് സഖ്യത്തിന് പകരം സാമന്ത മറെ ഷാരനും ലന്ലാന തരാരുദിയും വിംബിള്ഡണ് ഡബിള്സില് കളിക്കും. ജൂണില് വിരമിക്കല് അവസാനിപ്പിച്ച് ടെന്നിസിലേക്ക് തിരിച്ചെത്തിയ 44-കാരിയായ സെറീന, വിംബിള്ഡണിന് മുന്നോടിയായി എച്ച്.എസ്.ബി.സി. ചാമ്പ്യന്ഷിപ്പിലും ബെര്ലിന് ഓപ്പണിലും പങ്കെടുത്തിരുന്നു. മായ ജോയിന്റിനെതിരായ അവരുടെ സിംഗിള്സ് മത്സരം 18 ലക്ഷം (1.8 മില്യണ്) പ്രേക്ഷകര് കണ്ടതോടെ ഈ വര്ഷത്തെ വിംബിള്ഡണിലെ രണ്ടാം ദിവസത്തെ ഏറ്റവും കൂടുതല് ആളുകള് കണ്ട മത്സരമായി അത് മാറുകയും ചെയ്തു.
