ആലപ്പുഴ: കുട്ടികളുടെ സാമൂഹ്യമാധ്യമ ഉപയോഗത്തിനും ഡാറ്റാ ഉപയോഗത്തിനും ഫലപ്രദമായ സാങ്കേതിക നിയന്ത്രണങ്ങള്‍ ഏര്‍പ്പെടുത്തുന്ന പ്രത്യേക നിയമം കേന്ദ്ര-സംസ്ഥാന സര്‍ക്കാരുകള്‍ അടിയന്തരമായി നടപ്പാക്കണമെന്ന് ബാലഗോകുലം കേരളത്തിന്റെ 51-ാമത് സംസ്ഥാന വാര്‍ഷിക പൊതുസമ്മേളനം പ്രമേയത്തിലൂടെ ആവശ്യപ്പെട്ടു. ആലപ്പുഴ ജില്ലയിലെ മാവേലിക്കരയിലെ വിദ്യാധിരാജ വിദ്യാപീഠം സെന്‍ട്രല്‍ ആന്‍ഡ് സൈനിക് സ്‌കൂളില്‍ നടന്ന സമ്മേളനത്തിലാണ് പ്രമേയം അവതരിപ്പിച്ചത്.
വിവരസാങ്കേതികവിദ്യയുടെ വളര്‍ച്ച സമൂഹത്തിന് വലിയ നേട്ടങ്ങള്‍ സമ്മാനിച്ചെങ്കിലും, അതിന്റെ നിയന്ത്രണമില്ലാത്ത ഉപയോഗം കുട്ടികളുടെ ശാരീരിക-മാനസിക ആരോഗ്യത്തെ ഗുരുതരമായി ബാധിക്കുന്നുവെന്നാണ് പ്രമേയത്തില്‍ ചൂണ്ടിക്കാട്ടുന്നത്. ഓണ്‍ലൈന്‍ പഠനത്തിന് ശേഷം സ്മാര്‍ട്ട്‌ഫോണ്‍ കുട്ടികളുടെ ജീവിതത്തിന്റെ ഭാഗമായതോടെ, നിയന്ത്രണങ്ങളില്ലാതെ സാമൂഹ്യമാധ്യമങ്ങളിലേക്കും ഇന്റര്‍നെറ്റിലേക്കും കുട്ടികള്‍ പ്രവേശിക്കുന്ന സാഹചര്യം വര്‍ധിച്ചതായും സമ്മേളനം വിലയിരുത്തി.
ഡിജിറ്റല്‍ ആസക്തി, പഠനത്തിലെ പിന്നാക്കാവസ്ഥ, ഏകാന്തത, മൂല്യബോധത്തിന്റെ ക്ഷയം, ആത്മഹത്യാപ്രവണത തുടങ്ങിയ പ്രശ്‌നങ്ങള്‍ വര്‍ധിച്ചുവരുന്നതായി വിവിധ പഠനങ്ങള്‍ വ്യക്തമാക്കുന്നുണ്ടെന്നും പ്രമേയം ചൂണ്ടിക്കാട്ടി. കുട്ടികളെ ശാന്തരാക്കാനോ തിരക്കുകളില്‍ നിന്ന് ഒഴിവാക്കാനോ മൊബൈല്‍ ഫോണ്‍ കൈമാറുന്ന മാതാപിതാക്കളുടെ പ്രവണതയും പ്രശ്‌നം രൂക്ഷമാക്കുന്നുവെന്നാണ് വിലയിരുത്തല്‍.
സാമൂഹ്യമാധ്യമങ്ങളുടെ അമിത ഉപയോഗം ഭാഷാപരമായ കഴിവുകള്‍ക്കും പുസ്തകവായനയ്‌ക്കും തിരിച്ചടിയാണെന്നും ഗ്രാമീണ വായനശാലകളുടെ പ്രസക്തി കുറയുന്നതായും പ്രമേയം ആശങ്ക പ്രകടിപ്പിച്ചു. മാതൃഭാഷയുടെ പ്രയോഗത്തിലും ഉച്ചാരണത്തിലും കുട്ടികള്‍ പിന്നാക്കം പോകുന്നതായും കുടുംബബന്ധങ്ങളുടെയും അധ്യാപക-വിദ്യാര്‍ഥി ബന്ധത്തിന്റെയും ഊഷ്മളത നഷ്ടപ്പെടുന്നതായും സമ്മേളനം ചൂണ്ടിക്കാട്ടി.
അതേസമയം, ഇന്റര്‍നെറ്റിന്റെയും ആര്‍ട്ടിഫിഷ്യല്‍ ഇന്റലിജന്‍സിന്റെയും സാധ്യതകളെ തള്ളിക്കളയാതെ, അവ ഉത്തരവാദിത്തത്തോടെയും ക്രിയാത്മകമായും ഉപയോഗിക്കാന്‍ കുട്ടികള്‍, മാതാപിതാക്കള്‍, അധ്യാപകര്‍ എന്നിവര്‍ക്കിടയില്‍ ബോധവത്കരണം ശക്തമാക്കണമെന്നും പ്രമേയം ആവശ്യപ്പെട്ടു.
കുട്ടികളിലേക്ക് അഭിലഷണീയമല്ലാത്ത വിദേശ സ്വാധീനങ്ങളും ദുഷ്പ്രവണതകളും എത്തുന്നത് തടയാന്‍ ഐ.ടി. നയത്തില്‍ ആവശ്യമായ ഭേദഗതികള്‍ കൊണ്ടുവരണമെന്നും, കുട്ടികളുടെ ഡാറ്റാ ഉപയോഗവും സോഷ്യല്‍ മീഡിയ ഉപയോഗവും സാങ്കേതികമായി നിയന്ത്രിക്കുന്ന പ്രത്യേക നിയമനിര്‍മാണം കേന്ദ്രവും സംസ്ഥാനങ്ങളും അടിയന്തരമായി നടപ്പാക്കണമെന്നും ബാലഗോകുലം സമ്മേളനം ആവശ്യപ്പെട്ടു.
