ന്യൂഡൽഹി: സ്വാതന്ത്ര്യാനന്തര ഇന്ത്യയിലെ ഏറ്റവും വലിയ സൈനിക പുനഃസംഘടനകളിലൊന്നായ തിയറ്റർ കമാൻഡ് സംവിധാനത്തിനുളള നടപടികൾ നിർണായക ഘട്ടത്തിലേക്ക്. കര, നാവിക, വ്യോമ സേനകളെ ഏകോപിപ്പിക്കുന്ന തിയറ്റർ കമാൻഡിനുള്ള അന്തിമ നിർദേശം ഈ മാസം അവസാനത്തോടെ പ്രതിരോധമന്ത്രി രാജ്നാഥ് സിംഗിന് സമർപ്പിക്കുമെന്ന് ദേശീയ മാധ്യമങ്ങൾ റിപ്പോർട്ട് ചെയ്യുന്നു.
നിലവിൽ കരസേന, നാവികസേന, വ്യോമസേന എന്നിവ ഓരോന്നും പ്രത്യേകം കമാൻഡ് ഘടനയിലാണ് പ്രവർത്തിക്കുന്നത്. പുതിയ സംവിധാനത്തിൽ ഈ മൂന്ന് സേനകളുടെയും വിഭവങ്ങളും സൈനിക ശേഷിയും ഒരു ഏകീകൃത കമാൻഡിന് കീഴിലാകും പ്രവർത്തിക്കുക. ഇതിലൂടെ യുദ്ധസാഹചര്യങ്ങളിൽ വേഗത്തിലും കാര്യക്ഷമമായും സംയുക്ത സൈനിക നടപടി സ്വീകരിക്കാനാകും.
മൂന്ന് തിയറ്റർ കമാൻഡുകൾ
നിലവിലെ കരട് പ്രകാരം മൂന്ന് പ്രധാന തിയറ്റർ കമാൻഡുകളാണ് രൂപീകരിക്കുക.
- വടക്കൻ തിയറ്റർ കമാൻഡ് – ചൈന അതിർത്തി കേന്ദ്രീകരിച്ച്.
- പശ്ചിമ തിയറ്റർ കമാൻഡ് – പാകിസ്ഥാൻ അതിർത്തി കേന്ദ്രീകരിച്ച്.
- മാരിടൈം തിയറ്റർ കമാൻഡ് – ഇന്ത്യൻ തീരപ്രദേശങ്ങളും സമുദ്ര സുരക്ഷയും ലക്ഷ്യമാക്കി.
ഓരോ കമാൻഡിനും സേനാ മേധാവികൾക്ക് സമാനമായ പദവിയുള്ള ഉദ്യോഗസ്ഥർ നേതൃത്വം നൽകും.
യുദ്ധസാഹചര്യങ്ങളിലെ ഏകോപനം ലക്ഷ്യം
ആധുനിക യുദ്ധങ്ങൾ കരയിലോ കടലിലോ ആകാശത്തിലോ മാത്രം ഒതുങ്ങുന്നതല്ല. സൈബർ, ബഹിരാകാശ മേഖലകളിലേക്കും വ്യാപിച്ച സാഹചര്യത്തിൽ മൂന്ന് സേനകളും ഒരുമിച്ച് പ്രവർത്തിക്കേണ്ടത് അനിവാര്യമാണെന്നാണ് പ്രതിരോധ വിദഗ്ധരുടെ വിലയിരുത്തൽ.
ചീഫ് ഓഫ് ഡിഫൻസ് സ്റ്റാഫ് (CDS) ജനറൽ എൻ.എസ്. രാജ സുബ്രഹ്മണി തിയറ്റർ കമാൻഡ് പദ്ധതിക്ക് അന്തിമരൂപം നൽകുകയാണ്. മുൻ സി.ഡി.എസ്. ജനറൽ അനിൽ ചൗഹാൻ തയ്യാറാക്കിയ രൂപരേഖയെ അടിസ്ഥാനമാക്കിയാണ് തുടർനടപടികൾ. പ്രധാനമന്ത്രി നരേന്ദ്ര മോദിയുടെ “Jointness, Atmanirbharta, Innovation” എന്ന പ്രതിരോധ കാഴ്ചപ്പാട് നടപ്പാക്കുന്നതിന്റെ പ്രധാന ഭാഗമായാണ് തിയറ്റർ കമാൻഡ് സംവിധാനത്തെ സി.ഡി.എസ്. വിശേഷിപ്പിച്ചിരിക്കുന്നത്.
സി.ഡി.എസ്. നിർദേശം സമർപ്പിച്ച ശേഷം പ്രതിരോധ മന്ത്രാലയത്തിന്റെ അനുമതിയും തുടർന്ന് കാബിനറ്റ് കമ്മിറ്റി ഓൺ സെക്യൂരിറ്റിയുടെ (CCS) അംഗീകാരവും ലഭിച്ചാലേ പദ്ധതി നടപ്പാകൂ. അംഗീകാരം ലഭിച്ചാൽ അമേരിക്കയും ചൈനയും ഉൾപ്പെടെയുള്ള രാജ്യങ്ങളെപ്പോലെ ഏകീകൃത തിയറ്റർ കമാൻഡ് സംവിധാനമുള്ള സൈനിക ശക്തികളുടെ പട്ടികയിലേക്ക് ഇന്ത്യയും എത്തും.
