തിരുവനന്തപുരം: മുൻ മുഖ്യമന്ത്രി വി.എസ്. അച്യുതാനന്ദനെ അനുസ്മരിച്ച് തയ്യാറാക്കിയിരുന്ന ദേശാഭിമാനി വാരാന്തപ്പതിപ്പ് അച്ചടിച്ച ശേഷം വിതരണം ചെയ്തില്ല. വി.എസിന്റെ ഓർമ്മക്കുറിപ്പുകളും അനുസ്മരണ ലേഖനങ്ങളും ഉൾപ്പെടുത്തിയ പ്രത്യേക വാരാന്തപ്പതിപ്പാണ് പ്രസിദ്ധീകരിക്കാൻ തീരുമാനിച്ചിരുന്നത്. എന്നാൽ അച്ചടി പൂർത്തിയായ ശേഷമാണ് പതിപ്പ് വിതരണം ചെയ്യേണ്ടതില്ലെന്ന് തീരുമാനിച്ചത്.
സംഭവവുമായി ബന്ധപ്പെട്ട് ‘സാങ്കേതിക കാരണങ്ങളാൽ വാരാന്തപ്പതിപ്പ് പ്രസിദ്ധീകരിക്കാനായില്ല’ എന്ന അറിയിപ്പാണ് ദേശാഭിമാനി നൽകിയത്. എന്നാൽ അച്ചടിച്ച പതിപ്പ് വിതരണം ചെയ്യാതിരുന്നതിന്റെ യഥാർഥ കാരണം സംബന്ധിച്ച് ഔദ്യോഗിക വിശദീകരണമൊന്നും പുറത്തുവിട്ടിട്ടില്ല.
ഇത് സോഷ്യൽ മീഡിയയിലും രാഷ്ട്രീയ വൃത്തങ്ങളിലും ചർച്ചയാവുകയാണ്. വാരാന്തപ്പതിപ്പ് വിതരണം ചെയ്യാതിരുന്നതിന് പിന്നിലെ സാഹചര്യം സംബന്ധിച്ച് വിവിധ തരത്തിലുള്ള ചർച്ചകൾ ഉയരുന്നുണ്ട്. വി. എസിനെ പതിവ് പോലെ വെട്ടി നിരത്തിയതാണെന്ന് സംശയമാണ് സൈബറിടത്തിൽ ഇടത് അനുകൂലികൾ തന്നെ ഉന്നയിക്കുന്നത്.
