പൂനെ: ബാരാമതി വിമാനത്താവളത്തില് പരിശീലന വിമാനം തകര്ന്നുവീണു. സ്വകാര്യ കമ്പനി പ്രവര്ത്തിപ്പിക്കുന്ന പരിശീലന വിമാനമാണ് അപകടത്തില്പ്പെട്ടത്. ഉച്ചയ്ക്ക് 12.35ഓടെ റണ്വേയില് നിന്ന് അകലെയുള്ള വിമാനത്താവള സമുച്ചയത്തിനുള്ളിലാണ് വിമാനം തകര്ന്നുവീണത്. അപകടത്തില് ആളപായമൊന്നും റിപ്പോര്ട്ട് ചെയ്തിട്ടില്ല. വിമാനത്തിന് ചെറിയ കേടുപാടുകള് സംഭവിച്ചു. അപകടത്തിന്റെ കാരണം സംബന്ധിച്ച് അധികൃതര് അന്വേഷണം ആരംഭിച്ചിട്ടുണ്ട്.
അജിത് പവാര് ഉള്പ്പെടെ അഞ്ച് പേര് കൊല്ലപ്പെട്ട വിമാനാപകടത്തിന് ഏകദേശം ഏഴ് മാസത്തിന് ശേഷമാണ് ബാരാമതിയില് വീണ്ടും പരിശീലന വിമാനം അപകടത്തില്പ്പെടുന്നത്. ഈ വര്ഷം ജനുവരി 28നാണ് ബാരാമതി വിമാനത്താവളത്തിന് സമീപം ലിയര്ജെറ്റ് 45 വിമാനം തകര്ന്നുവീണ് മഹാരാഷ്ട്ര ഉപമുഖ്യമന്ത്രിയും എന്സിപി നേതാവുമായ അജിത് പവാര് ഉള്പ്പെടെ അഞ്ച് പേര് മരിച്ചത്.
രണ്ടാം തവണ ലാന്ഡ് ചെയ്യാന് ശ്രമിക്കുന്നതിനിടെയായിരുന്നു വിമാനം അപകടത്തില്പ്പെട്ടത്. അജിത് പവാറിനൊപ്പം പേഴ്സണല് സെക്യൂരിറ്റി ഓഫീസര്, അറ്റന്ഡന്റ്, പൈലറ്റ്-ഇന്-കമാന്ഡ് സുമിത് കപൂര്, ഫസ്റ്റ് ഓഫീസര് ശംഭവി പഥക് എന്നിവരും വിമാനത്തിലുണ്ടായിരുന്നു.
