ന്യൂയോര്ക്ക്: ഫുട്ബോള് ലോകം ഒരിക്കല് ആഘോഷിച്ച മെസി-സുവാരസ-്നെയ്മര് സഖ്യം വീണ്ടും ഒരുമിക്കുമെന്ന അഭ്യൂഹങ്ങള് ശക്തമാകുന്നു. ബാഴ്സലോണയില് തകര്പ്പന് പ്രകടനങ്ങളിലൂടെ ചരിത്രം സൃഷ്ടിച്ച എംഎസ്എന് ത്രയത്തിലെ നെയ്മര് നിലവില് സാന്റോസിന്റെ താരമാണ്. സാന്റോസുമായുള്ള കരാര് അവസാനിക്കാനിരിക്കെ താരം അമേരിക്കന് ക്ലബായ ഇന്റര് മയാമിയിലേക്ക് ചേക്കേറുമെന്ന റിപ്പോര്ട്ടുകളാണ് പുതിയ ചര്ച്ചകള്ക്ക് വഴിവച്ചത്.
നിലവില് ലയണല് മെസിയും ലൂയിസ് സുവാരസും ഇന്റര് മയാമിക്കായി ഒരുമിച്ച് കളിക്കുന്നുണ്ട്. നെയ്മറും ടീമിലെത്തിയാല് ബാഴ്സലോണയില് തിളങ്ങിയ പഴയ കൂട്ടുകെട്ടിന് 10 വര്ഷത്തിന് ശേഷം വീണ്ടും കളത്തിലൊരുമിക്കാനാകും. 2014 മുതല് 2017 വരെ ബാഴ്സലോണയ്ക്കായി ഒരുമിച്ച് കളിച്ച എംഎസ്എന് സഖ്യം യൂറോപ്യന് ഫുട്ബോളില് വലിയ തരംഗമാണ് സൃഷ്ടിച്ചത്.
2015ലെ ആദ്യ പൂര്ണ സീസണില് മാത്രം മൂവരും ചേര്ന്ന് 122 ഗോളുകള് നേടി. ചാമ്പ്യന്സ് ലീഗ് ഉള്പ്പെടെ ഒന്പത് കിരീടങ്ങള് സ്വന്തമാക്കുന്നതിലും ഇവരുടെ പ്രകടനം നിര്ണായകമായി. 2017ല് അന്നത്തെ റെക്കോര്ഡ് തുകയായ 222 ദശലക്ഷം യൂറോയ്ക്ക് നെയ്മര് പിഎസ്ജിയിലേക്ക് മാറിയതോടെയാണ് സഖ്യം പിരിഞ്ഞത്. ഡിസംബര് 31ന് സാന്റോസുമായുള്ള നെയ്മറിന്റെ കരാര് അവസാനിക്കാനിരിക്കെ, താരത്തിന്റെ അടുത്ത നീക്കമാണ് ഇപ്പോള് ഫുട്ബോള് ലോകം ഉറ്റുനോക്കുന്നത്.
