ലിസ്ബണ്: 2026 ടി20 ലോകകപ്പ് യൂറോപ്പ് റീജിയണല് യോഗ്യതാ മത്സരങ്ങള്ക്കുള്ള പോര്ച്ചുഗല് ടീമിനെ പ്രഖ്യാപിച്ചു. മുന് ഓസ്ട്രേലിയന് ഓള്റൗണ്ടര് മോയിസസ് ഹെന്റിക്വസാണ് ടീമിന്റെ നായകന്. 39കാരനായ ഹെന്റിക്വസ് അടുത്തിടെയാണ് ഓസ്ട്രേലിയന് ആഭ്യന്തര ക്രിക്കറ്റില് നിന്ന് വിരമിച്ചത്. ഓസ്ട്രേലിയക്കായി നാല് ടെസ്റ്റും 16 ഏകദിനങ്ങളും 24 ടി20 മത്സരങ്ങളും കളിച്ചിട്ടുള്ള ഹെന്റിക്വസ് ഐപിഎല്ലിലും ശ്രദ്ധേയ സാന്നിധ്യമായിരുന്നു.
കൊല്ക്കത്ത നൈറ്റ് റൈഡേഴ്സ്, സണ്റൈസേഴ്സ് ഹൈദരാബാദ്, റോയല് ചലഞ്ചേഴ്സ് ബെംഗളൂരു തുടങ്ങിയ ടീമുകള്ക്കായി താരം കളിച്ചിട്ടുണ്ട്. യൂറോപ്പ് സബ് റീജിയണല് യോഗ്യതാ ഗ്രൂപ്പ് ബിയിലാണ് പോര്ച്ചുഗല് മത്സരിക്കുന്നത്. ഇസ്രായേല്, ജര്മനി, ഗ്രീസ്, ചെക്കിയ എന്നിവയാണ് ഗ്രൂപ്പിലെ മറ്റു ടീമുകള്. ഇസ്രായേലിനെതിരെയാണ് പോര്ച്ചുഗലിന്റെ ആദ്യ മത്സരം.
ഗ്രൂപ്പ് ബിയിലെ ജേതാക്കള് ഓഗസ്റ്റ് 21ന് ഗ്രൂപ്പ് എയിലെ ജേതാക്കളുമായി ഫൈനലില് ഏറ്റുമുട്ടും. ഈ മത്സരത്തിലെ വിജയികള് യൂറോപ്യന് റീജിയണല് ഫൈനലിലേക്ക് യോഗ്യത നേടും. സ്കോട്ലന്ഡ്, ഡെന്മാര്ക്ക് എന്നിവ ഉള്പ്പെടുന്ന റീജിയണല് ഫൈനലില് മുന്നിലെത്തുന്ന ടീമിനാണ് 2026 ടി20 ലോകകപ്പിന് യോഗ്യത ലഭിക്കുക. മുന് ഓസ്ട്രേലിയന് താരത്തിന്റെ പരിചയസമ്പത്ത് പോര്ച്ചുഗലിന്റെ ലോകകപ്പ് യോഗ്യതാ പ്രതീക്ഷകള്ക്ക് കരുത്താകുമെന്നാണ് ടീമിന്റെ പ്രതീക്ഷ.