വൈഭവ് സൂര്യവംശിക്ക് പിന്നാലെ പുതിയ കൗമാരതരംഗം കെസിഎല്ലിലും ; മാനവ് കൃഷ്ണയും മുഹമ്മദ് ഇനാനും ഉൾപ്പെടെ യുവതാരങ്ങളിൽ പ്രതീക്ഷ

തിരുവനന്തപുരം: വൈഭവ് സൂര്യവംശി സൃഷ്ടിച്ച കൗമാര വിസ്മയത്തിന്റെ ആവേശം തുടരുന്നതിനിടെ, കേരള ക്രിക്കറ്റ് ലീഗ് (KCL) മൂന്നാം സീസൺ യുവപ്രതിഭകളുടെ വേദിയാകാൻ ഒരുങ്ങുന്നു. ഇന്ത്യൻ അണ്ടർ-19 ടീമംഗങ്ങളടക്കം നിരവധി കൗമാര താരങ്ങളാണ് ഇത്തവണ ലീഗിലെ പ്രധാന ആകർഷണം. മാനവ് കൃഷ്ണ, മുഹമ്മദ് ഇനാൻ, കെ.ആർ. രോഹിത്, അമയ് മനോജ്, ജോബിൻ ജോബി എന്നിവരുടെ പ്രകടനത്തിലേക്കാണ് ക്രിക്കറ്റ് ആരാധകരുടെ ശ്രദ്ധ.

ഇവരിൽ മാനവ് കൃഷ്ണ, മുഹമ്മദ് ഇനാൻ, കെ.ആർ. രോഹിത്, അമയ് മനോജ് എന്നിവർ തൃശൂർ ടൈറ്റൻസിനൊപ്പമാണ് അണിനിരക്കുന്നത്. കഴിഞ്ഞ സീസണിൽ ടീമിനായി അരങ്ങേറ്റം കുറിച്ച കെ.ആർ. രോഹിതിനെ നിലനിർത്തിയ ടൈറ്റൻസ്, മാനവ്, ഇനാൻ, അമയ് എന്നിവരെയും ടീമിലെത്തിച്ചു.

കേരളത്തിന്റെ അണ്ടർ-19 ടീമിനെ നയിച്ച മാനവ് കൃഷ്ണ മികച്ച ബാറ്ററും വിക്കറ്റ് കീപ്പറുമാണ്. രണ്ട് സെഞ്ചുറികളുടെ മികവിൽ ഇന്ത്യൻ അണ്ടർ-19 ടീമിലെത്തിയ താരം, അടുത്തിടെ ശ്രീലങ്കൻ പര്യടനത്തിലും സെഞ്ചുറി നേടി ശ്രദ്ധ നേടിയിരുന്നു. രഞ്ജി ട്രോഫിയിലൂടെ കേരളത്തിന്റെ സീനിയർ ടീമിലും അരങ്ങേറ്റം കുറിച്ച മാനവ് ടൈറ്റൻസിന്റെ പ്രധാന പ്രതീക്ഷകളിലൊരാളാണ്.

ലെഗ് സ്പിന്നർ മുഹമ്മദ് ഇനാൻ ദേശീയ അണ്ടർ-19 ടീമിലും ലോകകപ്പ് സംഘത്തിലും ഇടം നേടിയ താരമാണ്. ഓസ്ട്രേലിയയ്‌ക്കും ഇംഗ്ലണ്ടിനുമെതിരായ പരമ്പരകളിൽ ശ്രദ്ധേയ പ്രകടനം നടത്തിയ ഇനാൻ, ഗൂഗ്ലികളിലൂടെയും ഓൾറൗണ്ട് മികവിലൂടെയും ശ്രദ്ധേയനാണ്. ബാറ്റിങ്ങിലും മികച്ച പ്രകടനം പുറത്തെടുക്കാൻ കഴിയുന്ന താരമെന്ന നിലയിലും ഇനാൻ വിലയിരുത്തപ്പെടുന്നു.

കെ.ആർ. രോഹിത് അതിവേഗ ബാറ്റിങ്ങിലൂടെ ശ്രദ്ധ നേടിയ കൗമാരതാരമാണ്. കഴിഞ്ഞ സീസണിൽ രണ്ട് മത്സരങ്ങളിൽ അവസരം ലഭിച്ച താരം, എൻഎസ്കെ ട്രോഫിയിൽ വെറും 10 പന്തിൽ അഞ്ച് സിക്സും രണ്ട് ഫോറും ഉൾപ്പെടെ 39 റൺസ് നേടി ഫൈനലിലെ താരമായി തിരഞ്ഞെടുക്കപ്പെട്ടിരുന്നു.

കേരളത്തിന്റെ അണ്ടർ-19 ടീമിലെ സ്ഥിരതയാർന്ന ബാറ്റർമാരിൽ ഒരാളായ അമയ് മനോജ്, പഞ്ചാബിനെതിരായ സെഞ്ചുറിയടക്കം നിരവധി മികച്ച ഇന്നിങ്‌സുകൾ കളിച്ചിട്ടുണ്ട്. അടുത്തിടെ സീചെം ട്രോഫിയിലും സെഞ്ചുറി നേടി ടീമിന്റെ കിരീടനേട്ടത്തിൽ നിർണായക പങ്കുവഹിച്ച അമയ്, ബിസിസിഐയുടെ സെന്റർ ഓഫ് എക്സലൻസ് അണ്ടർ-19 ക്യാമ്പിലേക്കും തിരഞ്ഞെടുക്കപ്പെട്ടിട്ടുണ്ട്.

അതേസമയം, കൊച്ചി ടീമിനായി തുടർച്ചയായ മൂന്നാം സീസണിലും ഇറങ്ങുന്ന ജോബിൻ ജോബി ശ്രദ്ധേയ ഓൾറൗണ്ടറാണ്. ആദ്യ സീസണിൽ വെടിക്കെട്ട് ബാറ്റിങ്ങിലൂടെ ശ്രദ്ധ നേടിയ താരം, കഴിഞ്ഞ സീസണിൽ ഫാസ്റ്റ് ബൗളറായും തിളങ്ങി. കുച്ച് ബെഹാർ ട്രോഫിയിൽ ഹൈദരാബാദിനെതിരെ സെഞ്ചുറിയും അഞ്ച് വിക്കറ്റും ഒരേ മത്സരത്തിൽ സ്വന്തമാക്കി ജോബിൻ തന്റെ ഓൾറൗണ്ട് മികവ് തെളിയിച്ചിരുന്നു.

യുവതാരങ്ങളുടെ ഈ ശക്തമായ സാന്നിധ്യം കേരള ക്രിക്കറ്റ് ലീഗിന്റെ മൂന്നാം സീസണിനെ കൂടുതൽ ആവേശകരമാക്കുമെന്ന പ്രതീക്ഷയിലാണ് ക്രിക്കറ്റ് ലോകം.