തിരുവനന്തപുരം: നേപ്പാളിലെ ശക്തമായ മിന്നല്പ്രളയത്തില് കാഞ്ഞങ്ങാട് മുന് എസ്.ഐ. പ്രദീപ് ഉള്പ്പെടെ 36 അംഗ മലയാളി വിനോദസഞ്ചാര സംഘം ദുരന്തമേഖലയില് കുടുങ്ങി. കനത്ത നാശനഷ്ടമുണ്ടായ പ്രദേശത്താണ് സംഘം കുടുങ്ങിയിരിക്കുന്നത്. ഇവര് സുരക്ഷിതരാണെന്നാണ് നിലവില് ലഭിക്കുന്ന വിവരം. മലയാളി സംഘത്തിന്റെ സുരക്ഷയും നിലവിലെ സാഹചര്യവും ഔദ്യോഗികമായി അന്വേഷിക്കുന്നതിനുള്ള നടപടികള് സംസ്ഥാന സര്ക്കാര് ആരംഭിച്ചു. ഇതിന്റെ ഭാഗമായി ചീഫ് സെക്രട്ടറിക്ക് ആവശ്യമായ നിര്ദേശങ്ങള് നല്കിയതായി മുഖ്യമന്ത്രി വി.ഡി. സതീശന് അറിയിച്ചു. വിദേശകാര്യ മന്ത്രാലയവുമായി ബന്ധപ്പെട്ട് തുടര്നടപടികള് സ്വീകരിക്കുമെന്നും മുഖ്യമന്ത്രി വ്യക്തമാക്കി.
അപകടത്തില്പ്പെട്ട ഇന്ത്യന് പൗരന്മാരെ എത്രയും വേഗം സുരക്ഷിതരായി പുറത്തെത്തിക്കുന്നതിനായി നേപ്പാള് സര്ക്കാരുമായി നിരന്തരം ബന്ധപ്പെടുന്നുണ്ടെന്ന് ഇന്ത്യന് എംബസി അറിയിച്ചു. രക്ഷാപ്രവര്ത്തനങ്ങള് ഏകോപിപ്പിക്കുന്നതിനായി നേപ്പാള് അധികൃതരുമായി ചേര്ന്ന് പ്രവര്ത്തനം ശക്തമാക്കിയിട്ടുണ്ട്. ഇന്ത്യന് പൗരന്മാര്ക്ക് സഹായം ലഭ്യമാക്കുന്നതിനായി എംബസി പ്രത്യേക ഹെല്പ്പ് ലൈന് നമ്പറുകളും ഏര്പ്പെടുത്തിയിട്ടുണ്ട്. +977 985 131 6807, +977 970 910 7500 എന്നീ നമ്പറുകളില് ബന്ധപ്പെടാം. രണ്ട് നമ്പറുകളിലും വാട്സ്ആപ്പ് വഴിയും ബന്ധപ്പെടാനാകുമെന്ന് എംബസി അറിയിച്ചു.
