കൊച്ചി: കേരളത്തിലെ നദികളുടെ ആഴം കൂട്ടുകയും കൃത്യമായ ഇടവേളകളിൽ മണൽ നീക്കം നടത്തുകയും ചെയ്യണമെന്ന് ഉപരാഷ്ട്രപതി സി.പി. രാധാകൃഷ്ണൻ. കേരളത്തിൽ വെള്ളപ്പൊക്കം പതിവായി മാറുകയാണെന്നും നഗരപ്രദേശങ്ങളിൽ പോലും പ്രളയജലം കയറുന്ന സാഹചര്യമുണ്ടാകുകയാണെന്നും അദ്ദേഹം ചൂണ്ടിക്കാട്ടി. നദികളുടെ ജലസംഭരണശേഷി കുറയുന്നതാണ് ഇതിന് പ്രധാന കാരണങ്ങളിലൊന്നെന്നും അദ്ദേഹം വ്യക്തമാക്കി.
കേരളത്തിലെ നദികളിൽ കൃത്യമായി മണൽ നീക്കം നടക്കാത്തതാണ് നദികളുടെ ആഴം കുറയാൻ കാരണമാകുന്നതെന്ന് ഉപരാഷ്ട്രപതി പറഞ്ഞു. നദികളിലെ ജലസംഭരണ ശേഷി കുറഞ്ഞാൽ കനത്ത മഴയെത്തുടർന്ന് ഒഴുകിയെത്തുന്ന വെള്ളം ഉൾക്കൊള്ളാൻ കഴിയാത്ത സാഹചര്യമുണ്ടാകും. ‘നദികളുടെ ആഴം കൂട്ടിയില്ലെങ്കിൽ വെള്ളം എങ്ങോട്ട് ഒഴുകിപ്പോകും?’ എന്ന ചോദ്യവും അദ്ദേഹം ഉയർത്തി.
പരിസ്ഥിതി സംരക്ഷണത്തിന്റെ പേരിൽ വികസന പ്രവർത്തനങ്ങളെ പൂർണമായി തടയുന്ന സമീപനം പാടില്ലെന്നും സി.പി. രാധാകൃഷ്ണൻ വ്യക്തമാക്കി. ‘നമ്മൾ പരിസ്ഥിതി ഭ്രാന്തന്മാരാകാൻ പാടില്ല’ എന്നായിരുന്നു അദ്ദേഹത്തിന്റെ പരാമർശം. പരിസ്ഥിതി സംരക്ഷണത്തിനൊപ്പം വികസനവും ഉറപ്പാക്കണം. ഇക്കാര്യങ്ങളിൽ എല്ലാ വിഷയങ്ങളും രാഷ്‌ട്രീയവത്കരിക്കുന്ന സമീപനവും ഒഴിവാക്കണമെന്നും അദ്ദേഹം പറഞ്ഞു.
നദികളിൽ മണൽ നീക്കം ചെയ്യുന്നതിന് കോടതികളുടെ ഇടപെടലുകളാണ് തടസ്സമാകുന്നതെങ്കിൽ, ആവശ്യമായ കാര്യങ്ങൾ കോടതികളെ ബോധ്യപ്പെടുത്തണമെന്നും ഉപരാഷ്ട്രപതി നിർദേശിച്ചു. നദികളുടെ ആഴം കൂട്ടേണ്ടതില്ലെന്ന് വാദിക്കുന്നവരോട് ‘വെള്ളം എങ്ങോട്ട് ഒഴുകിപ്പോകും?’ എന്ന് ചോദിക്കണമെന്നും അദ്ദേഹം പറഞ്ഞു.
കാലാവസ്ഥയിലും മഴയുടെ രീതിയിലും വലിയ മാറ്റമാണ് ഇപ്പോൾ സംഭവിക്കുന്നതെന്നും ഉപരാഷ്ട്രപതി ചൂണ്ടിക്കാട്ടി. നമ്മുടെ കണക്കുകൂട്ടലുകൾക്ക് അപ്പുറത്തുള്ള മഴയാണ് നിലവിൽ ലഭിക്കുന്നത്. ഇത്രയും ശക്തമായ മഴ ലഭിക്കുന്ന സാഹചര്യത്തിൽ വെള്ളം ഒഴുകിപ്പോകാനുള്ള സ്വാഭാവിക സംവിധാനങ്ങൾ കൂടുതൽ കാര്യക്ഷമമാക്കേണ്ടതുണ്ടെന്നതാണ് അദ്ദേഹത്തിന്റെ നിലപാട്.
കേരളത്തിലെ നഗരങ്ങളിൽ പോലും വെള്ളപ്പൊക്കം ആവർത്തിക്കുന്ന സാഹചര്യത്തിൽ നദികളുടെ സംഭരണശേഷി വർധിപ്പിക്കുന്നതും വെള്ളത്തിന്റെ സ്വാഭാവിക ഒഴുക്ക് സുഗമമാക്കുന്നതും അടിയന്തരമായി പരിഗണിക്കേണ്ട വിഷയങ്ങളാണെന്നും ഉപരാഷ്‌ട്രപതിയുടെ നിർദേശങ്ങൾ വ്യക്തമാക്കുന്നു.
