ദുലീപ് ട്രോഫിയില് മിന്നും പ്രകടനവുമായി മലയാളി താരം എംഡി നിധീഷ്. നോര്ത്ത് സോണിനെതിരായ സെമി ഫൈനലില് ഏഴ് വിക്കറ്റുകളാണ് നിധീഷ് സ്വന്തമാക്കിയത്. ആദ്യ ഇന്നിങ്സില് രണ്ട് വിക്കറ്റും രണ്ടാം ഇന്നിങ്സില് അഞ്ച് വിക്കറ്റും വീഴ്ത്തിയ നിധീഷിന്റെ തകര്പ്പന് ബൗളിങ്ങിന്റെ കരുത്തിലാണ് സൗത്ത് സോണ് ഏഴ് വിക്കറ്റിന് നോര്ത്ത് സോണിനെ തകര്ത്ത് ഫൈനലില് പ്രവേശിച്ചത്. നോര്ത്ത് സോണിന്റെ ആദ്യ ഇന്നിങ്സില് ഓപ്പണര് സനത് സാങ്വാന് (10), ഗുര്നൂര് ബ്രാര് (0) എന്നിവരെയാണ് നിധീഷ് പുറത്താക്കിയത്. ബ്രാറിനെ ക്ലീന് ബൗള്ഡാക്കിയാണ് താരം വിക്കറ്റ് നേടിയത്.
രണ്ടാം ഇന്നിങ്സിലും സനത് സാങ്വാന്റെ വിക്കറ്റ് നിധീഷിന് തന്നെ. 148 പന്തില് 76 റണ്സെടുത്ത സാങ്വാനായിരുന്നു നോര്ത്ത് സോണിന്റെ ടോപ് സ്കോറര്. ക്യാപ്റ്റനും വിക്കറ്റ് കീപ്പറുമായ കനയ്യ വാധ്വാന് (14), അന്ഷുല് കാംബോജ് (36), ഗുര്നൂര് ബ്രാര് (7), അര്ഷ്ദീപ് സിങ് (12) എന്നിവരെയും നിധീഷ് മടക്കി. കാംബോജിന്റെയും ബ്രാറിന്റെയും അര്ഷ്ദീപിന്റെയും കുറ്റികള് തെറിപ്പിച്ചായിരുന്നു നിധീഷിന്റെ അഞ്ച് വിക്കറ്റ് നേട്ടം. മത്സരത്തില് ആകെ ഏഴ് വിക്കറ്റുകളുമായി മലയാളി താരം സൗത്ത് സോണിന്റെ വിജയത്തില് നിര്ണായക പങ്കുവഹിച്ചു.
ആദ്യ ഇന്നിങ്സില് നോര്ത്ത് സോണ് 195 റണ്സിന് പുറത്തായി. 182 പന്തില് 76 റണ്സെടുത്ത ഖമ്രാന് ഇഖ്ബാലിന് മാത്രമാണ് നോര്ത്ത് സോണിനായി കാര്യമായ ചെറുത്തുനില്പ്പ് നടത്താനായത്. സൗത്ത് സോണിനായി വിദ്വത് കവീരപ്പ നാല് വിക്കറ്റ് വീഴ്ത്തിയപ്പോള് നിധീഷും തനയ് ത്യാഗരാജനും രണ്ട് വിക്കറ്റ് വീതം നേടി. മറുപടി ബാറ്റിങ്ങില് തിലക് വര്മ്മയുടെ പുറത്താകാതെയുള്ള 116 റണ്സിന്റെ കരുത്തില് സൗത്ത് സോണ് 312 റണ്സെടുത്തു. 250 പന്തില് നിന്നാണ് തിലക് 116 റണ്സെടുത്തത്. ശ്രേയസ് ഗോപാല് 169 പന്തില് 87 റണ്സുമായി മികച്ച പിന്തുണ നല്കി.
രണ്ടാം ഇന്നിങ്സില് നോര്ത്ത് സോണ് 297 റണ്സിന് പുറത്തായി. വീണ്ടും നിധീഷ് പന്തുമായി തിളങ്ങിയതോടെ സൗത്ത് സോണിന് വിജയത്തിലേക്ക് കാര്യമായ ബുദ്ധിമുട്ടുണ്ടായില്ല. വിജയലക്ഷ്യം സൗത്ത് സോണ് മൂന്ന് വിക്കറ്റ് മാത്രം നഷ്ടപ്പെടുത്തി മറികടന്നു. തിലക് വര്മ്മ, ശ്രേയസ് ഗോപാല്, നാരായണ് ജഗദീശന് എന്നിവരുടെ ബാറ്റിങ് മികവും വിദ്വത് കവീരപ്പ, തനയ് ത്യാഗരാജന്, കവുരി സായ് തേജ എന്നിവരുടെ ബൗളിങ് മികവും ചേര്ന്നാണ് സൗത്ത് സോണിന് ഫൈനല് ടിക്കറ്റ് ഉറപ്പിച്ചത്. ആഭ്യന്തര ക്രിക്കറ്റില് സ്ഥിരതയാര്ന്ന പ്രകടനം നടത്തുന്ന നിധീഷിന് നിലവില് 34 വയസാണ്.
പ്രായം ദേശീയ ടീമിലേക്കുള്ള സാധ്യതകള്ക്ക് തിരിച്ചടിയാകുന്നുണ്ടെങ്കിലും, മികച്ച പ്രകടനങ്ങളിലൂടെ ശ്രദ്ധ നേടുകയാണ് താരം. 33-ാം വയസില് ഇന്ത്യന് ടീമില് അരങ്ങേറ്റം കുറിച്ച സാരന്ഷ് ജെയിനിന്റെ ഉദാഹരണം ചൂണ്ടിക്കാട്ടിയാണ് നിധീഷിനും ദേശീയ ടീമിലേക്കുള്ള അവസരം ലഭിക്കുമെന്ന പ്രതീക്ഷ ആരാധകര് പങ്കുവയ്ക്കുന്നത്. ദുലീപ് ട്രോഫി സെമി ഫൈനലിലെ ഏഴ് വിക്കറ്റ് പ്രകടനം അതിനുള്ള ശക്തമായ അവകാശവാദം കൂടിയാണ്.
