അഹമ്മദാബാദ്: അഹമ്മദാബാദിലെ വിവിധ കോടതി സമുച്ചയങ്ങള് ബോംബിട്ട് തകര്ക്കുമെന്ന് ഭീഷണിപ്പെടുത്തിയുള്ള ഇ-മെയില് ലഭിച്ചതായി പൊലീസ്. ഗീകാന്തയിലെ മെട്രോപൊളിറ്റന് കോടതി, ലാല് ദര്വാജ സെഷന്സ് കോടതി ഉള്പ്പെടെയുള്ള കോടതികളെയാണ് ഭീഷണി സന്ദേശത്തില് പരാമര്ശിച്ചതെന്നാണ് വിവരം. സംഭവത്തില് നിലവില് പതിവ് നടപടിക്രമങ്ങള് അനുസരിച്ചുള്ള പരിശോധനകളും അന്വേഷണവും തുടരുകയാണെന്ന് അഹമ്മദാബാദ് പൊലീസ് അറിയിച്ചു.
ഭീഷണി സന്ദേശം ലഭിച്ചതിന് പിന്നാലെ പൊലീസ്, ബോംബ് സ്ക്വാഡ്, അഗ്നിരക്ഷാസേന എന്നിവ സ്ഥലത്തെത്തി പരിശോധന ആരംഭിച്ചു. മുന്കരുതല് നടപടിയുടെ ഭാഗമായി കോടതി കെട്ടിടങ്ങളില് നിന്ന് ആളുകളെ ഒഴിപ്പിച്ച ശേഷമായിരുന്നു പരിശോധന. കെട്ടിടങ്ങളിലും പരിസരത്തും വിശദമായ സുരക്ഷാ പരിശോധന നടത്തി. നിലവില് നടത്തിയ പരിശോധനയില് സംശയാസ്പദമായ വസ്തുക്കളൊന്നും കണ്ടെത്തിയിട്ടില്ലെന്നാണ് പൊലീസ് വൃത്തങ്ങള് വ്യക്തമാക്കുന്നത്. ഭീഷണി സന്ദേശത്തിന്റെ ഉറവിടം കണ്ടെത്താനുള്ള അന്വേഷണവും പുരോഗമിക്കുകയാണ്.
സ്കൂളുകള്, കോളേജുകള്, കോടതികള്, മുനിസിപ്പല് സ്ഥാപനങ്ങള് തുടങ്ങിയ പൊതുസ്ഥാപനങ്ങളെ ലക്ഷ്യമിട്ട് തുടര്ച്ചയായി ഭീഷണി ഇ-മെയിലുകള് ലഭിക്കുന്നതിനിടെയാണ് അഹമ്മദാബാദിലെ കോടതികള്ക്കും ഭീഷണി ലഭിച്ചത്. ഭീഷണി സന്ദേശത്തില് പരാമര്ശിച്ച സ്ഥലങ്ങളിലെല്ലാം സുരക്ഷാ പരിശോധന ശക്തമാക്കിയിട്ടുണ്ട്. അടുത്തിടെ നോയിഡ അതോറിറ്റിക്കും സമാനമായ ഭീഷണി ഇ-മെയില് ലഭിച്ചിരുന്നു. സെക്ടര് 39ലെ ഏഴ് നില കെട്ടിടം ബോംബിട്ട് തകര്ക്കുമെന്നായിരുന്നു സന്ദേശം. തുടര്ന്ന് പൊലീസ്, ഡോഗ് സ്ക്വാഡ് തുടങ്ങിയവര് കെട്ടിടത്തിലും പരിസരത്തും വിശദമായ പരിശോധന നടത്തിയിരുന്നു.
