കോഴിക്കോട്: ഈ വർഷത്തെ പി.പി. മുകുന്ദൻ സേവാ പുരസ്കാരം അട്ടപ്പാടി സ്വാമി വിവേകാനന്ദ മെഡിക്കൽ മിഷൻ ഹോസ്പിറ്റൽ ഡയറക്ടർ ഡോ. വി. നാരായണന്. പൊതുസേവന രംഗത്തെ നിസ്വാർത്ഥ സേവനം പരിഗണിച്ചാണ് പുരസ്കാരം.
അട്ടപ്പാടിയിലെ സാധാരണക്കാർക്കും പ്രത്യേകിച്ച് വനവാസി വിഭാഗങ്ങൾക്കും മികച്ച ആരോഗ്യസേവനം ഉറപ്പാക്കുന്നതിൽ ഡോ. വി. നാരായണൻ നൽകിയ നേതൃത്വവും സമർപ്പണവുമാണ് പുരസ്കാരത്തിന് പരിഗണിച്ചത്. പ്രശസ്തിപത്രവും ഫലകവും 25,000 രൂപയുടെ ക്യാഷ് അവാർഡും അടങ്ങുന്നതാണ് പി.പി. മുകുന്ദൻ സേവാ പുരസ്കാരം.
സെപ്റ്റംബർ 10ന് വൈകിട്ട് നാലിന് കോഴിക്കോട് അളകാപുരിയിൽ നടക്കുന്ന ചടങ്ങിലാണ് പുരസ്കാരം സമർപ്പിക്കുക. പി.കെ. കൃഷ്ണദാസ് അനുസ്മരണ സമ്മേളനം ഉദ്ഘാടനം ചെയ്യും. പി.വി. ചന്ദ്രൻ പുരസ്കാരം സമ്മാനിക്കും.
ശിശുരോഗ വിദഗ്ധനാണ് ഡോ. വി. നാരായണൻ. 2002 ലാണ് അദ്ദേഹം അട്ടപ്പാടിയിലെ വനവാസി സമൂഹങ്ങൾക്കിടയിൽ ആരോഗ്യസേവനം ആരംഭിച്ചത്. തുടക്കത്തിൽ വിദൂര ആദിവാസി ഊരുകളിൽ മെഡിക്കൽ ക്യാമ്പുകൾ സംഘടിപ്പിച്ചായിരുന്നു പ്രവർത്തനം. രോഗികളുടെ എണ്ണം വർധിച്ചതോടെ 2003ൽ പരിമിതമായ രീതിയിൽ അഗളിയിൽ ഒ.പി. വിഭാഗവും ഡിസ്പെൻസറിയും ആരംഭിച്ചു. 2006 ലാണ് സ്വാമി വിവേകാനന്ദ മെഡിക്കൽ മിഷൻ ഹോസ്പിറ്റലിന്റെ പിറവി.
വനവാസി കുടുംബങ്ങൾക്ക് കുറഞ്ഞ ചെലവിൽ ചികിത്സ ലഭ്യമാക്കുന്നതിൽ ഡോ. നാരായണന്റെ പ്രവർത്തനം ശ്രദ്ധ നേടിയിട്ടുണ്ട്. കുറഞ്ഞ നിരക്കിൽ ചികിത്സ നൽകിയതിനാൽ അദ്ദേഹത്തിന് ‘10 രൂപ ഡോക്ടർ’ എന്നും ആശുപത്രിക്ക് ‘10 രൂപ ആശുപത്രി’ എന്നും വിശേഷണമുണ്ട്.
