ന്യൂഡല്ഹി: ഡല്ഹിയിലെ സത്യനികേതനില് കെട്ടിടം തകര്ന്നുവീണുണ്ടായ ദുരന്തത്തില് ജീവന് നഷ്ടപ്പെട്ടവരുടെ കുടുംബങ്ങളെ അനുശോചനം അറിയിച്ച് പ്രധാനമന്ത്രി നരേന്ദ്ര മോദി. സംഭവം അതീവ ദുഃഖകരമാണെന്ന് പ്രധാനമന്ത്രി പറഞ്ഞു. പരിക്കേറ്റവര് വേഗത്തില് സുഖം പ്രാപിക്കട്ടെയെന്നും അദ്ദേഹം ആശംസിച്ചു. സ്ഥലത്ത് രക്ഷാപ്രവര്ത്തനം തുടരുകയാണെന്നും ദുരന്തത്തില്പ്പെട്ടവര്ക്ക് ആവശ്യമായ സഹായങ്ങള് അധികൃതര് നല്കിവരികയാണെന്നും പ്രധാനമന്ത്രിയുടെ ഓഫീസ് അറിയിച്ചു.
കേന്ദ്ര ആഭ്യന്തരമന്ത്രി അമിത് ഷായും സംഭവത്തില് ദുഃഖം രേഖപ്പെടുത്തി. പരിക്കേറ്റവര്ക്ക് സാധ്യമായ എല്ലാ ചികിത്സാ സഹായങ്ങളും ഉറപ്പാക്കുമെന്ന് അദ്ദേഹം വ്യക്തമാക്കി. ഡല്ഹി മുഖ്യമന്ത്രി രേഖ ഗുപ്ത, ഡല്ഹി പോലീസ് കമ്മീഷണര് അനുരാഗ് കുമാര്, ദേശീയ ദുരന്ത നിവാരണ സേന (എന്ഡിആര്എഫ്) ഡയറക്ടര് ജനറല് പിയൂഷ് ആനന്ദ് എന്നിവരുമായി അമിത് ഷാ സംസാരിച്ച് സ്ഥിതിഗതികള് വിലയിരുത്തി.
നിലവില് എന്ഡിആര്എഫിന്റെ രണ്ട് സംഘങ്ങളാണ് സ്ഥലത്ത് രക്ഷാപ്രവര്ത്തനം നടത്തുന്നത്. രണ്ട് സംഘങ്ങളെ അടിയന്തര ആവശ്യത്തിനായി സ്റ്റാന്ഡ്ബൈയില് നിര്ത്തിയിട്ടുണ്ട്. എന്ഡിആര്എഫിന്റെ 70 പരിശീലനം ലഭിച്ച ഉദ്യോഗസ്ഥര് രക്ഷാപ്രവര്ത്തനത്തില് പങ്കെടുക്കുന്നുണ്ട്. കെട്ടിടാവശിഷ്ടങ്ങള്ക്കിടയില് ആളുകളുണ്ടോയെന്ന് കണ്ടെത്താന് പ്രത്യേക ഉപകരണങ്ങളും പരിശീലനം ലഭിച്ച നായകളെയും ഉപയോഗിക്കുന്നുണ്ട്. ലൈഫ് ഡിറ്റക്ടറുകള്, ഹൈഡ്രോളിക് ജാക്കുകള്, കട്ടിങ് ഉപകരണങ്ങള്, ഡയമണ്ട് ചെയിന് സോ, പ്ലാസ്മ കട്ടറുകള് തുടങ്ങിയ ഉപകരണങ്ങളും രക്ഷാപ്രവര്ത്തനത്തിനായി വിന്യസിച്ചിട്ടുണ്ട്.
എന്ഡിആര്എഫിന്റെ 16-ാം ബറ്റാലിയന് കമാന്ഡിങ് ഓഫീസര് സുനില് സിങ്ങും ഓപ്പറേഷന്സ് ഡിഐജി സത്വീന്ദര് സിങ് സൂഡനും സ്ഥലത്തെത്തി രക്ഷാപ്രവര്ത്തനത്തിന് മേല്നോട്ടം വഹിക്കുന്നുണ്ട്. ദൃക്സാക്ഷികളില്നിന്നുള്ള വിവരങ്ങളും രക്ഷാപ്രവര്ത്തനത്തില് ഉപയോഗപ്പെടുത്തുന്നുണ്ട്. കെട്ടിടം തകര്ന്നതിനെ തുടര്ന്ന് നേരത്തെ തന്നെ നിരവധി പേരെ രക്ഷപ്പെടുത്തിയിരുന്നു. സംഭവത്തില് മരണസംഖ്യ മൂന്നായി ഉയര്ന്നതായി അധികൃതര് അറിയിച്ചു. ദുരന്തത്തിന്റെ പശ്ചാത്തലത്തില് രക്ഷാപ്രവര്ത്തനം തുടരുകയാണ്.