ന്യൂഡൽഹി: അമേരിക്കയിലെ ഹിന്ദുസമൂഹത്തിന്റെ സാമൂഹിക സ്വാധീനവും ആത്മവിശ്വാസവും നിർണായകമായ ഘട്ടത്തിലെത്തിയതിന്റെ തെളിവാണ് ആർഎസ്എസ് സർസംഘചാലക് ഡോ. മോഹൻ ഭാഗവതിന്റെ അമേരിക്കൻ സന്ദർശനത്തിന് ലഭിച്ച സ്വീകരണമെന്ന് സോഹോ സ്ഥാപകൻ ശ്രീധർ വെമ്പു. അമേരിക്കയിലെ ഹിന്ദുക്കൾക്ക് ഇനി അവഗണിക്കാനാവാത്ത സാമൂഹിക ശക്തിയായി മാറാൻ കഴിഞ്ഞതിന്റെ അടയാളമാണ് സന്ദർശനവുമായി ബന്ധപ്പെട്ട പരിപാടികളിലെ പങ്കാളിത്തമെന്നും അദ്ദേഹം വിലയിരുത്തി.
അമേരിക്കയിലെ തന്റെ മൂന്ന് പതിറ്റാണ്ടിന്റെ ജീവിതാനുഭവത്തിന്റെ പശ്ചാത്തലത്തിലാണ് ശ്രീധർ വെമ്പുവിന്റെ നിരീക്ഷണം. അമേരിക്കൻ സമൂഹത്തിന്റെ മുഖ്യധാരയിൽ ഹിന്ദുസംസ്കാരത്തോടുള്ള സ്വീകാര്യത കഴിഞ്ഞ വർഷങ്ങളിൽ ഗണ്യമായി വർധിച്ചിട്ടുണ്ടെന്നാണ് അദ്ദേഹം ചൂണ്ടിക്കാട്ടുന്നത്. ക്ലീവ്ലാൻഡിൽ നടക്കുന്ന ത്യാഗരാജാരാധന പോലുള്ള സാംസ്കാരിക പരിപാടികൾക്ക് ലഭിക്കുന്ന വലിയ ജനപങ്കാളിത്തവും ഇതിന്റെ പ്രത്യക്ഷ തെളിവായി അദ്ദേഹം ചൂണ്ടിക്കാട്ടി.
മോഹൻ ഭാഗവതിന്റെ അമേരിക്കൻ സന്ദർശനം അവിടെയുള്ള ഹിന്ദുക്കൾക്ക് ഒരു സുപ്രധാന സന്ദർഭമായിരുന്നുവെന്നും വെമ്പു പറഞ്ഞു. ഒരുകാലത്ത് ‘ഹിന്ദു’, ‘ഹിന്ദി’, ‘ഇന്ത്യൻ’ എന്നീ പദങ്ങൾ പോലും അമേരിക്കൻ സാമൂഹിക സാഹചര്യത്തിൽ തെറ്റിദ്ധരിക്കപ്പെട്ടിരുന്നുവെന്ന് അദ്ദേഹം ഓർമിപ്പിച്ചു. അമേരിക്കയിലെ തന്റെ ആദ്യകാല അനുഭവങ്ങളിൽ ‘ഇന്ത്യൻ’ എന്ന വാക്ക് ഉപയോഗിക്കാൻ പോലും ഭാരതീയ വംശജർ ആശങ്കപ്പെട്ടിരുന്നുവെന്നും അദ്ദേഹം സോഷ്യൽ മീഡിയ കുറിപ്പിൽ വ്യക്തമാക്കി.
അമേരിക്കയിൽ ജനിച്ച ഭാരതീയ വംശജരായ കുട്ടികളുടെ അനുഭവങ്ങൾ പരിശോധിച്ചാൽ ഇന്നുണ്ടായ മാറ്റത്തിന്റെ ആഴം മനസ്സിലാക്കാനാകുമെന്ന് ശ്രീധർ വെമ്പു പറയുന്നു. ഒരു കാലത്ത് ചില കുട്ടികൾ സ്വന്തം സംസ്കാരത്തെയും ധർമത്തെയും അപമാനകരമായ ഒന്നായി കണ്ടിരുന്ന സാഹചര്യമുണ്ടായിരുന്നു.
എന്നാൽ ആ അവസ്ഥയ്ക്ക് വലിയ മാറ്റം സംഭവിച്ചിരിക്കുന്നു. ഭാരതീയ സംസ്കാരത്തെയും പാരമ്പര്യത്തെയും അമേരിക്കൻ സമൂഹം കൂടുതൽ സ്വാഭാവികമായി സ്വീകരിക്കുന്ന സാഹചര്യമാണ് ഇപ്പോൾ രൂപപ്പെട്ടിരിക്കുന്നതെന്നാണ് അദ്ദേഹത്തിന്റെ വിലയിരുത്തൽ.
‘അമേരിക്ക ഭാരതത്തെ സ്വീകരിക്കുകയാണ്’ എന്നതാണ് ഈ മാറ്റത്തിന്റെ സാരമെന്ന് വെമ്പു ചൂണ്ടിക്കാട്ടുന്നു. തഞ്ചാവൂരിലെ ത്യാഗരാജാരാധനയിലേക്ക് എത്തുന്ന ജനക്കൂട്ടത്തേക്കാൾ വലിയ ജനപങ്കാളിത്തമാണ് ഇന്ന് ക്ലീവ്ലാൻഡിലെ ത്യാഗരാജാരാധനാ ആഘോഷത്തിന് ലഭിക്കുന്നതെന്നും അദ്ദേഹം പറഞ്ഞു. അമേരിക്കൻ പൊതുജീവിതത്തിൽ ഭാരതീയ സംസ്കാരം കൂടുതൽ ദൃശ്യമാകുന്നതിന്റെ ഉദാഹരണമായാണ് അദ്ദേഹം ഇതിനെ കാണുന്നത്.
ഡോ. മോഹൻ ഭാഗവതിന്റെ വാക്കുകൾ അമേരിക്കയിലെ ഭാരതീയ സമൂഹത്തിൽ വലിയ ആത്മവിശ്വാസവും അഭിമാനബോധവും സൃഷ്ടിച്ചിട്ടുണ്ടെന്നും വെമ്പു അഭിപ്രായപ്പെട്ടു. അദ്ദേഹത്തിന്റെ അമേരിക്കൻ സന്ദർശനത്തെ കേവലം ഒരു വിദേശ സന്ദർശനമായി ചുരുക്കിക്കാണാനാകില്ലെന്നും അദ്ദേഹം വ്യക്തമാക്കി.
മാഡിസൺ സ്ക്വയറിലെ സമ്മേളനത്തിന് ലഭിച്ച സ്വീകരണം അമേരിക്കൻ സമൂഹത്തിൽ ആത്മവിശ്വാസവും അംഗീകാരവും നേടുന്നതിൽ ഹിന്ദുസമൂഹം എത്രത്തോളം മുന്നേറിയെന്നതിന്റെ സൂചനയാണെന്നും വെമ്പു പറഞ്ഞു.
ഭാരതീയ മൂല്യങ്ങളിൽ ഉറച്ചുനിന്നുകൊണ്ട് തങ്ങളുടെ കർമഭൂമിയായ അമേരിക്കയോടുള്ള ഉത്തരവാദിത്തങ്ങൾ നിറവേറ്റണം എന്ന മോഹൻ ഭാഗവതിന്റെ ആഹ്വാനവും വലിയ തോതിൽ സ്വീകരിക്കപ്പെട്ടതായി അദ്ദേഹം ചൂണ്ടിക്കാട്ടി.
അതോടൊപ്പം, അമേരിക്കയിലെ ഭാരതീയ വംശജർക്ക് അവരുടെ ജന്മഭൂമി ഭാരതമാണെന്ന സർസംഘചാലകന്റെ ഓർമപ്പെടുത്തൽ പ്രവാസി സമൂഹത്തിന് വലിയ ദിശാസൂചകമാണെന്നും ശ്രീധർ വെമ്പു അഭിപ്രായപ്പെട്ടു. ഭാരതീയ വേരുകളിൽ അഭിമാനം നിലനിർത്തിക്കൊണ്ട് അമേരിക്കൻ സമൂഹത്തിന്റെ പുരോഗതിയിൽ സജീവമായി പങ്കാളികളാകണമെന്ന സന്ദേശമാണ് ഇതിലൂടെ മുന്നോട്ടുവയ്ക്കുന്നതെന്നും അദ്ദേഹം വിലയിരുത്തി.
