തൃശ്ശൂർ: പാലാപ്പിള്ളിയിൽ ഹാരിസൺ മലയാളം എസ്റ്റേറ്റിലെ വനിതാ വാച്ചറെ പ്ലാന്റേഷനുള്ളിലെ മരത്തിൽ തൂങ്ങിമരിച്ച നിലയിൽ കണ്ടെത്തി. കുണ്ടായി എസ്റ്റേറ്റിലെ വാച്ചറായ മഞ്ജുഷ (42) ആണ് മരിച്ചത്. ജോലിയുമായി ബന്ധപ്പെട്ട് നേരിട്ട ബുദ്ധിമുട്ടുകളാണ് ആത്മഹത്യയ്ക്ക് കാരണമെന്ന സൂചന നൽകുന്ന കുറിപ്പ് കണ്ടെത്തിയതായാണ് വിവരം.
ഇന്നലെ ജോലിക്കായി മഞ്ജുഷ എസ്റ്റേറ്റിലെത്തിയിരുന്നു. പിന്നീട് ഇവരെ കാണാതായതിനെ തുടർന്ന് നടത്തിയ തിരച്ചിലിലാണ് പ്ലാന്റേഷനുള്ളിലെ മരത്തിൽ തൂങ്ങിയ നിലയിൽ മൃതദേഹം കണ്ടെത്തിയത്.
പ്ലാന്റേഷൻ കോർപ്പറേഷൻ അധികൃതരെ പ്രതിരോധത്തിലാക്കുന്നതാണ് യുവതിയുടെ ആത്മഹത്യ കുറിപ്പ്. ശാരീരിക അവശതകൾ നേരിടുന്ന തനിക്ക് ഡ്യൂട്ടി മാറ്റി നൽകിയെന്നും കടുത്ത സമ്മർദ്ദത്തിലൂടെയാണ് കടന്നു പോകുന്നതെന്നും കുറിപ്പിൽ പറയുന്നു. മാനസികമായി പീഡിപ്പിച്ച മേലുദ്യോഗസ്ഥരുടെ പേരും കത്തിലുണ്ട്.
മഞ്ജുഷയുടെ മരണത്തിന് പിന്നിലെ യഥാർഥ സാഹചര്യം കണ്ടെത്തുന്നതിനായി പൊലീസ് അന്വേഷണം ആരംഭിച്ചിട്ടുണ്ട്. ആത്മഹത്യാക്കുറിപ്പിലെ ആരോപണങ്ങളും ജോലി സംബന്ധമായ സാഹചര്യങ്ങളും പൊലീസ് പരിശോധിക്കും.
മരണവുമായി ബന്ധപ്പെട്ട് കൂടുതൽ അന്വേഷണം പുരോഗമിക്കുകയാണ്. ആരോപണങ്ങളിൽ വ്യക്തത വരുത്തുന്നതിനായി ബന്ധപ്പെട്ടവരുടെ മൊഴികളും പൊലീസ് രേഖപ്പെടുത്തും.