ഇസ്ലാമാബാദ്: മുൻ പ്രധാനമന്ത്രി ഇമ്രാൻ ഖാന്റെ മോചനം ആവശ്യപ്പെട്ട് പാകിസ്ഥാൻ തെഹ്രീകെ ഇൻസാഫ് (പിടിഐ) പ്രഖ്യാപിച്ച പ്രതിഷേധ മാർച്ചിന് മുന്നോടിയായി ഇസ്ലാമാബാദിൽ കനത്ത സുരക്ഷ. സെപ്റ്റംബർ 27ന് നടക്കുന്ന മാർച്ച് തടയാൻ നഗരത്തിലെ പ്രധാന റോഡുകളിലും റെഡ് സോണിലുമടക്കം കണ്ടെയ്നറുകൾ ഉപയോഗിച്ച് ബാരിക്കേഡുകൾ സ്ഥാപിച്ചു. 20,000ലധികം സുരക്ഷാ ഉദ്യോഗസ്ഥരെയും വിന്യസിച്ചിട്ടുണ്ട്.
പിടിഐ പ്രവർത്തകർ തലസ്ഥാനത്തേക്ക് പ്രവേശിക്കുന്നത് തടയാൻ കണ്ടെയ്നറുകൾ വെൽഡ് ചെയ്ത് ബാരിക്കേഡുകളാക്കി മാറ്റിയിരിക്കുകയാണ. മണലും ചരലും നിറച്ച് ഇവ കൂടുതൽ ഭാരമുള്ളതാക്കിയിട്ടുണ്ട്.
ആശുപത്രികൾക്കും ജാഗ്രതാ നിർദേശം
പ്രതിഷേധത്തിനിടെ അടിയന്തര സാഹചര്യമുണ്ടായേക്കാമെന്ന വിലയിരുത്തലിലാണ് ഇസ്ലാമാബാദിലെ ആശുപത്രികൾക്ക് പ്രത്യേക നിർദേശം നൽകിയിരിക്കുന്നത്. കുറഞ്ഞത് 100 യൂണിറ്റ് രക്തം കരുതാനും അടിയന്തര ചികിത്സയ്ക്കായി കിടക്കകൾ ഒഴിച്ചിടാനും നിർദേശിച്ചിട്ടുണ്ട്.
അത്യാവശ്യമല്ലാത്ത ശസ്ത്രക്രിയകൾ മാറ്റിവച്ചതായും ആംബുലൻസ്, മെഡിക്കൽ, മറ്റ് ജീവനക്കാരുടെ അവധികൾ റദ്ദാക്കിയതായും റിപ്പോർട്ടുകളുണ്ട്. നിലവിൽ അവധിയിലുള്ള ജീവനക്കാരോടും തിരിച്ചെത്താൻ നിർദേശം നൽകിയിട്ടുണ്ട്. സെപ്റ്റംബർ 30 വരെ ആശുപത്രികൾ അതീവ ജാഗ്രതയിൽ തുടരും.
പഞ്ചാബിൽനിന്നും സിന്ധിൽനിന്നുമായി 20,000ലധികം പൊലീസുകാരെ ഇസ്ലാമാബാദിൽ വിന്യസിക്കാനാണ് തീരുമാനം. റാവൽപിണ്ടി, അറ്റോക്ക്, ജെലം, മിയാൻവാലി മേഖലകളിലും അർധസൈനിക വിഭാഗങ്ങളെ വിന്യസിക്കും.
ഇമ്രാൻ ഖാന്റെ മൂന്ന് സഹോദരിമാരെയും പിടിഐ നേതാക്കളെയും പ്രവർത്തകരെയും നേരത്തെ കസ്റ്റഡിയിലെടുത്തിരുന്നു. പിടിഐ അധ്യക്ഷൻ ബാരിസ്റ്റർ ഗോഹർ രാജ്യത്തുടനീളം 1,500 പ്രവർത്തകരെ കസ്റ്റഡിയിലെടുത്തതായി ആരോപിച്ചിട്ടുണ്ട്.
ഇമ്രാൻ ഖാന്റെ മോചനത്തിന് പുറമെ ഭരണഘടനാപരമായ അവകാശങ്ങളും നിയമവാഴ്ചയും സംരക്ഷിക്കണമെന്ന ആവശ്യവും പിടിഐ ഉയർത്തുന്നുണ്ട്. ജമാഅത്തെ ഇസ്ലാമി, കർഷക സംഘടനകൾ എന്നിവയും പ്രതിഷേധത്തിന് പിന്തുണ പ്രഖ്യാപിച്ചിട്ടുണ്ട്. അതിനാൽ സെപ്റ്റംബർ 27ന്റെ പ്രതിഷേധം പാകിസ്ഥാൻ ഭരണകൂടത്തിന് നിർണായകമായിരിക്കുകയാണ്.
