ന്യൂയോർക്ക്: ആർട്ടിക് മേഖലയിലെ സുരക്ഷാ സഹകരണം ശക്തമാക്കുന്നതിന്റെ ഭാഗമായി അമേരിക്ക, ഡെൻമാർക്ക്, ഗ്രീൻലാൻഡ് എന്നിവർ തമ്മിൽ ത്രികക്ഷി സുരക്ഷാ കരാറിൽ ഒപ്പുവച്ചു. യുഎൻ ജനറൽ അസംബ്ലി സമ്മേളനത്തോടനുബന്ധിച്ച് ന്യൂയോർക്കിൽ നടന്ന ചടങ്ങിൽ അമേരിക്കൻ പ്രസിഡന്റ് ഡൊണാൾഡ് ട്രംപ്, ഡെൻമാർക്ക് പ്രധാനമന്ത്രി മെറ്റ് ഫ്രെഡറിക്സൺ, ഗ്രീൻലാൻഡ് പ്രധാനമന്ത്രി ജെൻസ്-ഫ്രെഡറിക് നീൽസൺ എന്നിവർ കരാറിൽ ഒപ്പുവച്ചു.
കരാർ പ്രകാരം ഗ്രീൻലാൻഡിലെ അമേരിക്കൻ സൈനിക സാന്നിധ്യം വിപുലീകരിക്കാനും സൈനിക സൗകര്യങ്ങൾ വികസിപ്പിക്കാനും യുഎസിന് കൂടുതൽ അവസരം ലഭിക്കും. ഗ്രീൻലാൻഡിന്റെ തന്ത്രപ്രധാനമായ ആർട്ടിക് സ്ഥാനം കണക്കിലെടുത്താണ് സുരക്ഷാ സഹകരണം ശക്തമാക്കാനുള്ള നീക്കം.
അതേസമയം, ഗ്രീൻലാൻഡിനുമേലുള്ള ഡെൻമാർക്കിന്റെ പരമാധികാരവും ഗ്രീൻലാൻഡ് ജനതയുടെ സ്വയംനിർണയാവകാശവും കരാർ അംഗീകരിക്കുന്നുണ്ട്. അതിനാൽ ഗ്രീൻലാൻഡ് അമേരിക്കയുടെ ഭാഗമാകുന്നതോ ദ്വീപിന്റെ പരമാധികാരം യുഎസിന് കൈമാറുന്നതോ അല്ല കരാറിന്റെ ലക്ഷ്യം.
ഗ്രീൻലാൻഡിൽ അമേരിക്കയുടെ സൈനിക താവളങ്ങളും മറ്റ് പ്രതിരോധ സൗകര്യങ്ങളും വിപുലീകരിക്കുന്നതിനാണ് കരാർ കൂടുതൽ പ്രാധാന്യം നൽകുന്നത്. കരാറിന്റെ ഭാഗമായി നാർസാർസുവാക്കിലും മെസ്റ്റേഴ്സ്വിഗിലും പുതിയ സൈനിക താവളങ്ങൾ സ്ഥാപിക്കുന്നതിനുള്ള പദ്ധതികൾക്കും വഴിയൊരുങ്ങിയതായി റിപ്പോർട്ടുകളുണ്ട്.
അതേസമയം, അമേരിക്കയുടെ എതിരാളികളായ രാജ്യങ്ങൾക്ക് ഗ്രീൻലാൻഡിൽ സൈനിക സാന്നിധ്യം സ്ഥാപിക്കുന്നതിനും തന്ത്രപ്രധാനമായ നിക്ഷേപങ്ങൾ നടത്തുന്നതിനും നിയന്ത്രണമുണ്ടാകും. കരാറിന്റെ ഭാഗമായി നാറ്റോ അംഗരാജ്യങ്ങൾക്കാണ് ഗ്രീൻലാൻഡിൽ സൈനിക താവളങ്ങൾ സ്ഥാപിക്കാനുള്ള അവസരം അനുവദിച്ചിരിക്കുന്നത്.
ഗ്രീൻലാൻഡിനെ സ്വന്തമാക്കാനുള്ള ട്രംപിന്റെ മുൻകാല ആവർത്തിച്ച പ്രസ്താവനകൾക്ക് പിന്നാലെയാണ് പുതിയ സുരക്ഷാ കരാർ രൂപപ്പെട്ടത്. ഗ്രീൻലാൻഡിന്റെ തന്ത്രപ്രധാനമായ സ്ഥാനം ചൂണ്ടിക്കാട്ടി അമേരിക്കൻ ദേശീയ സുരക്ഷയ്ക്ക് ദ്വീപ് നിർണായകമാണെന്നായിരുന്നു ട്രംപിന്റെ നിലപാട്. ഗ്രീൻലാൻഡ് ഏറ്റെടുക്കുന്നതിനുള്ള സാധ്യതയിൽ സൈനിക നടപടിയും തള്ളിക്കളയാത്ത തരത്തിലുള്ള ട്രംപിന്റെ മുൻ പ്രസ്താവനകൾ അമേരിക്കയും യൂറോപ്യൻ സഖ്യകക്ഷികളും തമ്മിൽ നയതന്ത്ര സംഘർഷത്തിനും കാരണമായിരുന്നു.
പുതിയ കരാർ അതേസമയം ഗ്രീൻലാൻഡിന്റെ പരമാധികാരത്തിൽ മാറ്റം വരുത്താതെ അമേരിക്കയുടെ പ്രതിരോധ താൽപര്യങ്ങൾ ഉറപ്പാക്കുന്ന സംവിധാനമായാണ് അവതരിപ്പിക്കപ്പെട്ടിരിക്കുന്നത്. കരാർ ആർട്ടിക് മേഖലയിലെ അമേരിക്ക–ഡെൻമാർക്ക്–ഗ്രീൻലാൻഡ് സുരക്ഷാ സഹകരണത്തിനും നാറ്റോയുടെ വടക്കൻ മേഖലകളിലെ പ്രതിരോധ സംവിധാനത്തിനും പുതിയ ഘടന നൽകുമെന്നാണ് ബന്ധപ്പെട്ട രാജ്യങ്ങൾ വ്യക്തമാക്കുന്നത്.