ജയ്പൂര്: രാജസ്ഥാനിലെ മൂന്ന് പ്രധാന നഗരസഭകളിലും മേയര് സ്ഥാനത്തേക്ക് ബിജെപി. ജയ്പൂര്, ജോധ്പൂര്, കോട്ട മുനിസിപ്പല് കോര്പ്പറേഷനുകളുടെ മേയര് സ്ഥാനങ്ങളാണ് ബിജെപി സ്വന്തമാക്കിയത്. സുനില് കോത്താരി ജയ്പൂര് മേയറായപ്പോള് പ്രസന്നചന്ദ് മേത്ത ജോധ്പൂര് മേയറായി. കോട്ടയില് അനുസൂയ ഗോസ്വാമിയാണ് മേയറായി തെരഞ്ഞെടുക്കപ്പെട്ടത്. 150 അംഗ ജയ്പൂര് മുനിസിപ്പല് കോര്പ്പറേഷനില് 89 വോട്ടുകള് നേടിയാണ് ബിജെപിയുടെ സുനില് കോത്താരി മേയറായത്. കോണ്ഗ്രസ് സ്ഥാനാര്ഥി സുനിത മഹാവറിന് 60 വോട്ടുകള് ലഭിച്ചു. മേയര് തെരഞ്ഞെടുപ്പിന് ആവശ്യമായ ഭൂരിപക്ഷം 76 ആയിരുന്നു. നിലവില് ബിജെപിക്ക് 78 കൗണ്സിലര്മാരും കോണ്ഗ്രസിന് 57 പേരുമാണുള്ളത്.
ജയ്പൂരിന്റെ വികസനത്തിന്റെ ഉത്തരവാദിത്വമാണ് തന്നെ ഏല്പ്പിച്ചിരിക്കുന്നതെന്നും നഗരത്തിന്റെയും പാര്ട്ടി സംഘടനയുടെയും പുരോഗതിക്കായി പ്രവര്ത്തിക്കുമെന്നും കോത്താരി പ്രതികരിച്ചു. പ്രധാനമന്ത്രി നരേന്ദ്ര മോദിയുടെ കാഴ്ചപ്പാടുകളും പദ്ധതികളും ജനങ്ങളിലേക്ക് എത്തിക്കുമെന്നും അദ്ദേഹം പറഞ്ഞു. 100 അംഗ ജോധ്പൂര് മുനിസിപ്പല് കോര്പ്പറേഷനില് ബിജെപി സ്ഥാനാര്ഥി പ്രസന്നചന്ദ് മേത്ത മേയറായി തെരഞ്ഞെടുക്കപ്പെട്ടു. കോണ്ഗ്രസ് സ്ഥാനാര്ഥി രാജേന്ദ്ര സിംഗ് സോളങ്കിയെയാണ് അദ്ദേഹം പരാജയപ്പെടുത്തിയത്. ജോധ്പൂരില് നേരത്തെ ബിജെപിക്ക് 45 കൗണ്സിലര്മാരും കോണ്ഗ്രസിന് 44 പേരുമായിരുന്നു. സ്വതന്ത്രരുടെ പിന്തുണയായിരുന്നു ഇവിടെ നിര്ണായകമായത്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
കോട്ട മുനിസിപ്പല് കോര്പ്പറേഷനില് ബിജെപിയുടെ അനുസൂയ ഗോസ്വാമി 65 വോട്ടുകള് നേടി മേയറായി. കോണ്ഗ്രസ് സ്ഥാനാര്ഥി സുനിത സുമന് 35 വോട്ടുകളാണ് ലഭിച്ചത്. 30 വോട്ടിന്റെ ഭൂരിപക്ഷത്തിലാണ് ബിജെപി സ്ഥാനാര്ഥിയുടെ വിജയം. കോട്ടയില് ബിജെപിക്ക് 57 കൗണ്സിലര്മാരും കോണ്ഗ്രസിന് 39 പേരുമാണുള്ളത്. നാല് സ്വതന്ത്ര കൗണ്സിലര്മാരുമുണ്ട്. ജയ്പൂര്, ജോധ്പൂര്, കോട്ട എന്നിവിടങ്ങളിലെ ഇന്നത്തെ മേയര് തെരഞ്ഞെടുപ്പോടെ രാജസ്ഥാനിലെ നഗരസഭാ തെരഞ്ഞെടുപ്പ് നടപടികളുടെ നിര്ണായക ഘട്ടവും പൂര്ത്തിയായി.