ന്യൂഡൽഹി: കുട്ടികളുടെ സോഷ്യൽ മീഡിയ ഉപയോഗം നിയന്ത്രിക്കുന്നതിന് നിയമപരമായ സുരക്ഷാ സംവിധാനങ്ങൾ ഏർപ്പെടുത്തുന്നത് പരിഗണിക്കാൻ കേന്ദ്ര സർക്കാരിനോട് സുപ്രീംകോടതി. 18 വയസ്സിന് താഴെയുള്ളവർ സ്വതന്ത്രമായി സോഷ്യൽ മീഡിയ അക്കൗണ്ടുകൾ ആരംഭിക്കുന്നതുമായി ബന്ധപ്പെട്ട് ചട്ടങ്ങൾ കൊണ്ടുവരാനാകുമോയെന്ന് പരിശോധിക്കണമെന്നാണ് ചീഫ് ജസ്റ്റിസ് സൂര്യ കാന്ത് അധ്യക്ഷനായ ബെഞ്ച് കേന്ദ്രത്തോട് ആവശ്യപ്പെട്ടത്.
ചീഫ് ജസ്റ്റിസ് സൂര്യ കാന്ത്, ജസ്റ്റിസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് ‘ജസ്റ്റ് റൈറ്റ്സ് ഫോർ ചിൽഡ്രൻ അലയൻസ്’ സമർപ്പിച്ച പൊതുതാൽപര്യ ഹർജി പരിഗണിച്ചത്. കുട്ടികൾക്ക് സോഷ്യൽ മീഡിയയിലും മറ്റ് ഡിജിറ്റൽ പ്ലാറ്റ്ഫോമുകളിലും അക്കൗണ്ടുകൾ സ്വതന്ത്രമായി ആരംഭിക്കാൻ കഴിയുന്ന നിലവിലെ സാഹചര്യത്തിൽ സുരക്ഷാ സംവിധാനങ്ങൾ ആവശ്യമാണെന്നാണ് ഹർജിക്കാരുടെ വാദം.
18 വയസ്സിന് താഴെയുള്ളവർക്ക് രക്ഷിതാക്കളുടെ സമ്മതം
സോഷ്യൽ മീഡിയ പ്ലാറ്റ്ഫോമുകളുടെ സേവന നിബന്ധനകൾ അംഗീകരിക്കുന്നത് കരാർ സ്വഭാവമുള്ള നടപടിയായതിനാൽ, 18 വയസ്സിന് താഴെയുള്ളവർക്ക് ഇന്ത്യൻ നിയമപ്രകാരം സ്വതന്ത്രമായി ഇത്തരം കരാറുകളിൽ ഏർപ്പെടാനാകുമോ എന്ന നിയമപ്രശ്നവും ഹർജിയിൽ ഉന്നയിച്ചിട്ടുണ്ട്. പ്ലാറ്റ്ഫോമുകൾ കുട്ടികളുടെ അക്കൗണ്ടുകൾ അനുവദിക്കുമ്പോൾ മാതാപിതാക്കളുടെയോ നിയമപരമായ രക്ഷിതാക്കളുടെയോ സമ്മതം നിർബന്ധമാക്കണമെന്നാണ് പ്രധാന ആവശ്യം. ആവശ്യമായ സാഹചര്യത്തിൽ രക്ഷിതാവിന്റെ തിരിച്ചറിയൽ പരിശോധനയോ e-KYC സംവിധാനമോ ഏർപ്പെടുത്തണമെന്നും ഹർജിക്കാർ ആവശ്യപ്പെട്ടിട്ടുണ്ട്.
12 മുതൽ 15 വയസ്സുവരെയുള്ള കുട്ടികൾക്ക് പോലും നിലവിൽ സോഷ്യൽ മീഡിയ അക്കൗണ്ടുകൾ എളുപ്പത്തിൽ ലഭിക്കുന്ന സാഹചര്യത്തെക്കുറിച്ച് ജസ്റ്റിസ് ജോയ്മല്യ ബാഗ്ചി ആശങ്ക രേഖപ്പെടുത്തി. സോഷ്യൽ മീഡിയ പ്ലാറ്റ്ഫോമുകളുടെ അംഗത്വ സംവിധാനം ഇന്ത്യയിലെ നിയമപരമായ പ്രായപരിധിയുമായി പൊരുത്തപ്പെടുന്ന തരത്തിൽ ക്രമീകരിക്കേണ്ടതുണ്ടെന്നും അദ്ദേഹം ചൂണ്ടിക്കാട്ടി.
ഐടി നിയമപ്രകാരം ചട്ടങ്ങൾ കൊണ്ടുവരാമോ?
സോഷ്യൽ മീഡിയ പ്ലാറ്റ്ഫോമുകൾ ഇന്ത്യൻ നിയമങ്ങൾ പാലിക്കുന്നുണ്ടെന്ന് ഉറപ്പാക്കാൻ നിലവിലുള്ള ഇൻഫർമേഷൻ ടെക്നോളജി നിയമത്തിന്റെ ചട്ടക്കൂടിൽ നടപടിയെടുക്കാനാകുമോയെന്ന് പരിശോധിക്കണമെന്ന് സുപ്രീംകോടതി കേന്ദ്രത്തോട് ആവശ്യപ്പെട്ടു. ഇത്തരം വ്യവസ്ഥകൾ വെറും മാർഗനിർദേശങ്ങളായി നിൽക്കാതെ നിയമപരമായ പ്രാബല്യമുള്ള ചട്ടങ്ങളുടെ രൂപത്തിലാക്കുന്നതിനെക്കുറിച്ചും ബെഞ്ച് ചോദിച്ചു.
കേന്ദ്ര സർക്കാരിനുവേണ്ടി ഹാജരായ സോളിസിറ്റർ ജനറൽ തുഷാർ മേത്ത വിഷയം പരിശോധിക്കാമെന്ന് കോടതിയെ അറിയിച്ചു. കുട്ടികളുടെ അക്കൗണ്ടുകൾക്ക് രക്ഷിതാക്കളുടെ സമ്മതം ആവശ്യപ്പെടുന്നതടക്കമുള്ള സുരക്ഷാ സംവിധാനങ്ങൾ നിലവിലുള്ള ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ നിയമത്തിന്റെ ചട്ടക്കൂടുമായി ബന്ധപ്പെട്ടതാണോയെന്നും സർക്കാർ പരിശോധിക്കുന്നുണ്ട്. എന്നാൽ ബന്ധപ്പെട്ട ഡാറ്റാ സംരക്ഷണ വ്യവസ്ഥകൾ പ്രാബല്യത്തിൽ വരുന്നതുമായി ബന്ധപ്പെട്ട സമയക്രമവും ഹർജിക്കാർ ചൂണ്ടിക്കാട്ടി.
ഓൺലൈൻ ചൂഷണവും സൈബർ ബുള്ളിയിംഗും
കുട്ടികൾക്ക് മതിയായ സുരക്ഷാ സംവിധാനങ്ങളില്ലാതെ സോഷ്യൽ മീഡിയ ഉപയോഗിക്കാൻ കഴിയുന്നത് ഓൺലൈൻ ഗ്രൂമിങ്, ലൈംഗിക ചൂഷണം, സൈബർ ബുള്ളിയിംഗ്, വ്യക്തിഗത വിവരങ്ങളുടെ ദുരുപയോഗം, പ്രായത്തിന് അനുയോജ്യമല്ലാത്ത ഉള്ളടക്കത്തിലേക്കുള്ള പ്രവേശനം തുടങ്ങിയ അപകടങ്ങളിലേക്ക് നയിക്കാമെന്നാണ് ഹർജിയിലെ വാദം.
കുട്ടികളുടെ ഓൺലൈൻ സുരക്ഷ സംബന്ധിച്ച നിയമപരമായ ചട്ടക്കൂട് ശക്തിപ്പെടുത്തുന്നതിന്റെ ഭാഗമായി വിഷയം സുപ്രീംകോടതി വീണ്ടും പരിഗണിക്കും.
