ന്യൂഡല്ഹി: ട്രാഫിക് നിയമലംഘനങ്ങള്ക്ക് ഈടാക്കാനുള്ള കുടിശ്ശിക ഇ-ചലാന് തുക പിരിച്ചെടുക്കാന് പുതിയ മാര്ഗങ്ങള് പരിഗണിക്കണമെന്ന് സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കും സുപ്രീംകോടതിയുടെ നിര്ദേശം. അടയ്ക്കാത്ത ട്രാഫിക് പിഴ വൈദ്യുതി ബില്ലില് ഉള്പ്പെടുത്തുന്ന കാര്യം പരിഗണിക്കണമെന്നാണ് കോടതിയുടെ നിര്ദേശം. ഇ-ചലാനുകള് നല്കുന്നതില് മാത്രം നടപടികള് ഒതുങ്ങരുതെന്നും പിഴത്തുക ഫലപ്രദമായി പിരിച്ചെടുക്കുന്നതിനാണ് അധികൃതര് ശ്രദ്ധ നല്കേണ്ടതെന്നും ജസ്റ്റിസുമാരായ ജെ.ബി. പര്ദിവാല, കെ.വി. വിശ്വനാഥന് എന്നിവരടങ്ങിയ ബെഞ്ച് നിരീക്ഷിച്ചു.
ഇ-ചലാന് നല്കിയാല് മാത്രം പോരാ, അതിലൂടെ ചുമത്തുന്ന പിഴ എങ്ങനെ ഈടാക്കുമെന്നതാണ് പ്രധാന ചോദ്യമെന്നും കോടതി ചൂണ്ടിക്കാട്ടി. അടയ്ക്കാത്ത ട്രാഫിക് പിഴ വൈദ്യുതി കുടിശ്ശികയ്ക്കൊപ്പം ചേര്ക്കുന്ന സംവിധാനം പരിഗണിക്കണമെന്നാണ് കോടതിയുടെ നിര്ദേശം. വൈദ്യുതി ബില് അടയ്ക്കാത്ത പക്ഷം കണക്ഷന് വിച്ഛേദിക്കപ്പെടാനുള്ള സാഹചര്യമുള്ളതിനാല് കുടിശ്ശിക പിഴ ഈടാക്കാന് ഇത് സഹായിക്കുമെന്ന ആശയമാണ് കോടതി മുന്നോട്ടുവെച്ചത്. ഇ-ചലാന് വഴി 45,000 കോടി രൂപയോളം പിഴ പിരിച്ചെടുക്കാനുണ്ടെന്നും ഇതുവരെ 25,000 കോടി രൂപ മാത്രമാണ് പിരിച്ചെടുത്തതെന്നും സംസ്ഥാനങ്ങളും കേന്ദ്രഭരണ പ്രദേശങ്ങളും കോടതിയെ അറിയിച്ചതിന് പിന്നാലെയാണ് വിവിധ മാര്ഗങ്ങള് പരിഗണിച്ചത്.
കുടിശ്ശികയുള്ള ചലാനുകള് തീര്പ്പാക്കുന്നതുവരെ വാഹനങ്ങളുടെ രജിസ്ട്രേഷന് സര്ട്ടിഫിക്കറ്റ് പുതുക്കുന്നത് തടയുക, ഡ്യൂപ്ലിക്കേറ്റ് ആര്സി അനുവദിക്കാതിരിക്കുക, വാഹന ഉടമസ്ഥാവകാശം മാറ്റുന്നത് തടയുക തുടങ്ങിയ നടപടികളും ചര്ച്ചയായി. പരിവാഹന് പോര്ട്ടലില് കുടിശ്ശികയുള്ള വാഹനങ്ങളെ കരിമ്പട്ടികയില് ഉള്പ്പെടുത്തുന്നതിനും ഉടമസ്ഥാവകാശ കൈമാറ്റം തടയുന്നതിനുമുള്ള നടപടികള് സ്വീകരിക്കണമെന്നും കോടതി നിര്ദേശിച്ചു. ഇത്തരം വാഹനങ്ങളുടെ ഫിറ്റ്നസ്, പൊല്യൂഷന് സര്ട്ടിഫിക്കറ്റുകള് തടഞ്ഞുവെക്കുന്നത്, ഡ്രൈവിംഗ് ലൈസന്സ് പുതുക്കുന്നത് തടയുന്നത്, നിലവിലുള്ള ലൈസന്സുകള് റദ്ദാക്കുന്നതിനുള്ള നടപടികള് സ്വീകരിക്കുന്നത് തുടങ്ങിയ മാര്ഗങ്ങളും കോടതി പരിഗണിച്ചു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ട്രാഫിക് പിഴ അടച്ചിട്ടില്ലെന്ന് മിന്നല് പരിശോധനകളില് കണ്ടെത്തിയാല് ആവശ്യമായ നിയമനടപടികള് സ്വീകരിച്ച് വാഹനം പിടിച്ചെടുക്കുന്നതും പരിഗണിക്കണമെന്ന് കോടതി വ്യക്തമാക്കി. നടപടികള് താഴെത്തട്ടില് ഫലപ്രദമായി നടപ്പാക്കണമെന്നും ബെഞ്ച് നിര്ദേശിച്ചു. 2012ല് കോയമ്പത്തൂര് കേന്ദ്രീകരിച്ചുള്ള ഓര്ത്തോപീഡിക് സര്ജന് എസ്. രാജശേഖരന് സമര്പ്പിച്ച റോഡ് സുരക്ഷാ പൊതുതാല്പ്പര്യ ഹര്ജിയുമായി ബന്ധപ്പെട്ടാണ് ഇ-ചലാന് പിഴ പിരിച്ചെടുക്കല് ഉള്പ്പെടെയുള്ള വിഷയങ്ങള് സുപ്രീംകോടതി പരിഗണിക്കുന്നത്. റോഡ് അപകടങ്ങള് കുറയ്ക്കുന്നതിനും റോഡ് സുരക്ഷാ സംവിധാനങ്ങളും അപകടാനന്തര പരിചരണവും മെച്ചപ്പെടുത്തുന്നതിനുമുള്ള നടപടികളാണ് ഹര്ജിയില് ആവശ്യപ്പെട്ടിരുന്നത്.
