കൊച്ചി: മുതിർന്ന സംഘ പ്രചാരകനും ബാലഗോകുലം മാർഗദർശിയുമായ എം.എ സാർ എന്ന എം.എ കൃഷ്ണൻ അന്തരിച്ചു. 97 വയസ്സായിരുന്നു. പ്രായാധിക്യം മൂലം വിശ്രമജീവിതം നയിക്കുകയായിരുന്നു. ആർഎസ്എസ് സംസ്ഥാന കാര്യാലയമായ കൊച്ചി എളമക്കര മാധവനിവാസിലായിരുന്നു അദ്ദേഹം അന്ത്യനാളുകൾ ചെലവഴിച്ചത്. കേരളത്തിന്റെ സാമൂഹ്യ സാംസ്കാരിക മണ്ഡലത്തില് ആര്എസ്എസിനെ അടയാളപ്പെടുത്തുന്നതില് പ്രമുഖ പങ്കുവഹിച്ച വ്യക്തിത്വമാണ്.
എം. എ സാർ എന്നറിയപ്പെടുന്ന എം. എ കൃഷ്ണൻ 1929 ജനുവരി 17-ന് കൊല്ലം ജില്ലയിലാണ് ജനിച്ചത്. ഐവർകാലയിൽ ശ്രീമംഗലത്ത് പദ്മനാഭന്റെയും മറവുതോട്ടത്തിൽ ലക്ഷ്മിയമ്മയുടെയും മകനായാണ് ജനനം. തിരുവനന്തപുരം സംസ്കൃത കോളേജില്നിന്ന് തര്ക്കശാസ്ത്രത്തില് മഹോപാദ്ധ്യയും പാസായശേഷം കോട്ടയം ജില്ലയിലെ വാഴൂര് ഹൈസ്കൂളില് അധ്യാപകനായി. ഒരു വര്ഷത്തിനുശേഷം രാജിവെച്ച് 1954 ല് പ്രചാരകനായി. ഏഴുപതിറ്റാണ്ടിലധികം നീണ്ട സംഘ ജീവിതത്തിൽ സംസ്ഥാന ബൗദ്ധിക്ക് ശിക്ഷൺ പ്രമുഖ്, സംസ്ഥാന പ്രചാർ പ്രമുഖ് എന്നീ ചുമതലകൾ വഹിച്ചു.
അദ്ദേഹത്തിനറെ പ്രചാരക ജീവിതം കേരളത്തിലെ സംഘപരിവാര് പ്രസ്ഥാനങ്ങളുടെ ചരിത്രമാണ്. 16 വർഷത്തോളം കേസരി വാരികയുടെ പത്രാധിപരായിരുന്നു. ബാലഗോകുലം, തപസ്യ, അന്താരാഷ്ട്ര ശ്രീകൃഷ്ണകേന്ദ്രം തുടങ്ങിയവയുടെ സംഘടനാ സെക്രട്ടറി, മാർഗദർശി എന്നീ നിലയിലും അദ്ദേഹം സേവനം അനുഷ്ഠിച്ചിരുന്നു. ഇതുകൂടാതെ പ്രഗതി ത്രൈമാസിക, അമൃതഭാരതി ബാലസംസ്കാരകേന്ദ്രം എന്നിവ ആരംഭിക്കുന്നതിലും അദ്ദേഹം സുപ്രധാന പങ്കുവഹിച്ചിരുന്നു.
ഏഷ്യയിലെ ഏറ്റവും വലിയ കുട്ടികളുടെ സംഘടനയായ ബാലഗോകുലത്തിന്റെ പിറവിക്ക് മുന്നിലും പിന്നിലും എം. എ സാറിന്റെ കരങ്ങളുണ്ട്. കുഞ്ഞുങ്ങളെ ഭാരതീയത്തനിമയില് നിന്ന് അടര്ത്തിയെടുത്ത് സാംസ്കാരികമായും മതപരമായും അന്യവല്ക്കരിക്കാനുള്ള നിഗൂഢ ശ്രമങ്ങള് ദശകങ്ങളായി കേരളത്തിലുടനീളം നടന്നുവന്നിരുന്നു. അതിനെതിരെ ബാലഗോകുലം എന്ന പ്രസ്ഥാനത്തിലൂടെ പ്രതിരോധം സൃഷ്ടിച്ച വ്യക്തിയാണ് എം.എ സാര്. 1972 ഒക്ടോബറിൽ കോഴിക്കോട് കാരപ്പറമ്പിലാണ് രാജ്യത്തെ ആദ്യ ബാലഗോകുലം യൂണിറ്റ് പ്രവർത്തനമാരംഭിക്കുന്നത്. ‘ശിവാജി ബാലഗോകുലം’ എന്ന പേരിൽ 17 കുട്ടികളുമായാണ് തുടക്കം. ഈ കൂട്ടായ്മ അതിവേഗം പടർന്നുപന്തലിച്ച് ഇന്ന് നാം കാണുന്ന ബാലഗോകുലമായി മാറി. അദ്ദേഹത്തിനറെ ജീവചരിത്രമാണ് ‘ഓരം ചേർന്നു നടന്ന ഒരാൾ’.
