കൊച്ചി: മെസ്സിയെ കേരളത്തിലെത്തിക്കാമെന്ന് വാഗ്ദാനം ചെയ്ത് നടത്തിയ തട്ടിപ്പിൽ മുൻ മുഖ്യമന്ത്രി പിണറായി വിജയനെയും മുൻ ചീഫ് സെക്രട്ടറി എ. ജയതിലകനെയും പ്രത്യേക അന്വേഷണ സംഘം (SIT) ചോദ്യം ചെയ്യും. കൊച്ചി കലൂർ സ്റ്റേഡിയം ആന്റോ അഗസ്റ്റിനും സംഘത്തിനും കൈമാറിയതുമായി ബന്ധപ്പെട്ട നിർണായക ഇടപെടലുകളാണ് അന്വേഷണ സംഘം പരിശോധിക്കുന്നത്.
പിണറായി വിജയൻ മുഖ്യമന്ത്രിയായിരിക്കെ വിളിച്ച യോഗത്തിന് പിന്നാലെയാണ് കലൂർ സ്റ്റേഡിയം റിപ്പോർട്ടർ ബ്രോഡ്കാസ്റ്റിങ് കമ്പനിക്ക് കൈമാറിയതെന്നാണ് അന്വേഷണ സംഘത്തിന്റെ കണ്ടെത്തൽ. സ്റ്റേഡിയം കൈമാറുമ്പോൾ നൽകേണ്ട അഞ്ച് കോടി രൂപയുടെ ഡിപ്പോസിറ്റ് ഒഴിവാക്കാനുള്ള തീരുമാനം മുഖ്യമന്ത്രിയുടെ നേതൃത്വത്തിൽ ചേർന്ന യോഗത്തിലുണ്ടായത്.
തുടർന്ന് അന്നത്തെ ചീഫ് സെക്രട്ടറി എ. ജയതിലകിന്റെ നേതൃത്വത്തിലും കൊച്ചിയിൽ യോഗം ചേർന്നിരുന്നു. ഉന്നത പൊലീസ് ഉദ്യോഗസ്ഥർ ഉൾപ്പെടെയുള്ളവർ പങ്കെടുത്ത യോഗത്തിന് പിന്നാലെയാണ് ആന്റോ അഗസ്റ്റിനും സംഘവും കലൂർ സ്റ്റേഡിയത്തിലെത്തിയത്. ഈ ഇടപെടലുകളുടെ നിയമസാധുതയും അന്വേഷണ സംഘം പരിശോധിക്കുന്നുണ്ട്.
ആന്റോ അഗസ്റ്റിനുമായി ബന്ധപ്പെട്ട മറ്റ് കേസുകളിലും എ. ജയതിലകിന്റെ പേര് ഉയർന്നുവന്നിട്ടുണ്ടെന്നാണ് അന്വേഷണ സംഘത്തിന്റെ വിലയിരുത്തൽ. മെസ്സിയെ കേരളത്തിലെത്തിക്കുന്നതുമായി ബന്ധപ്പെട്ട ഇടപാടിലും ജയതിലക് നിർണായകമായി ഇടപെട്ടോയെന്നാണ് ഇപ്പോൾ പരിശോധിക്കുന്നത്. ആന്റോ അഗസ്റ്റിനും സഹോദരന്മാർക്കും റിപ്പോർട്ടർ ബ്രോഡ്കാസ്റ്റിങ് കമ്പനിക്കും ആവശ്യമായ സഹകരണം നൽകാൻ ജയതിലക് നിർദേശം നൽകിയിരുന്നോയെന്നും അന്വേഷണ സംഘം പരിശോധിക്കും.
പിണറായി വിജയന്റെ ഇടപെടലുകളും അന്വേഷണത്തിന്റെ പരിധിയിലാണ്. കലൂർ സ്റ്റേഡിയം കൈമാറ്റം, ഡിപ്പോസിറ്റ് ഒഴിവാക്കൽ തുടങ്ങിയ തീരുമാനങ്ങളിൽ മുൻ മുഖ്യമന്ത്രിയുടെ പങ്കെന്തായിരുന്നുവെന്നാണ് പ്രധാനമായും പരിശോധിക്കുന്നത്. ഇതിന്റെ ഭാഗമായാണ് പിണറായി വിജയനെ ചോദ്യം ചെയ്യാൻ SIT തീരുമാനിച്ചതെന്നാണ് വിവരം.
കേസിൽ അഴിമതി നിരോധന നിയമപ്രകാരം കേസ് രജിസ്റ്റർ ചെയ്യണമെന്ന ആവശ്യവും ഉയർന്നിട്ടുണ്ട്. മുൻ മന്ത്രി വി. അബ്ദുറഹിമാൻ ഉൾപ്പെടെ അഞ്ച് പേർക്കെതിരെ അഴിമതി നിരോധന നിയമപ്രകാരം കേസെടുക്കണമെന്ന ശുപാർശ ഡിജിപി ആഭ്യന്തര വകുപ്പിന് മുന്നിൽ സമർപ്പിച്ചതായാണ് വിവരം.