ആലപ്പുഴ: കരുവാറ്റയിൽ വയോധികനെ കൊലപ്പെടുത്തി സ്വർണം കവർന്ന കേസിൽ കുറ്റാരോപിതയായ പെൺകുട്ടിക്കും ജാമ്യം. ആലപ്പുഴ ജുവനൈൽ ജസ്റ്റിസ് ബോർഡാണ് ചൊവ്വാഴ്ച ജാമ്യം അനുവദിച്ചത്. കേസിലെ അന്വേഷണം പൂർത്തിയായതും കുറ്റാരോപിതരായ നാലുപേരുടെയും മൊഴിയെടുപ്പും തെളിവെടുപ്പും പൂർത്തിയായതും കണക്കിലെടുത്ത് പ്രോസിക്യൂഷൻ ജാമ്യാപേക്ഷയെ എതിർത്തില്ല.
പ്രത്യേക ഉപാധികളൊന്നും ഏർപ്പെടുത്താതെയാണ് ജാമ്യം അനുവദിച്ചത്. എന്നാൽ പെൺകുട്ടിയെ ഏറ്റെടുക്കാൻ വീട്ടുകാർ തയ്യാറാകാത്തതിനാൽ ജുവനൈൽ ജസ്റ്റിസ് ബോർഡിന്റെ സംരക്ഷണത്തിൽ തന്നെ കുട്ടി തുടരും. കുട്ടിയുടെ വിദ്യാഭ്യാസം ഉൾപ്പെടെയുള്ള കാര്യങ്ങളുടെ ചുമതലയും സർക്കാരിനായിരിക്കും.
കേസിന്റെ അന്വേഷണത്തിന്റെ ഭാഗമായി സംരക്ഷണകേന്ദ്രത്തിൽവച്ച് പെൺകുട്ടിയിൽനിന്ന് നേരത്തെ വിശദമായ വിവരങ്ങൾ ശേഖരിച്ചിരുന്നു. ജില്ലാ പ്രൊബേഷൻ ഓഫീസർ, സൈക്കോളജിസ്റ്റ് ഉൾപ്പെടെയുള്ള വിദഗ്ധരുടെ സാന്നിധ്യത്തിലായിരുന്നു മൊഴിയെടുക്കൽ. ഏകദേശം 7 മണിക്കൂർ 45 മിനിറ്റാണ് പെൺകുട്ടിയിൽനിന്ന് വിവരങ്ങൾ തേടുന്നതിനായി ചെലവഴിച്ചത്.
പെൺകുട്ടിക്കായി ജില്ലാ ലീഗൽ സർവീസ് അതോറിറ്റി ചുമതലപ്പെടുത്തിയ അഭിഭാഷകനാണ് ജാമ്യാപേക്ഷയിൽ ഹാജരായത്.കേസിലെ അന്വേഷണം പൂർത്തിയായ സാഹചര്യത്തിൽ പൊലീസ് ഉടൻ കുറ്റപത്രം സമർപ്പിച്ചേക്കും. ജില്ലാ ജുവനൈൽ ജസ്റ്റിസ് ബോർഡിന് മുമ്പാകെയാണ് കുറ്റപത്രം സമർപ്പിക്കുക.
അതേസമയം, കേസിൽ കുറ്റാരോപിതരായ 16, 17 വയസുള്ള ആൺകുട്ടികളെ മുതിർന്നവരായി പരിഗണിച്ച് കേസ് തുടർനടപടികൾക്കായി ജില്ലാക്കോടതിയിലേക്ക് മാറ്റണമെന്ന ആവശ്യവും പ്രോസിക്യൂഷൻ ഉന്നയിക്കും. 16 വയസിന് മുകളിലുള്ള മൂന്ന് ആൺകുട്ടികളുടെ കേസ് ജില്ലാക്കോടതിയിലേക്ക് മാറ്റണമെന്നാവശ്യപ്പെട്ട് അപേക്ഷ നൽകാനാണ് പ്രോസിക്യൂഷന്റെ നീക്കം.
കേസിലെ കുറ്റാരോപിതരായ ആൺകുട്ടികൾക്ക് നേരത്തെ ജാമ്യം ലഭിച്ചിരുന്നു. തുടർന്ന് ഇവർ വീട്ടുകാർക്കൊപ്പം മടങ്ങിയിരുന്നു.
ഇതോടെ അന്വേഷണത്തിന്റെ പ്രധാനഘട്ടങ്ങൾ പൂർത്തിയാക്കി കുറ്റപത്രം സമർപ്പിക്കുന്ന നടപടികളിലേക്ക് പൊലീസ് കടക്കുകയാണ്. പെൺകുട്ടി നിലവിൽ ജുവനൈൽ ജസ്റ്റിസ് ബോർഡിന്റെ സംരക്ഷണത്തിൽ തുടരുന്നതിനാൽ വിദ്യാഭ്യാസവും മറ്റ് ക്ഷേമകാര്യങ്ങളും സർക്കാർ സംവിധാനത്തിന്റെ മേൽനോട്ടത്തിലായിരിക്കും
