ന്യൂഡല്‍ഹി: ജപ്പാനിലെ ഐച്ചി-നഗോയയില്‍ നടന്ന ഏഷ്യന്‍ ഗെയിംസ് 2026ല്‍ മികച്ച പ്രകടനം കാഴ്ചവെച്ച ഇന്ത്യന്‍ താരങ്ങളെ അഭിനന്ദിച്ച് പ്രധാനമന്ത്രി നരേന്ദ്ര മോദി. 21 സ്വര്‍ണം, 27 വെള്ളി, 37 വെങ്കലം ഉള്‍പ്പെടെ 85 മെഡലുകളാണ് ഇന്ത്യ സ്വന്തമാക്കിയത്. ഏഷ്യന്‍ ഗെയിംസ് ചരിത്രത്തില്‍ ഇന്ത്യയുടെ രണ്ടാമത്തെ മികച്ച മെഡല്‍ നേട്ടമാണിത്. താരങ്ങളുമായി കൂടിക്കാഴ്ച നടത്തിയ പ്രധാനമന്ത്രി അവരുടെ അനുഭവങ്ങള്‍ പങ്കുവെച്ചു. താരങ്ങള്‍ ഒപ്പിട്ട ജഴ്സികളും ഹോക്കി സ്റ്റിക്കും ഷാളും നല്‍കി കായികതാരങ്ങള്‍ മോദിയെ ആദരിച്ചു.
പുരുഷ, വനിതാ ഹോക്കി ടീമുകള്‍ ഒരുപോലെ സ്വര്‍ണം നേടിയതും വനിതാ ഹോക്കി ടീം 44 വര്‍ഷത്തെ കാത്തിരിപ്പ് അവസാനിപ്പിച്ചതും ഇന്ത്യയുടെ നേട്ടങ്ങളില്‍ പ്രധാനമാണെന്ന് മോദി പറഞ്ഞു. ക്രിക്കറ്റില്‍ പുരുഷ, വനിതാ ടീമുകള്‍ തുടര്‍ച്ചയായ രണ്ടാം തവണയും മെഡല്‍ നേടിയതും കബഡിയില്‍ ഇരുടീമുകളും സ്വര്‍ണം സ്വന്തമാക്കിയതും അദ്ദേഹം എടുത്തുപറഞ്ഞു. അമ്പെയ്‌ത്തില്‍ അഞ്ച് സ്വര്‍ണം നേടാനായതും ഷൂട്ടിങ്, ബോക്‌സിങ്, ഗുസ്തി എന്നിവയിലെ മികച്ച പ്രകടനങ്ങളും ശ്രദ്ധേയമായിരുന്നു. ഭാരോദ്വഹനത്തില്‍ 28 വര്‍ഷത്തിനുശേഷം ഇന്ത്യ മെഡല്‍ നേടിയതും പ്രധാനമന്ത്രി പ്രത്യേകം പരാമര്‍ശിച്ചു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ഇന്ത്യ നേടിയ 85 മെഡലുകളില്‍ 38 എണ്ണം വനിതാ താരങ്ങളുടെ സംഭാവനയാണെന്നും ഇതില്‍ 11 സ്വര്‍ണമെഡലുകള്‍ ഉള്‍പ്പെടുന്നുവെന്നും മോദി പറഞ്ഞു. വനിതാ കായികതാരങ്ങളുടെ പ്രകടനത്തെ അദ്ദേഹം പ്രത്യേകം അഭിനന്ദിച്ചു. 1982നുശേഷം ഏഷ്യന്‍ ഗെയിംസ് മാരത്തണില്‍ ഇന്ത്യയ്‌ക്ക് വീണ്ടും മെഡല്‍ നേടാനായത് അഭിമാനകരമാണെന്നും പ്രധാനമന്ത്രി ചൂണ്ടിക്കാട്ടി. മിക്‌സഡ് മാര്‍ഷ്യല്‍ ആര്‍ട്‌സ്, സോഫ്റ്റ് ടെന്നീസ്, ചില സെയിലിങ് ഇനങ്ങള്‍ തുടങ്ങിയ മേഖലകളില്‍ ആദ്യമായി മെഡല്‍ നേടാനായതും ഇന്ത്യന്‍ കായികരംഗത്തിന്റെ വളര്‍ച്ചയുടെ സൂചനയാണെന്ന് അദ്ദേഹം പറഞ്ഞു.