ഏദൻ: യെമനിലെ ഏദനിലുള്ള അൽ മആഷിഖ് പ്രസിഡൻഷ്യൽ കൊട്ടാരത്തിന് നേരെയുണ്ടായ ആക്രമണത്തിൽ രണ്ടുപേർ കൊല്ലപ്പെട്ടു. ആറുപേർക്ക് പരിക്കേറ്റു. ഹൂതി സേനയാണ് ആക്രമണം നടത്തിയതെന്നാണ് റിപ്പോർട്ട്. മന്ത്രിസഭാംഗങ്ങൾ സുരക്ഷിതരാണെന്നും ആരും നഗരം വിട്ടുപോകില്ലെന്നും യുവജനകാര്യ മന്ത്രി നായിഫ് സാലിഹ് അൽ ബക്രി അറിയിച്ചു.
യെമനിലെ ഹൂതി വിമതരും സൗദി അറേബ്യയും തമ്മിലുള്ള സംഘർഷം രൂക്ഷമായിരിക്കെയാണ് പുതിയ ആക്രമണം. ഇതിന് തൊട്ടുമുമ്പ് സൗദിയിലെ ഊർജ അടിസ്ഥാനസൗകര്യങ്ങൾക്കും രാജ്യാന്തര വിമാനത്താവളത്തിനും നേരെ ആക്രമണം നടത്തിയതായി ഹൂതികൾ അവകാശപ്പെട്ടിരുന്നു.
സൗദി അരാംകോ കേന്ദ്രങ്ങളും വിമാനത്താവളവും ലക്ഷ്യമിട്ടെന്ന് ഹൂതികൾ
സൗദി അറേബ്യയിലെ അരാംകോ കേന്ദ്രങ്ങൾക്കും റിയാദിലെ കിങ് ഖാലിദ് രാജ്യാന്തര വിമാനത്താവളത്തിനും നേരെ ബാലിസ്റ്റിക് മിസൈലുകൾ, ക്രൂസ് മിസൈലുകൾ, ഡ്രോണുകൾ എന്നിവ ഉപയോഗിച്ച് ആക്രമണം നടത്തിയതായി ഹൂതി സൈനിക വക്താവ് യഹ്യ സരീ ബുധനാഴ്ച അവകാശപ്പെട്ടു.
യെമനെതിരായ സൗദി ആക്രമണങ്ങൾക്ക് മറുപടിയായാണ് നടപടിയെന്നാണ് ഹൂതികളുടെ വിശദീകരണം. സൗദിയുടെ കിഴക്കൻ പ്രവിശ്യയിലെ അരാംകോ കേന്ദ്രങ്ങൾ, റാസ് തനൂറ റിഫൈനറി, കിങ് ഖാലിദ് രാജ്യാന്തര വിമാനത്താവളം എന്നിവ ലക്ഷ്യമിട്ടതായും സരീ പറഞ്ഞു.
മിസൈലുകൾ തടഞ്ഞതായി സൗദി സഖ്യസേന
സൗദിയുടെ തെക്കുപടിഞ്ഞാറൻ മേഖലയിലെ ഖമീസ് മുശൈത്തിലേക്ക് തൊടുത്തുവിട്ട രണ്ട് ബാലിസ്റ്റിക് മിസൈലുകൾ തടഞ്ഞതായും റിയാദിന് വടക്കായി മൂന്ന് ഡ്രോണുകൾ നിർവീര്യമാക്കിയതായും സൗദിയുടെ നേതൃത്വത്തിലുള്ള സഖ്യസേന അറിയിച്ചു. സാധാരണക്കാർ സുരക്ഷയ്‌ക്കായി മാറിനിൽക്കണമെന്ന് സഖ്യസേനാ വക്താവ് മേജർ ജനറൽ തുർക്കി അൽ മാലിക്കി നിർദേശിച്ചു.
ചെങ്കടൽ വ്യാപാരപാതകളിലും ആശങ്ക
സംഘർഷം രൂക്ഷമാകുന്നത് ഊർജ വിതരണത്തെയും രാജ്യാന്തര സമുദ്രവ്യാപാരത്തെയും ബാധിക്കുമെന്ന ആശങ്ക ശക്തമാക്കിയിട്ടുണ്ട്. രാജ്യാന്തര കപ്പൽഗതാഗതത്തിന് നിർണായകമായ ചെങ്കടലും ബാബ് അൽ മന്ദബ് കടലിടുക്കും ഇതോടെ കൂടുതൽ സുരക്ഷാ ആശങ്കകൾ നേരിടുകയാണ്.
2014-ൽ ഹൂതികൾ യെമന്റെ തലസ്ഥാനമായ സനാ പിടിച്ചെടുത്തതോടെയാണ് രാജ്യത്തെ സംഘർഷം രൂക്ഷമായത്. തുടർന്ന് അന്താരാഷ്‌ട്ര അംഗീകാരമുള്ള സർക്കാരിനെ പിന്തുണച്ച് സൗദിയുടെ നേതൃത്വത്തിലുള്ള സഖ്യസേന 2015-ൽ സൈനിക ഇടപെടൽ ആരംഭിച്ചു.