ന്യൂഡല്ഹി: 2014 ലെ ഇംഗ്ലണ്ട് പര്യടനത്തില് മാഞ്ചസ്റ്ററില് നടന്ന നാലാം ടെസ്റ്റില് ഇന്ത്യന് ക്യാപ്റ്റന് എം എസ് ധോണി ഒത്തു കളിച്ചെന്ന് വെളിപ്പെടുത്തല്. മുന് ടീം മാനേജരായിരുന്ന സുനില് ദേവിന്റേതാണ് ക്രിക്കറ്റ് ലോകത്തെ ഞെട്ടിക്കുന്ന വെളിപ്പെടുത്തല്. ഹിന്ദി ദിനപത്രമായ സണ് സ്റ്റാര് നടത്തിയ ഒളിക്യാമറ ഓപ്പറേഷനിലാണ് ഡല്ഹി ക്രിക്കറ്റ് അസോസിയേഷന് സെക്രട്ടറി കൂടിയായ സുനില് ദേവിന്റെ വെളിപ്പെടുത്തല് പുറത്തുവന്നിരിക്കുന്നത്.
മാഞ്ചസ്റ്റര് ടെസ്റ്റിനു മുന്പ് മഴ പെയ്തിരുന്നു. പിച്ചിന്റെ അവസ്ഥ പരിഗണിച്ച് ടോസ് നേടിയാല് ബൗളിങ് തെരഞ്ഞെടുക്കാനാണ് ടീം മീറ്റിങ്ങില് തീരുമാനിച്ചിരുന്നത്. എന്നാല് എല്ലാവരെയും അദ്ഭുതപ്പെടുത്തിക്കൊണ്ട് ടോസ് ലഭിച്ച ധോണി ബാറ്റിങ് തെരഞ്ഞെടുക്കുകയായിരുന്നു. ധോണിയുടെ ഈ തീരുമാനം ഒത്തുകളിയുടെ ഭാഗമായിരുന്നെന്നും ദേവ് ഉറപ്പുപറയുന്നു.
സംഭവം അന്നത്തെ ബിസിസിഐ അദ്ധ്യക്ഷനായിരുന്ന എന് ശ്രീനിവാസന് നേരിട്ട് അറിയിച്ചിരുന്നു. അദ്ദേഹത്തിന്റെ മുന്നില് വച്ചു തന്നെ ഇത് സംബന്ധിച്ച റിപ്പോര്ട്ട് ടൈപ്പ് ചെയ്ത് നല്കി. എന്നാല് തുടര്നടപടികളൊന്നും ഉണ്ടായില്ല. എന്നാല് ജീവന് ഭീഷണിയുണ്ടാകുമെന്ന ഭയത്താലാണ് താന് ഇക്കാര്യം ഒരു അന്വേഷണ സമിതിക്ക് മുമ്പിലും വെളിപ്പെടുത്താത്തതെന്ന് ദേവ് ടേപ്പില് വ്യക്തമാക്കുന്നുണ്ട്. താന് പറഞ്ഞ കാര്യങ്ങള് പുറത്തായാല് അംഗീകരിക്കില്ലെന്നും ദേവ് സംഭാഷണത്തിനിടെ പറയുന്നുണ്ട്.
അതേസമയം ഐപിഎല് വാതുവെപ്പ് അന്വേഷിക്കുന്ന മുദ്ഗല് കമ്മിറ്റി ദേവിന്റെ വെളിപ്പെടുത്തലുകള് തള്ളിയിട്ടുണ്ട്. ഇക്കാര്യം ബോര്ഡിന് എഴുതി നല്കിയാലേ സ്വീകരിക്കാനാകൂ എന്നും ഒത്തുകളി നടക്കണമെങ്കില് മൂന്നിലേറെ കളിക്കാര് ഉള്പ്പെട്ടിരിക്കണമെന്നും കമ്മിറ്റി വ്യക്തമാക്കി.