ലഖ്‌നൗ: സംസ്ഥാനത്തെ സൂക്ഷ്മ, ചെറുകിട, ഇടത്തരം സംരംഭങ്ങള്‍ കൂടുതല്‍ ശക്തിപ്പെടുത്തുന്നതിനായി ഉത്തര്‍പ്രദേശ് സര്‍ക്കാര്‍ എംഎസ്എംഇ പ്രോത്സാഹന നയം വിപുലീകരിച്ചു. പുതിയ നിക്ഷേപങ്ങള്‍ ആകര്‍ഷിക്കുക, നിലവിലുള്ള സംരംഭങ്ങളെ ശക്തിപ്പെടുത്തുക, തൊഴിലവസരങ്ങള്‍ വര്‍ധിപ്പിക്കുക എന്നിവ ലക്ഷ്യമിട്ടാണ് മുഖ്യമന്ത്രി യോഗി ആദിത്യനാഥിന്റെ നേതൃത്വത്തിലുള്ള സര്‍ക്കാര്‍ പുതിയ ആനുകൂല്യങ്ങള്‍ പ്രഖ്യാപിച്ചത്.
2017-ല്‍ ആരംഭിച്ച് 2022-ല്‍ പുതുക്കിയ നയത്തിലൂടെയാണ് സംസ്ഥാനത്തെ ഏകദേശം 90 ലക്ഷം എംഎസ്എംഇ യൂണിറ്റുകള്‍ക്ക് വിവിധ സാമ്പത്തിക പ്രോത്സാഹനങ്ങള്‍ നല്‍കുന്നത്. രാജ്യത്തെ ആകെ എംഎസ്എംഇ യൂണിറ്റുകളുടെ ഏകദേശം 14 ശതമാനവും ഉത്തര്‍പ്രദേശിലാണുള്ളത്. പരമ്പരാഗത വ്യവസായ കേന്ദ്രങ്ങള്‍ക്ക് പുറത്തുള്ള ബുണ്ടേല്‍ഖണ്ഡ്, പൂര്‍വാഞ്ചല്‍ തുടങ്ങിയ പിന്നാക്ക മേഖലകളില്‍ വ്യവസായ വളര്‍ച്ച പ്രോത്സാഹിപ്പിക്കാനാണ് നയത്തില്‍ കൂടുതല്‍ പ്രാധാന്യം നല്‍കിയിരിക്കുന്നത്.
ഈ മേഖലകളില്‍ സ്ഥാപിക്കുന്ന യൂണിറ്റുകള്‍ക്ക് 25 ശതമാനം വരെ മൂലധന സബ്‌സിഡി ലഭിക്കും. മധ്യാഞ്ചല്‍, പശ്ചിമാഞ്ചല്‍ മേഖലകളിലെ യൂണിറ്റുകള്‍ക്കും വിവിധ നിരക്കുകളില്‍ സബ്‌സിഡി അനുവദിക്കും. വനിതാ സംരംഭകര്‍ക്കും പട്ടികജാതി-പട്ടികവര്‍ഗ വിഭാഗങ്ങളില്‍പ്പെട്ട സംരംഭകര്‍ക്കും രണ്ട് ശതമാനം അധിക പ്രോത്സാഹനവും ലഭിക്കും. മൈക്രോ സംരംഭങ്ങള്‍ക്കായി അഞ്ച് വര്‍ഷം വരെ ടേം ലോണ്‍ പലിശയുടെ 50 ശതമാനം സര്‍ക്കാര്‍ തിരിച്ചുനല്‍കും. ഒരു യൂണിറ്റിന് പരമാവധി 25 ലക്ഷം രൂപ വരെയാണ് ഈ ആനുകൂല്യം.
ബുണ്ടേല്‍ഖണ്ഡ്, പൂര്‍വാഞ്ചല്‍ മേഖലകളില്‍ ഭൂമി രജിസ്‌ട്രേഷനുമായി ബന്ധപ്പെട്ട സ്റ്റാമ്പ് ഡ്യൂട്ടിയില്‍ 100 ശതമാനം വരെ ഇളവും, മറ്റ് മേഖലകളില്‍ 75 ശതമാനം വരെ ഇളവും ലഭിക്കും. കാര്‍ഷിക ഭൂമി വ്യാവസായിക ആവശ്യങ്ങള്‍ക്ക് മാറ്റുമ്പോഴുള്ള ഭൂവിനിയോഗ ഫീസിലും ഇളവുണ്ട്. വാണിജ്യ ഉല്‍പ്പാദനം ആരംഭിച്ചതിന് ശേഷം അഞ്ച് വര്‍ഷം വരെ തൊഴിലുടമയുടെ ഇപിഎഫ് വിഹിതവും സര്‍ക്കാര്‍ തിരിച്ചുനല്‍കും. ആഭ്യന്തര-അന്തര്‍ദേശീയ പേറ്റന്റുകള്‍, ജിയോഗ്രാഫിക്കല്‍ ഇന്‍ഡിക്കേഷന്‍ രജിസ്‌ട്രേഷന്‍, ഐഎസ്ഒ ഉള്‍പ്പെടെയുള്ള ഗുണനിലവാര സര്‍ട്ടിഫിക്കേഷനുകള്‍ എന്നിവയ്‌ക്കും സാമ്പത്തിക സഹായം ലഭിക്കും.
സംരംഭകര്‍ക്ക് അപേക്ഷ നല്‍കാനും സബ്‌സിഡിയുടെ പുരോഗതി വിലയിരുത്താനും ആവശ്യമായ എല്ലാ നടപടികളും MSME1Connect എന്ന ഏകജാലക ഓണ്‍ലൈന്‍ പോര്‍ട്ടല്‍ വഴിയാണ് നടപ്പാക്കുന്നത്. ഇതിലൂടെ നടപടിക്രമങ്ങള്‍ വേഗത്തിലാക്കാനും വിവിധ വകുപ്പുകളിലെ അനാവശ്യ കാലതാമസം ഒഴിവാക്കാനുമാണ് സര്‍ക്കാര്‍ ലക്ഷ്യമിടുന്നത്. കരകൗശല വസ്തുക്കള്‍, കാര്‍പ്പറ്റ്, ഭക്ഷ്യസംസ്‌കരണം, എന്‍ജിനീയറിങ് ഉല്‍പ്പന്നങ്ങള്‍, റെഡിമെയ്ഡ് വസ്ത്രങ്ങള്‍ തുടങ്ങിയ ഉത്തര്‍പ്രദേശിലെ പരമ്പരാഗത വ്യവസായ മേഖലകള്‍ക്കും ഈ പുതിയ നയം ഗുണകരമാകുമെന്നാണ് സര്‍ക്കാര്‍ വിലയിരുത്തല്‍.
