കാലിഫോര്ണിയ: ആപ്പിളിന്റെ ‘ലോ’ ബഡ്ജറ്റ് ഐഫോണ് പുറത്തിറങ്ങി. ഐ ഫോണ് എസ്ഇ എന്ന് പേരിട്ടിരിക്കുന്ന പുതിയ മോഡല് കാലിഫോര്ണിയയിലെ കമ്പനിയുടെ പ്രധാന ക്യാംപസില് നടന്ന ചടങ്ങില് ചീഫ് എക്സിക്യൂട്ടീവ് ടിം കുക്കാണ് പുറത്തിറക്കിയത്. ഏപ്രില് മുതല് ഇന്ത്യയില് എത്തുന്ന ഫോണിന് 39,000 രൂപയ്ക്ക് അടുത്ത് വില വരും എന്നാണ് റിപ്പോര്ട്ട്.
നാലിഞ്ച് വലിപ്പമുള്ള സ്ക്രീനുമായാണ് ഐ ഫോണ് എസ്ഇ തിരിച്ചെത്തിയിരിക്കുന്നത്. വലിപ്പം കുറഞ്ഞെങ്കിലും ഐ ഫോണ് 6എസിന്റെ സോഫ്റ്റ് വെയറാണ് പുതിയ ഫോണിലുണ്ടാവുക. ആപ്പിളിന്റെ A9 എസ്ഒസി M9 മോഷന് കോര് പ്രോസസ്സറാണ് ഇതില് ഉപയോഗിച്ചിരിക്കുന്നത്. 4K റെക്കോഡിങ്ങ് സപ്പോര്ട്ട് ചെയ്യുന്ന 12 എംപി ഐസൈറ്റ് ക്യാമറയാണ് പുതിയ മോഡലിലുള്ളത്. മുന് ക്യാമറ 1.2 എംപിയാണ്. ഐഒഎസ് 9.3യാണ് ഇതിലെ ഓപ്പറേറ്റിംഗ് സിസ്റ്റം.
ബ്ലാക്ക്, മിഡ്നൈറ്റ് ബ്ലൂ എന്നീ കളറുകളില് ലെതർ കെയ്സിനൊപ്പം ലഭ്യമാകുന്ന ഐ ഫോണ് എസ്ഇ ക്ക് 16ജിബി, 64 ജിബി പതിപ്പുകളുണ്ട്.
വലിപ്പം കുറഞ്ഞ ഐ പാഡ് പ്രോയും കമ്പനി പുറത്തിറക്കി. 9.7 ഇഞ്ച് വലിപ്പമുള്ള ടാബ് ലറ്റിന്റെ വില 600 ഡോളര് മുതലാണ്. പുതിയ ആപ്പിള് വാച്ചുകളും ആപ്പിള് മേധാവി ടിം കുക്ക് അവതരിപ്പിച്ചു.