എർട്ടിഗ വിജയിച്ചതോടെ കൂടുതൽ എം പി വികൾ നിരത്തിലിറക്കാനുള്ള തീരുമാനവുമായി മാരുതി സുസുകി മുന്നോട്ടു പോകുന്നു . ജനപ്രിയ മോഡലായ വാഗൺ ആറിന്റെ എം പി വി ( മൾട്ടി പർപ്പസ് വെഹിക്കിൾ ) പതിപ്പ് ഈ വർഷം അവസാനമോ അടുത്ത വർഷം ആദ്യമോ കമ്പനി ലോഞ്ച് ചെയ്യുമെന്നാണ് സൂചന.
വിദേശങ്ങളിലുള്ള വാഗൺ ആർ എം പി വി ഇന്ത്യൻ സാഹചര്യത്തിനനുസരിച്ച് മാറ്റിയെടുക്കാനാണ് കമ്പനി ഒരുങ്ങുന്നത് . അതിനു വേണ്ടി രണ്ട് വാഗൺ ആർ എം പി വികൾ ഇന്ത്യയിലെത്തിച്ചു കഴിഞ്ഞു. 1197 സിസി കെ സീരീസ് പെട്രോൾ എഞ്ചിനൊപ്പം ഡീസൽ പതിപ്പിന് നിശ്ചയിച്ചിരിക്കുന്നത് 1248 സിസി ഡിഡിഐഎസ് എഞ്ചിനാണ് .
എർട്ടിഗയ്ക്ക് തൊട്ട് താഴെ നിൽക്കുന്ന രീതിയിലാണ് വാഗൺ ആർ എം പി വിയെ കമ്പനി അണിയിച്ചൊരുക്കുന്നത് . ഗുജറാത്തിലെ സാനന്ദിലായിരിക്കും നിർമ്മാണം. വാഗൺ ആറിനെക്കാൾ ഒരു ലക്ഷത്തിനപ്പുറം വില പോകില്ലെന്നാണ് കരുതപ്പെടുന്നത്.
നീളം നാല് മീറ്ററിൽ താഴെ നിർത്തുന്നത് കൊണ്ട് നികുതിയിനത്തിൽ വലിയ വ്യത്യാസമുണ്ടാകും . രണ്ട് നിറങ്ങൾ സമന്വയിപ്പിച്ച ഉൾഭാഗം വാഗൺ ആറിനെക്കാൾ മനോഹരമാകും. 5 സ്പീഡ് ഗിയർ ആട്ടോമാറ്റിക്കുമുണ്ടാകാനാണ് സാദ്ധ്യത.
നീളം നാല് മീറ്ററിനുള്ളിൽ നിർത്തിയിരിക്കുന്നതിനാൽ മൂന്നാം വരിയിലെ യാത്ര അത്ര സൗകര്യപ്രദമായിരിക്കില്ല എന്നതാണ് പ്രധാന ന്യൂനത . എർട്ടിഗയേക്കാൾ അര മീറ്ററെങ്കിലും നീളം കുറവായിരിക്കും വാഗൺ ആർ എം പി വിക്ക് .
സ്വാഭാവികമായും കൂടുതൽ ലഗ്ഗേജ് സ്പെയ്സ് ലഭിക്കുമെന്നല്ലാതെ യഥാർത്ഥ 7 സീറ്ററിന്റെ ഗുണം ലഭിക്കില്ല . എങ്കിലും മാരുതിയുടെ വിശ്വാസ്യതയും വിലക്കുറവും വാഗൺ ആർ എം പി വിയെ ജനപ്രിയമാക്കുമെന്ന് തന്നെയാണ് കമ്പനി പ്രതീക്ഷിക്കുന്നത് .