മെസഞ്ചറിലൂടെ പണമിടപാടകള് നടത്താനുള്ള സംവിധാനവുമായി ഫേസ്ബുക്ക്. ഇതിനായി പേപാലുമായി സഹകരിച്ച് പുതിയ സംവിധാനമൊരുക്കിയിരിക്കുകയാണ് ഫേസ്ബുക്ക്. ഫേസ്ബുക്കിന്റെ മെസഞ്ചിംഗ് ആപ്ലിക്കേഷനായ മെസഞ്ചര് വഴിയാണ് പണമിടപാടിനുള്ള സംവിധാനം ഒരുക്കിയിരിക്കുന്നത്.
ഏപ്രിലില് മെസഞ്ചര് ഉപഭോക്താക്കള്ക്കായി മെസഞ്ചറില് അവതരിപ്പിച്ച ചാറ്റ്ബോട്ട്സ് സംവിധാനത്തില് പേമെന്റ് നടത്താനാകുമായിരുന്നെങ്കിലും അതിനായി മറ്റ് വെബ്സൈറ്റുകളിലേക്ക് പോകണമായിരുന്നു. വിവിധ ബിസിനസ് സംരംഭങ്ങളുമായി സംവദിക്കുന്നതിനും അവരില് നിന്നുള്ള പുതിയ വിവരങ്ങള് അറിയുന്നതിനും ഉപഭോക്താക്കളെ സഹായിക്കുന്ന സംവിധാനമായിരുന്നു ചാറ്റ് ബോട്ട്സ്.
മെസഞ്ചര് പുതിയ വെര്ഷനിലാണ് പേമെന്റ് സംവിധാനം പ്രവര്ത്തിക്കുന്നത്. ഇനി മുതല് ബൈ നൗ എന്ന ബട്ടണ് വഴി സംവിധാനം ഉപയോഗിയ്ക്കാനാവും. പേപാല് വഴി നടത്തുന്ന ഇടപാടുകളുടെ നോട്ടഫിക്കേഷന് ലഭ്യമാകുന്ന സംവിധാനവും പുതിയ മെസഞ്ചറിലുണ്ട്. നിലവില് യുഎസില് മാത്രം ലഭ്യമാകുന്ന പുതിയ സംവിധാനം ഉടന് തന്നെ മറ്റ് രാജ്യങ്ങളിലേക്കും വ്യാപിപ്പിക്കാനുള്ള തയ്യാറെടുപ്പിലാണ് ഫേസ്ബുക്ക് അധികൃതര്.
