ന്യൂഡല്ഹി: പിന്വലിച്ച 500 ന്റെയും 1000 ത്തിന്റെയും നോട്ടുകള്ക്ക് പകരമായി സര്ക്കാര് പുറത്തിറക്കിയ പുതിയ 500 ന്റെയും 2000 ത്തിന്റെയും നോട്ടുകള് പൊതുജനങ്ങള്ക്ക് വിതരണം ചെയ്തു തുടങ്ങി. ബാങ്കുകളിലും മുഖ്യ പോസ്റ്റ് ഓഫീസുകളും വഴിയാണ് നോട്ടുകള് വിതരണം ചെയ്യുന്നത്.ജനങ്ങള്ക്ക് ബുദ്ധിമുട്ടുണ്ടാകാതെ നോട്ടുകള് മാറാന് വിപുലമായ സൗകര്യങ്ങളാണ് ബാങ്കുകളില് ഒരുക്കിയിരിക്കുന്നത്.
രാവിലെ ബാങ്കുകള് തുറന്നുപ്രവര്ത്തിക്കുന്നതിന് മുന്പ് തന്നെ പല ശാഖകളിലും നോട്ടുകള് മാറാന് എത്തിയവരുടെ നീണ്ടനിര ദൃശ്യമായിരുന്നു. രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐ ഉള്പ്പെടെ തിരക്കേറിയ ശാഖകളില് ബാങ്കുകളോട് ചേര്ന്ന് പ്രത്യേക പന്തലുകള് സജ്ജീകരിച്ചിട്ടുണ്ട്. നോട്ടുകള് മാറാന് വരുന്നവര്ക്ക് ഇവിടെ സജ്ജീകരിച്ചിരിക്കുന്ന കൗണ്ടറുകളില് നിന്നും പഴയ കറന്സികള് മാറ്റിയെടുക്കാം. ബാങ്കിന്റെ മറ്റ് സാധാരണ പ്രവര്ത്തനങ്ങള് തടസപ്പെടാതിരിക്കാന് വേണ്ടിയും നോട്ടുകള് മാറാന് വരുന്നവരുടെ തിരക്കും കണക്കിലെടുത്താണ് നടപടി.
വിതരണം ചെയ്യാനുളള പുതിയ നോട്ടുകള് രാജ്യത്തെ എല്ലാ ബാങ്ക് ശാഖകളിലും ഇന്നലെ തന്നെ എത്തിച്ചിരുന്നു. ഇതിന് വേണ്ട തയ്യാറെടുപ്പുകള് ജീവനക്കാര്ക്ക് നടത്താനായി ഇന്നലെ ബാങ്കുകള്ക്ക് അവധി നല്കുകയും ചെയ്തിരുന്നു. പോസ്റ്റ് ഓഫീസുകളിലും നോട്ടുകള് മാറിയെടുക്കാന് എത്തുന്നവരുടെ തിരക്ക് അനുഭവപ്പെടുന്നുണ്ട്.