കൊച്ചി: മലയാള സിനിമ പ്രതിസന്ധിയുമായി ബന്ധപ്പെട്ട് തിയറ്റര് ഉടമകള് രണ്ട് തട്ടില്. പഴയ നിരക്കില് സിനിമ പ്രദര്ശിപ്പിക്കാന് തയാറാണെന്നു ബി, സി ക്ലാസ് തിയറ്റര് ഉടമകള് വ്യക്തമാക്കി. ഇക്കാര്യത്തില് നിര്മാതാക്കളുമായി സഹകരിക്കാന് തയാറാണെന്നും ഫിലിം എക്സിബിറ്റേഴ്സ് അസോസിയേഷന് അറിയിച്ചു. നിലവിലെ പ്രതിസന്ധിക്ക് കാരണം ലിബര്ട്ടി ബഷീറിന്റെ പിടിവാശിയാണെന്നും അസോസിയേഷന് ആരോപിച്ചു.
തിയറ്റര് വിഹിതത്തിന്റെ 50 ശതമാനം വേണമെന്ന തിയറ്റര് ഉടമകളുടെ ആവശ്യം വിതരണക്കാരും നിര്മാതാക്കളും തള്ളിയതാണ് പ്രതിസന്ധിക്ക് കാരണം. പ്രശ്നം പരിഹരിക്കുന്നതിനായി മന്ത്രി എ.കെ ബാലന്റെ നേതൃത്വത്തില് ചര്ച്ചകള് നടന്നെങ്കിലും പരിഹാരം ഉണ്ടായില്ല.
സമരം തുടരുന്നത് ഫിലിം എക്സിബിറ്റേഴ്സ് ഫെഡറേഷന്റെയും ലിബര്ട്ടി ബഷിറിന്റെയും പിടിവാശി മൂലമാണെന്നും 50 ശതമാനം കളക്ഷന് വേണമെന്ന ഫെഡറേഷന്റെ നിലപാട് ശരിയല്ലെന്നും എക്സിബിറ്റേഴ്സ് അസോസിയേഷന് വ്യക്തമാക്കി. ഫിലിം എക്സിബിറ്റേഴ്സ് ഫെഡറേഷന് പ്രസിഡന്റാണ് ലിബര്ട്ടി ബഷീര്.
അതേസമയം പ്രതിസന്ധി രൂക്ഷമായ സാഹചര്യത്തില് എ ക്ലാസ് തിയ്യറ്ററുകള് അടച്ചിട്ടേക്കുമെന്നും റിപ്പോര്ട്ടുണ്ട്. 10ന് കൊച്ചിയില് ചേരുന്ന എ ക്ലാസ് തിയറ്റര് ഉടമകളുടെ ജനറല് ബോഡി യോഗത്തില് ഇത് സംബന്ധിച്ച് തീരുമാനമുണ്ടായേക്കും. കഴിഞ്ഞ ദിവസം മുഖ്യമന്ത്രി പിണറായി വിജയനുമായി ലിബര്ട്ടി ബഷീര് ചര്ച്ച നടത്തിയിരുന്നു.
