ഹൈദരാബാദ്: ഐ.പി.എല്ലില്‍ ഇന്ന് സണ്‍റൈസേഴ്‌സ് ഹൈദരാബാദും രാജസ്ഥാന്‍ റോയല്‍സും ഏറ്റുമുട്ടും. ഹൈദരാബാദ് രാജീവ് ഗാന്ധി അന്താരാഷ്‌ട്ര സ്‌റ്റേഡിയത്തില്‍ രാത്രി എട്ടിനാണ് മത്സരം.
ഒത്തുകളി വിവാദത്തില്‍ പെട്ട് രണ്ട് വര്‍ഷത്തെ വിലക്കിന് ശേഷമുള്ള തിരിച്ചുവരവ് ഗംഭീരമാക്കാനുള്ള ഒരുക്കങ്ങള്‍ രാജസ്ഥാന്‍ റോയല്‍സ് നടത്തിക്കഴിഞ്ഞു. മികച്ച താരങ്ങളെ ഉള്‍പ്പെടുത്തി കരുത്തുറ്റ നിരയുമായാണ് രാജസ്ഥാന്റെ മടങ്ങിവരവ്. ക്യാപ്റ്റനായിരുന്ന സറ്റീവ് സ്മിത്ത് പന്ത് ചുരണ്ടല്‍ വിവാദത്തില്‍ പെട്ട് വിലക്കിലായ സാഹചര്യത്തില്‍ അജിങ്ക്യ രഹാനേയാണ് നായകസ്ഥാനത്ത്.
12.5 കോടി രൂപയ്‌ക്ക് ലേലത്തില്‍ പിടിച്ച ലോകത്തെ ഏറ്റവും മികച്ച ഓള്‍റൗണ്ടര്‍മാരില്‍ ഒരാളായ ബെന്‍ സ്‌റ്റോക്‌സാണ് ടീമിലെ പ്രധാന ആകര്‍ഷണം. വെടിക്കെട്ട് ബാറ്റ്‌സ്മാന്‍ ഡാര്‍സി ഷോര്‍ട്ടും, രഹാനേയും, സഞ്ജു സാംസണും, ഹെന്റിക് ക്ലാസനും, ബെന്‍ സറ്റോക്‌സും അടങ്ങുന്ന നിരയ്‌ക്ക് ഏത് സ്ഥാനത്തും ബാറ്റ് ചെയ്യാന്‍ സാധിക്കുമെന്നതാണ് പ്രത്യേകത. ജയ്‌ദേവ് ഉനദ്ഘട്, ധാവല്‍ കുല്‍ക്കര്‍ണി, ബെന്‍ ലാഫ്‌ലിന്‍ എന്നിവര്‍ക്കൊപ്പം സറ്റോക്‌സ് കൂടി ചേരുമ്പോള്‍ ബൗളിംഗ് വകുപ്പും അത്യുഗ്രന്‍. മലയാളി സ്പിന്നര്‍ എസ്.മിഥുനും ടീമില്‍ ഉണ്ട്.
മറുവശത്ത് കെയിന്‍ വില്യംസണ്‍ നയിക്കുന്ന സണ്‍റൈസേഴ്‌സ്, മികച്ച ബാറ്റ്‌സ്മാന്‍മാരും കഴിവ് തെളിയിച്ച ഓള്‍റൗണ്ടര്‍മാരും ഉള്‍പ്പെടുന്ന ടീമിനെയാണ് കളത്തിലിറക്കുന്നത്. ശിഖര്‍ ധവാന്‍, മനീഷ് പാണ്ഡെ, ഷക്കീബ് അല്‍ ഹസന്‍, യൂസഫ് പഠാന്‍ എന്നിവര്‍ മാച്ച് വിന്നര്‍മാരാണ്. ഭൂവനേശ്വര്‍ കുമാര്‍ ചുക്കാന്‍ പിടിക്കുന്ന ബൗളിംഗ് നിരയില്‍ മറ്റ് പരിചയസമ്പന്നരുടെ അഭാവം നേരിയ കുറവായേക്കും. വിലക്കിനെ തുടര്‍ന്ന് കളത്തിന് പുറത്തായ വാര്‍ണര്‍ക്ക് പകരം കിവീസ് താരം അലക്‌സ് ഹെയില്‍സാണ് ടീമിലെത്തിയത്. മലയാളി താരങ്ങളായ ബേസില്‍ തമ്പിയും സച്ചിന്‍ ബേബിയും ടീമിലുണ്ട്.
