മുംബൈ: കാവേരി വിഷയത്തില്‍ പ്രതിഷേധങ്ങളെ തുടര്‍ന്ന് പ്രതിസന്ധിയിലായ ചെന്നൈ സൂപ്പര്‍ കിങ്‌സിന്റെ ഐപിഎല്‍ മത്സരങ്ങള്‍ ഇനി പൂനെയില്‍ നടക്കും. ഐപിഎല്‍ ചെയര്‍മാന്‍ രാജീവ് ശുക്ലയാണ് തീരുമാനം അറിയിച്ചത്.
പുതിയ വേദികളുടെ കൂട്ടത്തില്‍ കാര്യവട്ടം ഗ്രീന്‍ ഫീല്‍ഡ് സ്റ്റേഡിയവും പരിഗണനയില്‍ ഉണ്ടായിരുന്നു. എന്നാല്‍ മത്സരം പൂനെയിലേക്ക് മാറ്റുകയായിരുന്നു. ചെന്നൈക്ക് രണ്ട് ഹോം ഗ്രൗണ്ട് മത്സരങ്ങളാണ് ഇനി ബാക്കിയുള്ളത്. ഇതാണ് പൂനെയില്‍ നടത്തുന്നത്.
കഴിഞ്ഞ ദിവസം നടന്ന കൊല്‍ക്കത്ത നൈറ്റ് റൈഡേഴ്‌സിനെതിരായ മത്സരത്തില്‍ സ്റ്റേഡിയത്തിന് അകത്തും പുറത്തും വലിയ പ്രതിഷേധം അരങ്ങേറിയിരുന്നു. തുടര്‍ന്ന് പ്രതിഷേധക്കാരെ അറസ്റ്റ് ചെയ്യുകയും മത്സരത്തിന് കനത്ത സുരക്ഷ ഒരുക്കുകയും ചെയ്തിരുന്നു. എന്നിട്ടും പ്രതിഷേധം ശക്തമായ സാഹചര്യത്തിലും തുടര്‍ന്ന് സുരക്ഷയൊരുക്കാന്‍ കഴിയില്ലെന്നും അറിയിച്ച സാഹചര്യത്തിലാണ് വേദി മാറ്റാന്‍ തീരുമാനമായത്.
