ഹൈദരാബാദ്: ഈ സീസണില് ഫോമില് കളി തുടരുന്ന ചെന്നൈ സൂപ്പര് കിംഗ്സും സണ്റൈസേഴ്സ് ഹൈദരാബാദും ഇന്ന് ഏറ്റുമുട്ടുമ്പോള് തീപാറുന്ന മത്സരം കാണികള്ക്ക് പ്രതീക്ഷിക്കാം. ഇരു ടീമും നാല് മത്സരങ്ങളില് മൂന്നെണ്ണം വീതം ജയിച്ച് മികച്ച നിലയിലാണ്. ചെന്നൈ സൂപ്പര് കിംഗ്സിന്റെ ബാറ്റിംഗ് നിരയും സണ്റൈസേഴ്സ് ഹൈദരാബാദിന്റെ ബൗളര്മാരും തമ്മിലുള്ള പോരാട്ടമായിരിക്കും ഇന്ന് ഹൈദരാബാദില് നടക്കുക. ഇതില് വിജയം നേടുന്നവര്ക്ക് അനുകൂലമാവും മത്സരഫലവും എന്നാണ് വിലയിരുത്തല്.
ഭുവനേശ്വര് കുമാര്, സിദ്ധാര്ത്ഥ് കൗള്, ബെന് സ്റ്റാന്ലേക്ക്, ഷക്കീബ് അല് ഹസ്സന്, റഷീദ് ഖാന്, സന്ദീപ് ശര്മ്മ എന്നിവരടങ്ങിയ സണ്റൈസേഴ്സിന്റെ വൈവിധ്യമാര്ന്ന ബൗളിംഗ് നിരയാണ് ഈ സീസണില് ഇതുവരെ ബാറ്റസ്മാന്മാര്ക്ക് വലിയ വെല്ലുവിളി ഉയര്ത്തിയത്. എങ്കിലും ഷെയ്ന് വാട്സണും സുരേഷ് റെയ്നയും അമ്പാടി റായിഡുവും ഡ്വെയിന് ബ്രാവോയും ധോണിയും ഉള്പ്പെടുന്ന ബാറ്റിംഗ് നിര മികവുറ്റ പ്രകടമാണ് പുറത്തെടുത്തിട്ടുള്ളത്.
മത്സരഗതി അതിവേഗം മാറ്റാന് കെല്പ്പുള്ള വാട്സണും ധോണിയും ബ്രാവോയുമായിരിക്കും എതിരാളികളുടെ നോട്ടപ്പുള്ളികള്. മറുവശത്ത്, ശിഖര് ധവാന്, കെയിന് വില്യംസണ് എന്നിവരിലാണ് സണ്റൈസേഴ്സിന്റെ ബാറ്റിംഗ് പ്രതീക്ഷ ഏറെയും. യൂസുഫ് പഠാനും മനീഷ് പാണ്ഡെയും ഫോമിലേക്ക് ഉയര്ന്നാല് ചെന്നൈക്ക് കാര്യങ്ങള് എളുപ്പമാവില്ല. എങ്കിലും ധോണിയുടെ നേതൃത്വം കൈമുതലായുള്ളത് ചെന്നൈയ്ക്ക് ബോണസാണ്. ക്യാപറ്റന് കൂളിന്റെ കണക്കുകൂട്ടലുകള് തെറ്റിക്കാന് സണ്റൈസേഴ്സിന് സാധിക്കുമോ എന്ന് കാത്തിരുന്ന് കാണാം.