ന്യൂഡൽഹി ; ഇന്ത്യൻ സേനയ്ക്കായി ഒരുങ്ങുന്നു മിലിട്ടറി സാറ്റ്ലൈറ്റുകൾ. വരും മാസങ്ങളിൽ നടപ്പാക്കാൻ കഴിയും വിധത്തിൽ ഐഎസ്ആർഒ സൈനിക ഉപഗ്രഹങ്ങളുടെ പരീക്ഷണങ്ങളിലാണ്.
അതിർത്തി പ്രദേശങ്ങളുടെ രഹസ്യ വിവരശേഖരണത്തിനും, ശത്രു രാജ്യങ്ങൾക്ക് മേലുള്ള നിരീക്ഷണത്തിനും ഉതകും വിധത്തിലാണ് മിലിട്ടറി ഇന്റലിജൻസിന്റെ ആവിഷ്ക്കരണം.
ഇന്ത്യൻ എയർഫോഴ്സിന്റെ പ്രവർത്തനങ്ങൾക്ക് സഹായകമാകും വിധത്തിൽ ഐ എസ് ആർ ഒ വികസിപ്പിക്കുന്ന പുതിയ സാറ്റ്ലൈറ്റായ ജിസാറ്റ് – 7 എ ഈ വർഷം സെപ്റ്റംബറിൽ കൈമാറുമെന്നാണ് സൂചന.
അത്യാധുനിക റിമോട്ട് സെൻസിംഗ് സൗകര്യങ്ങളുള്ള റിസാറ്റ്- 2 എ ഈ വർഷം അവസാനം വികസിപ്പിക്കുമെന്ന് ഐ എസ് ആർ ഒ യുമായി ബന്ധപ്പെട്ട വൃത്തങ്ങൾ അറിയിച്ചു.
ഇന്ത്യയുടെ നൂതന നിരീക്ഷണ സാങ്കേതിക വിദ്യയെ ശക്തിപ്പെടുത്തും വിധത്തിലാണ് റിസാറ്റ്-2എ യുടെ ആവിഷ്ക്കരണം.മാത്രമല്ല കാലാവസ്ഥ നിരീക്ഷണത്തിനും ഈ ഉപഗ്രഹം സഹായകരമാകും.
വിവിധ തരത്തിലുള്ള റഡാറുകൾ, എയർബേസുകൾ, എന്നിവയെ പരസ്പരം ബന്ധിപ്പിക്കുന്നതിന് ജിസാറ്റ് 7A സഹായിക്കും.