ഇന്ഡോര്: ഐ.പി.എല്ലില് ഇന്ന് കിംഗ്സ് ഇലവന് പഞ്ചാബും മുംബൈ ഇന്ത്യന്സും ഏറ്റുമുട്ടും. കളിച്ച ഏഴില് അഞ്ചും ജയിച്ച കിംഗ്സ് ഇലവന് പഞ്ചാബ് മികച്ച നിലയിലാണ്. മുംബൈ ആകട്ടെ, കളിച്ച എട്ട് മത്സരങ്ങളില് ആറും തോറ്റ് പോയിന്റ് നിലയില് ഏറ്റവും പിന്നിലാണ്. ഇന്ഡോറില് രാത്രി എട്ടിനാണ് മത്സരം.
മികച്ച താരങ്ങളെ അണിനിരത്തിയാണ് ഇറങ്ങിയതെങ്കിലും ഇതുവരെയും മികവിലേക്കുയരാന് സാധിക്കാത്ത മുംബൈ ഇന്ത്യന്സിന്റെ നോക്കൗട്ട് സാധ്യതകള് ഏതാണ്ട് അസ്തമിച്ചു കഴിഞ്ഞു. എട്ട് മത്സരങ്ങള് കളിച്ച നിലവിലെ ചാമ്പ്യന്മാര്ക്ക് ഇതുവരെ ജയിക്കാനായത് രണ്ട് മത്സരങ്ങളില് മാത്രമാണ്.
രോഹിത് ശര്മ്മ, കീറോണ് പൊള്ളാര്ഡ്, ഹാര്ദ്ദിക് പാണ്ഡ്യ എന്നിവര് നിറം മങ്ങിയതാണ് ടീമിന് വലിയ തിരിച്ചടിയായത്. രോഹിത് ശര്മ്മ ആകെ രണ്ട് മത്സരങ്ങളില് തിളങ്ങി, ആ മത്സരങ്ങളില് ടീം ജയിക്കുകയും ചെയ്തു.
പ്രതീക്ഷിച്ചതിലും മികച്ച മുന്നേറ്റം നടത്തിയ ടീമാണ് കിംഗ്സ് ഇലവന് പഞ്ചാബ്. ഓപ്പണര്മാരായ ലോകേഷ് രാഹുലിന്റേയും ക്രിസ് ഗെയിലിന്റേയും മിന്നുന്ന ഫോമാണ് ടീമിന് കരുത്തായത്. മായങ്ക് അഗര്വാളും കരുണ്നായരും ആരോണ്ഫിഞ്ചും മികച്ച സംഭാവനകള് നല്കി.
ആര്.അശ്വിന്റെ മികച്ച ക്യാപ്റ്റന്സിയും എടുത്ത് പറയേണ്ടതുതന്നെ. യഥാസമയത്ത് വരുത്തിയ ബൗളിംഗ് ചേഞ്ചുകള് എതിരാളികള്ക്ക് കടിഞ്ഞാണിട്ടു. ഏതൊരു ടീമിനും ശക്തമായ വെല്ലുവിളി ഉയര്ത്താന് സാധിക്കുന്ന നിലയിലേക്ക് വളര്ന്ന കിംഗ്സ് ഇലവനെ മെരുക്കുക, മുംബൈക്ക് അത്ര എളുപ്പമാവില്ല.