പൂനെ: ഐ.പി.എല്ലില് ഇന്ന് സണ്റൈസേഴ്സ് ഹൈദരാബാദും ചെന്നൈ സൂപ്പര് കിംഗ്സും ഏറ്റുമുട്ടും. പോയിന്റ് പട്ടികയില് ആദ്യ രണ്ട് സ്ഥാനങ്ങളിലുള്ള ടീമുകള് ഏറ്റുമുട്ടുമ്പോള് പോരാട്ടം തീപാറുമെന്ന് ഉറപ്പ്. പൂനെയില് വൈകിട്ട് നാല് മണിക്കാണ് മത്സരം.
ഐ.പി.എല് ലേലത്തിന് ശേഷം, മത്സരങ്ങള് തുടങ്ങുന്നതിന് മുന്പ് ഏവര്ക്കും തോന്നിയ സംശയം ചെന്നൈയുടെ വയസ്സന്പടയ്ക്ക് എന്ത് ചെയ്യാനാകും എന്നായിരുന്നു. എന്നാല് ധോണിയുടെ ഉജ്ജ്വല നേതൃത്വത്തില് തകര്പ്പന് പ്രകടനം പുറത്തെടുത്ത ചെന്നൈ, രണ്ട് വര്ഷത്തിന് ശേഷമുള്ള മടങ്ങിവരവ് ഗംഭീരമാക്കി. അതില് ധോണിയും വാട്സണും റെയ്നയും ബ്രാവോയും വഹിച്ച പങ്ക് വളരെ വലുതാണ്. ഓരോ താരത്തേയും കൃത്യമായ സ്ഥാനങ്ങളില് വിനിയോഗിച്ച് അവരുടെ ഏറ്റവും മികച്ച പ്രകടനം പുറത്തെടുക്കുന്നതില് ധോണിക്കുള്ള കഴിവ് അപാരമാണ്. റായിഡുവിന്റെ മികച്ച ഫോമും ടീമിന് തുണയായി. ബൗളര്മാരെ ഫലപ്രദമായി വിനിയോഗിക്കാനും ക്യാപ്റ്റന് സാധിക്കുന്നു.
പ്രമുഖരുടെ സാന്നിധ്യം കുറവുള്ള സണ്റൈസേഴ്സ് ഹൈദരാബാദും പ്രതീക്ഷിച്ചതിലും ഏറെ മികച്ച പ്രകടനമാണ് പുറത്തെടുക്കുന്നത്. ബാറ്റ് കൊണ്ട് തിളങ്ങുന്ന കെയിന് വില്യംസന്റെ ക്യാപ്റ്റന്സിയാണ് അവരുടെ നട്ടെല്ല്. ബാറ്റിംഗിലെ നെടുംതൂണും വില്യംസണ് തന്നെ. ശിഖര് ധവാന് കൂടി ഫോമിലേക്ക് മടങ്ങിയെത്തിയത് ടീമിനെ കൂടുതല് ശക്തമാക്കിയിട്ടുണ്ട്. അലക്സ് ഹെയില്സ്, മനീഷ് പാണ്ഡെ, യൂസഫ് പഠാന്, ഷക്കീബ് അല് ഹസ്സന് എന്നിവരുടെ സാന്നിധ്യം ഗുണം ചെയ്യും. ഈ സീസണിലെ ഏറ്റവും മികച്ച ബൗളിംഗ് പ്രകടനമാണ് ഹൈദരാബാദിന്റേത്. ഇരു ക്യാപ്റ്റന്മാരുടേയും ബാറ്റിംഗും നേതൃപാടവവും നിര്ണായക ഘടകമായിരിക്കും.